“Malembo yonse yeuzhyiliwa na Mulungu.”​—2 Timoteyo 3:16, Baibulo la dziko latsopano.

Mufwange mayankho ocetekeleka pa makonsho ofunika ngako paumoyo.​—Miyambo 2:1-5.

Mufwange malango ocetekeleka pa umoyo wa nsiku na nsiku.​—Salimo 119:105.

Muŵe na cilolelo ngaco-ngaco ca kunthangu.​—Aroma 15:4.

Eee, tingazicetekele pa vikomo vitatu:

• Nkhani zake ni zokatizhyana. Baibolo yelembewa kwa vyaka vopitilila 1,600 na ŵanthu 40 osiyana-siyana. Anyinji mwa ŵeve aliyokumanepo. Koma nkhani zonse zecilemba ni zokatizhyana pa mfundo ikuleni imo.

• Yocetekeleka pa nkhani ya mbili zakale. Kanyinji-kanyinji, ŵanthu olemba mbili zakale olemba lini nkhani zokhuza kugonjesewa kwa ŵanthu a mtundu wao. Mosiyana na ŵanthu amene aŵa, elemba Baibolo aliyefise vinthu veciluvya ŵeve keno mtundu wao.​—2 Mbiri 36:15, 16; Salimo 51:1-4.

• Maulosi yake yokwanilishika. Baibolo yelaŵililatu za kucenekewa kwa mzinda wacomba wa Babulo kukali vyaka 200, ivi vikaliyecitika. (Yesaya 13:17-22) Kuyangizhyila pa za mwamene mzinda wa Babulo wenzokuzocenekewela, Baibolo yetomola soti zina ya munthu amene enzekuzouceneka—Yesaya 45:1-3.

  Pali soti maulosi ayambine anyinji yamene yekwanilishika ndendende na veilaŵila Baibolo. Kansi umu niye lini mwayufunikila kuŵela buku yofumila kwa Mulungu?​—2 Petulo 1:21.