MUKAŴELENGA nyuzipepala, mukaonelela TV, olo mukamvwishila ku wailesi, muona na kumvwa nkhani zinyinji zokhuza unyankapondo, nkhondo na ucigaŵenga. Payakine muvutika cifukwa ca matenda olo cifukwa cakuti munthu wamukonda emwalila.

Zikonsheni kuti:

• Ko Mulungu ofuna kuti moyo wangu na wa banja yangu unkhale woteti?

• Mwa ningapeze kuni thandizo kuti nikwanishe kulimbana na mavuto yanukumana nayo?

• Kansi pali ciyembekezo ciliconse cakuti tikankhale na mtendele wene-wene pacalo?

Baibolo yutwala mayankho okhutilisha pa makonsho aya.

• Kukaŵeve voŵaŵa nipo ŵanthu akokulukazhya lini olo kufwa.—Chivumbulutso 21:4

• “Munthu wolemala akakwele lupili n’nga ni mbawala inalume.”—Yesaya 35:6

• “Menso ya ŵanthu asalolesha akaseguliwe.”—Yesaya 35:5

•  Ŵanthu ecifwa akaukishiwe.—Yohane 5:28, 29

• Paliye ati akolwala.—Yesaya 33:24

• Munthu aliyense pacalo akankhale na vakulya vokwanila.—Salimo 72:16

Cingankhale cosavuta kulingilila kuti zinthu zamwaŵelenga pa mapeji oyambilila m’buku ino ni maloto tyala. Koma Mulungu niye walonjeza kuti acinje zinthu pacalo lombapano, nipo Baibolo yufotokoza mwati akacitile zamene izi.

Koma Baibolo yutiuzhya lini tyala zati akacite Mulungu. Yutiuzhya soti zatuwamila kucita kuti tinkhale otemwa nosangalala na umoyo nangu pali lomba. Lingililani mwakanthawi za zinthu zukucitishani nkhaŵa. Izi zingayangizhyilepo mavuto a zacuma, mavuto a m’banja, kulwala olo imfwa ya wokondeka wanu. Baibolo ingakuyavyeni kulimbana na mavuto nipo ingakutonthozeni mwa kuyankha makonsho n’nga aya:

• Ndaŵa yanji tuvutika?

• Kansi tingalimbane tyani na nkhaŵa za paumoyo?

• Ko n’zokwanishika kuti banja yasu iŵe yotemwa?

• Mwa ni cinji cucitika tikamwalila?

• Ko okondeka ŵasu emwalila tikaŵaone soti?

• Kansi tingasimikizhye tyani kuti Mulungu akakwanilishe zawalonjeza kucita kusogolo?

 Kuŵelenga kwanu buku ino kuonesha kuti mufuna kuziŵa zayuphunzisa Baibolo. Buku ino ikuyavyeni. Ndime iliyonse ili na konsho yake, nipo makonsho amene aŵa akuyavyeni kuimvwisha luweme Baibolo. Ŵanthu mamiliyoni ankhala otemwa kuphunzila Baibolo na Mboni za Yehova. Tukhulupilila kuti namwe munkhale otemwa. Tukufunilani madaliso a Mulungu pamuphunzila Baibolo!