1. Ko mungalingilile kucita cinji pavuli pophunzila buku ino mosamala?

KUFWIKA pano mwaphunzila zinyinji zokhuza cendi ca m’Baibolo kupitila m’buku ino, n’nga lonjezo ya Mulungu yokhuza moyo wosasila, cucitika munthu akafwa na ciyembezo ca ciukililo. (Mlaliki 9:5; Luka 23:43; Yohane 5:28, 29; Chivumbulutso 21:3, 4) Payakine mweyamba kale kupezekapo pa misonkhano ya Mboni za Yehova nokhulupilila kuti ocita zinthu mokatizhyana  na kulambila kwacendi. (Yohane 13:35) Payakine mweyamba kale kukulisha ushamwali wanu na Yehova, nipo payakine mwapanga kale cosankha cakuti mum’tumikile. Tetyo mungalingilile kuti, ‘Mwa nuwamila kucita cinji kuti nitumikile Mulungu?’

2. N’cinji cesonkhezela munthu wa ku Itiyopiya kuti afune kubatizika?

² Izi niye zecilingilila kucita munthu wa ku Itiyopiya wamene enkhalako m’nthawi ya Yesu. Nthawi iyakine pavuli pakuti Yesu waukishiwa, wophunzila wa Yesu, Filipo, elalikila kuli munthu wamene uyu. Filipo emuonesha umboni wakuti Yesu enze Mesiya. Munthu wa ku Itiyopiya esonkhezelewa na zinthu zeciphunzila nipo nthawi yamene iyo elaŵila kuti: “Onani! Si aya manzi anyinji. Cunilesha kubatizika n’cinji?”—Machitidwe 8:26-36.

3. (a) Kansi Yesu etwala lamulo yotyani kwa okonkha ŵake? (b) Ko munthu owamila kubatizika tyani?

³ Baibolo yulaŵila momvwika luweme kuti keno mufuna kutumikila Yehova, muwamila kubatizika. Yesu euzhya okonkha ŵake kuti: “Lutani mukaphunzise ŵanthu a mitundu yonse kuti ankhale ophunzila ŵangu. Mukoŵabatiza.” (Mateyu 28:19) Yesu eonesha coonelapo mwakubatizika m’manzi. Yove embizhyiwa m’manzi, osati kutiliwa tyala manzi pa mutu. (Mateyu 3:16) Masiku ŵano Mkhilisitu pobatizika owamila kumbizhyiwa muŵili wonse m’manzi.

4. Mwa ubatizo wanu uonesha cinji kuli ayakine?

⁴ Mukabatizika, muonesha ayakine kuti mufuna cendi kunkhala shamwali wa Mulungu nomutumikila. (Salimo 40:7, 8) Tetyo payakine mungakonshe kuti, ‘Ko nuwamila kucita cinji kuti nibatizike?’

5. (a) Kansi muwamila kucita cinji coyamba mukaliyobatizika? (b) Ndaŵa yanji misonkhano Yacikhilisitu ni yofunika ngako?

⁵ Mukaliyobatizika, muwamila kuziŵa Yehova na Yesu. Nipo mwayamba kale kucita zamene izi mwa kuphunzila Baibolo. (Ŵelengani Yohane 17:3.) Koma kucita izi n’kosakwanila. Baibolo yulaŵila kuti muwamila “kunkhala oziŵa molondola” cifunilo ca Yehova. (Akolose 1:9) Misonkhano ya Mboni za Yehova ikuyavyeni kunkhala pa ushamwali wotang’a na Yehova. Niye cifukwa cake ni cinthu cofunika ngako kupezeka pa misonkhano nthawi zonse.—Aheberi 10:24, 25.

6. Kansi muwamila kuziŵa zinthu zonse za m’Baibolo kuti mubatizike?

⁶ Yehova oyembekezela lini kuti muziŵe zinthu zonse za m’Baibolo kuti muyenelele ubatizo. Yove aliyoyembekezele kuti munthu wa ku Itiyopiya aziŵe zinthu zonse akaliyobatizika. (Machitidwe 8:30, 31) Nipo tipitilizhye kuphunzila za Mulungu mpaka kale-kale. (Mlaliki 3:11) Koma kuti mubatizike, muwamila kuziŵa novomelezhya mfundo zoyambilila za m’Baibolo.—Aheberi 5:12.

7. Ko kuphunzila kwanu Baibolo kwakuyavyani tyani?

⁷ Baibolo yulaŵila kuti: “Paliye cikhulupililo n’zosakwanishika kutemwesha Mulungu.” (Aheberi 11:6) Tetyo muwamila kunkhala na cikhulupililo mukaliyobatizika. Baibolo yutiuzhya kuti ŵanthu ayakine a mu mzinda wakale wa Akorinto ecimvwa zenzophunzisa okonkha a Yesu, nipo “eyamba kukhulupilila nobatizika.” (Machitidwe 18:8) Molingana na izi, kuphunzila kwanu Baibolo kwakuyavyani kunkhala na cikhulupililo m’malonjezo a Mulungu na mu mphamvu ya nsembe ya Yesu, yamene ingatipulumuse ku ucimo na imfwa.—Yoswa 23:14; Machitidwe 4:12; 2 Timoteyo 3:16, 17.

8. Mwa n’cinji cati cikusonkhezeleni kuuzhyako ayakine zamuphunzila?

⁸ Pamuphunzila zinyinji kufumila m’Baibolo noona mwayukuyavyilani pa umoyo wanu, cikhulupililo canu cinkhale cotang’a. Munkhale ofunishisha kuuzhyako ayakine zamuphunzila. (Yeremiya 20:9; 2 Akorinto 4:13) Koma kansi ni ŵani ŵamuwamila kuuzhyako?

9, 10. (a) Ko mungayambe kuuzhyako ŵani zamuphunzila? (b) Kansi muwamila kucita cinji keno mufuna kuyamba kulalikila pamo na mpingo?

⁹ Payakine mungauzhyeko abanja ŵanu, ayanu, ŵamunkhala nao pafupi olo ŵamuseŵenza nao zamuphunzila. Keno mucita tetyo niye kuti mucita luweme, koma nthawi zonse muwamila kucita zamene izi mowama mtima koma soti mwacikondi. M’kuluta kwa nthawi, mungayenelele kulalikila pamo na mpingo. Mukafuna kuyamba kulalikila pamo na mpingo, uzhyani wa Mboni wamene okuphunzisani Baibolo kuti mufuna kulalikila pamo na mpingo. Keno okuphunzisani oona kuti nimwe oyenelela nipo munkhala mokatizhyana na mfundo za m’Baibolo pa umoyo wanu, mweo pamo na yove mukaonane na akulu aŵili a mu mpingo.

¹⁰ Mwa n’cinji cati cikacitike mukayokumana na akulu? Akulu akalaŵizhyane namwe kuti akaone keno mumvwisha nokhulupilila mfundo zoyambilila za m’Baibolo, keno mukonkha mfundo za m’Baibolo pa umoyo wanu na kuti keno mufunishisha cendi kunkhala Mboni ya Yehova. Kumbukilani kuti akulu osamalila ŵanthu onse a mu mpingo, kuyangizhyilapo mweo. Tetyo muwamila lini kucita wowa kulaŵila nao. (Machitidwe 20:28; 1 Petulo 5:2, 3) Pavuli pake, akulu amene aŵa akakuuzhyeni keno mungayambe kulalikila pamo na mpingo.

11. Ndaŵa yanji ni cinthu cofunika ngako kucinja mukaliyoyamba kulalikila pamo na mpingo?

 ¹¹ Akulu angakuuzhyeni kuti muwamila kucinja mbali ziyambine pa umoyo wanu mukaliyoyamba kulalikila pamo na mpingo. Ndaŵa yanji kucinja mbali zamene izo ni cinthu cofunika ngako? Cifukwa cakuti keno tuuzhyako ayakine za Mulungu, tupanamila Yehova nipo tuwamila kunkhala m’njila yoonesha kuti tumulemekeza.—1 Akorinto 6:9, 10; Agalatiya 5:19-21.

12. Ndaŵa yanji ŵanthu onse owamila kulapa?

¹² Pali zinthu ziyakine zamuwamila kucita mukaliyobatizika. Mtumwi Petulo elaŵila kuti: “Tetyo lapani notembenuka kuti macimo ŵanu afafaniziwe.” (Machitidwe 3:19) Ko kulapa kutanthauza cinji? Kutanthauza kumvwa cisoni cofumila pansi pa mtima pa cinthu ciipa catacita. Mwacisanzo, keno mwenze na umoyo waciwelewele, muwamila kulapa. Nipo nangu kuti pa umoyo wanu mwenzoyesa-yesa kucita zinthu ziweme, muwamila mphela kulapa, cifukwa cakuti tonse nise ocimwa nipo tuwamila kusenga Mulungu kuti akotikhululukila.—Aroma 3:23; 5:1.

13. Ko “kutembenuka” kutanthauza cinji?

¹³ Kansi kuzimvwila tyala cisoni pa vinthu viipa vemwenzocita n’kokwanila? Yai. Mtumwi Petulo elaŵila kuti muwamila soti “kutembenuka.” Izi zutanthauza kuti muwamila kuleka nkhalidwe iliyonse iipa noyamba kucita zinthu ziweme. Mwacisanzo, lingililani kuti mukuya kumalo ayakine kwamukaliyelutako. Pavuli pakuti mwayendako patontho, muzindikila kuti mwatola njila yolakwika. Ko mungacite cinji? Mosapenekela mungapaname, nozhyoka notola njila yoyenelela. Molingana na  izi, pamuphunzila Baibolo, mungazindikile kuti pali zinthu ziyakine zamuwamila kucinja pa umoyo wanu. Nkhalani ofunishisha “kutembenuka”—kutanthauza kuti muwamila kucinja—nipo yambani kucita zinthu zoyenela.

14. Ko mulitwala tyani kwa Mulungu?

¹⁴ Cinthu ciyakine cofunika ngako camuwamila kucita mukaliyobatizika ni kulitwala kwa Yehova. Keno mwalitwala kwa Yehova, mulonjeza kupitila m’pemphelo kuti mutumikile tyala yove na kuti kucita cifunilo cake ni cinthu cofunika ngako mu umoyo wanu.—Deuteronomo 6:15.

15, 16. Kansi ni cinji cusonkhezela munthu kulitwala kwa Mulungu?

¹⁵ Kulonjeza kuti mutumikile tyala Yehova kulingana na kulonjeza kuti munkhale na munthu wamukonda kwa moyo wanu wonse. Lingililani kuti mwanalume ali pa citomelo na mwanakazi. Mwanalume pakufwika pomuziŵa luweme mwanakazi, ofwika pomukonda nofuna kumulungula. Nangu kuti ici ni cosankha cikulu, mwanalume onkhala wofunishisha kumulungula cifukwa cakuti omukonda.

¹⁶ Pamuphunzila za Yehova, mufwike pomukonda nipo mufune kucita zilizonse zamungakwanishe kuti mum’tumikile. Izi zikusonkhezeleni kumulonjeza m’pemphelo kuti mum’tumikile. Baibolo yulaŵila kuti aliyense ofuna kukonkha Yesu owamila “kulikana yeka.” (Maliko 8:34) Mwa izi zutanthauza cinji? Zutanthauza kuti kumvwila Yehova kunkhale cinthu coyamba pa umoyo wanu. Zakufuna Yehova ni zinthu zofunika ngako kupambana zofuna zanu.—Ŵelengani 1 Petulo 4:2.

17. Ndaŵa yanji ŵanthu ayakine olitwala lini kwa Yehova?

¹⁷ Ŵanthu ayakine oyopa kulitwala kwa Yehova cifukwa cakuti olingilila kuti angakwanishe lini kusunga lonjezo yao yomutumikila. Ofuna lini kukhumudwisha Yehova, olo payakine angalingilile kuti keno angalitwale lini kwa yove, Yehova angaŵaimbe lini mlandu pa vinthu vakucita.

18. Mwa ni cinji cingakuyavyeni kuti musilizhye wowa wakuti mungakhumudwishe Yehova?

¹⁸ Cikondi canu pa Yehova cikuyavyeni kusilizhya wowa wakuti mungam’khumudwishe. Cifukwa cakuti mum’konda, mucite ciliconse camungakwanishe kuti musunge lonjezo yanu. (Mlaliki 5:4; Akolose 1:10) Muone kuti kucita cifunilo ca Yehova n’kosavuta. Mtumwi Yohane elemba kuti: “Cifukwa cakuti kukonda Mulungu kutanthauza kusunga malamulo ŵake, nipo malamulo ŵake ni osaŵeŵesha.”—1 Yohane 5:3.

19. Ndaŵa yanji muwamila lini kuyopa kulitwala kwa Yehova?

¹⁹ Muwamila lini kucitonkhala angwilyo kuti mulitwale kwa Yehova. Yove oyembekezela lini kuti ticite zinthu zatingakwanishe lini kucita. (Salimo 103:14) Yove akuyavyeni kucita zinthu zoyenela. (Yesaya 41:10) Khulupililani Yehova na mtima wanu wonse, nipo “yove alungamike njila zanu.”—Miyambo 3:5, 6.

20. Pavuli pakuti mwalitwala kwa Mulungu, mwa muwamila kucita cinji?

²⁰ Ko mulingilila kuti nimwe okonzeka kulitwala kwa Yehova? Pavuli pakuti mwalitwala kwa Yehova, niye kuti nimwe okonzeka kubatizika.

21, 22. Ko ‘mungaŵilizhye tyani patuŵa’ za cikhulupililo canu?

 ²¹ Ziŵishani wokatanisha nchito za bungwe ya akulu kuti mwalitwala kwa Yehova nipo mufuna kubatizika. Pavuli pake akauzhye akulu ayakine kuti akalaŵizhyane namwe mfundo zoyambilila za m’Baibolo. Keno aona kuti nimwe woyenelela, akakuuzhyeni kuti mungabatizike pa msonkhano  wokonkhapo wadela olo wacigawo wa Mboni za Yehova. Pa msonkhano wamene uyu, pakankhale nkhani yofotokoza tanthauzo ya ubatizo. Wolaŵila nkhani akakonshe makonsho aŵili kuli akuyobatizika. Mwa kuyankha makonsho amene ayo, “mukaŵilizhye patuŵa” za cikhulupililo canu.—Aroma 10:10.

 ²² Pavuli pake mukabatizike. Mukambizhyiwe muŵili wonse m’manzi. Ubatizo wanu ukaoneshe patuŵa kuti mwalitwala kwa Yehova nipo nimwe Mboni ya Yehova.

23. Kansi kubatizika “m’zina ya Atata, na ya Mwana, na ya mzimu utuŵa” kutanthauza cinji?

²³ Yesu elaŵila kuti ophunzila ŵake akobatizika “m’zina ya Atata, na ya Mwana, na ya mzimu utuŵa.” (Ŵelengani Mateyu 28:19.) Mwa izi zutanthauza cinji? Zutanthauza kuti muzindikila ulamulilo wa Yehova na udindo wa Yesu pokwanilisha cifunilo ca Mulungu na mwakuseŵenzeshela mzimu wake utuŵa Mulungu pokwanilisha cifunilo cake.—Salimo 83:18; Mateyu 28:18; Agalatiya 5:22, 23; 2 Petulo 1:21.

24, 25. (a) Ko ubatizo upanamila cinji? (b) Kansi tikalaŵizhyane cinji m’mutu wokonkhapo?

²⁴ Ubatizo upanamila cinthu ciyakine cofunika ngako. Kumbizhyiwa m’manzi kutanthauza kuti mwafwa ku umoyo wanu wakale. Kuvuuka m’manzi kutanthauza kuti mwayamba umoyo walomba wocita cifunilo ca Mulungu. Izi zuonesha kuti mutumikile Yehova kufumila lomba mpaka kale-kale. Kumbukilani kuti mwelitwala kwa Yehova, osati ku munthu aliyense, ku bungwe iliyonse olo ku nchito iliyonse.

²⁵ Kulitwala kwanu kukuyavyeni kunkhala pa ushamwali wotang’a na Mulungu. (Salimo 25:14) Izi zutanthauza lini kuti munthu akapulumusiwe tyala cifukwa cakuti ni wobatizika. Mtumwi Paulo elemba kuti: “Pitilizhyani kukonza cipulumuso canu, mwawowa na kunjenjemela.” (Afilipi 2:12) Ubatizo ni poyambila tyala. Koma ko mungapitilizhye tyani kunkhala pafupi na Yehova? Mutu wosilizhyila wa buku ino uyankhe konsho yamene iyo.