1. Kansi ni ŵani angatiuzhye njila yoyenela yolambilila Mulungu?

VIPEMBEZO vinyinji vulaŵila kuti vuphunzisa cendi cokhuza Mulungu. Koma uyo ni wenye cifukwa cakuti vuphunzisa vinthu vosiyana vokhuza Mulungu na mwatingamulambilile. Mwa tingaziŵe tyani njila yoyenela yolambilila Mulungu? Ni Yehova tyala angatiuzhye mwatingamulambilile.

2. Ko mungaphunzile tyani njila yoyenela yolambililamo Mulungu?

² Yehova watipasa Baibolo kuti tiziŵe njila yoyenela yomulambilila. Tetyo phunzilani Baibolo, nipo Yehova akuyavyeni kuti mupindule na ziphunziso zake cifukwa cakuti yove osamala ngako za mweo.—Yesaya 48:17.

3. Kansi Mulungu ofuna kuti tikocita cinji?

³ Ŵanthu ayakine olaŵila kuti Mulungu ovomelezhya vipembezo vonse, koma Yesu aliyephunzise tetyo. Yove elaŵila kuti: “Ni onse lini olaŵila kuli neo kuti, ‘Asikulu, Asikulu,’ ati akaloŵe Ufumu wa kululu yai, koma tyala ula ocita cifunilo ca Atata ŵangu.” Tetyo ni cinthu cofunika kuli seo kuziŵa cifunilo ca Mulungu nocita cifunilo camene ico. Iyi ni nkhani yofunika ngako cifukwa cakuti Yesu elinganizhya ŵanthu osamvwila Mulungu na anyankapondo, keno kuti “ŵanthu osamvwila malamulo.”—Mateyu 7:21-23.

4. Mwa Yesu elaŵila cinji zokhuza kucita cifunilo ca Mulungu?

⁴ Yesu eticenjeza kuti keno tufuna kucita cifunilo ca Mulungu, tikumane na zovuta. Yove elaŵila kuti: “Loŵani pamlyango wopapatiza. Pakuti mseu ukulu na wotambuluka utwala ku cionongeko, nipo ŵanthu anyinji oyenda mwamene  umo. Koma mlyango woloŵela ku moyo ni wopapatiza koma soti mseu wake ni wopanikiza, nipo oufwana ni oŵelengeka.” (Mateyu 7:13, 14) Mseu wopapatiza, keno kuti njila yoyenela yolambilila Mulungu, yutangulila ŵanthu ku moyo wosasila. Mseu ukulu, keno kuti njila yolakwika yolambilila Mulungu, yutangulila ŵanthu ku imfwa. Koma Yehova ofuna lini kuti munthu aliyense akafwe. Yove opasa munthu aliyense shuko yophunzila zinthu zokhuza yove.—2 Petulo 3:9.

5. Mwa mungaŵaziŵe tyani ŵala olambila Mulungu m’njila yoyenela?

⁵ Yesu elaŵila kuti tingaŵaziŵe ŵala olambila Mulungu m’njila yoyenela. Tingaŵaziŵe mwa kufufuza zakukhulupilila na zakucita. Yove elaŵila kuti: “Mukaŵazindikile na votwala vao.” Nipo eyangizhyila kuti: “Cimuti ciliconse ciweme cutwala votwala viweme.” (Mateyu 7:16, 17) Izi zutanthauza lini kuti ŵala olambila Mulungu ni angwilyo. Koma atumiki a Mulungu oyesa-yesa kucita zinthu zoyenela nthawi zonse. Lomba tione cingatiyavye kuzindikila ŵala olambila Mulungu m’njila yoyenela.

6, 7. Ndaŵa yanji kulambila kwacendi ni kozikiwa pa Baibolo? Ko cisanzo ca Yesu cutiphunzisa cinji?

⁶ Kulambila kwasu kuwamila kuzikiwa pa Baibolo. Baibolo yulaŵila kuti: “Malembo onse euzhyiliwa na Mulungu, nipo ni opindulisha pa kuphunzisa, kuzuzula, kulungamika zinthu na kulangiza m’cilungamo, kuti munthu wa Mulungu ankhale woyenelela luweme koma soti wokonzeka mokwanila kucita nchito iliyonse iweme.” (2 Timoteyo 3:16, 17) Mtumwi Paulo elembela Akhilisitu kuti: “Pemwelondela malizu a Mulungu yemwecimvwa kuli seo, muliyoŵalondele n’nga malizu a ŵanthu yai, koma mwayalili cendi, n’nga malizu a Mulungu.” (1 Atesalonika  2:13) Kulambila kwacendi ni kozikiwa tyala pa Malizu a Mulungu, Baibolo. Ni kosazikiwa pa malingililo a ŵanthu, miyambo ya ŵanthu olo pa ciyakine ciliconse.

⁷ Ciliconse ceciphunzisa Yesu cenze cozikiwa pa Malizu a Mulungu. (Ŵelengani Yohane 17:17.) Yove nthawi zonse enzokata malizu m’Malembo. (Mateyu 4:4, 7, 10) Atumiki acendi a Mulungu okonkha cisanzo ca Yesu nozika zilizonse zakuphunzisa pa Baibolo.

8. Mwa Yesu etiphunzisa cinji pa nkhani yokhuza kulambila Yehova?

⁸ Tuwamila kulambila Yehova tyala. Lembo ya Salimo 83:18 yulaŵila kuti: “Mweo, amene zina yanu nimwe Yehova, mweo mweka nimwe Wapalulu Ngako, wolamulila calo conse capansi.” Yesu enzofuna kuti ŵanthu aziŵe kuti Mulungu wacendi ni ŵani, nipo ephunzisa ŵanthu zina ya Mulungu. (Ŵelengani Yohane 17:6.) Yesu elaŵila kuti: “Yehova Mulungu wako niye amene uwamila kumulambila, nipo uwamila kutumikila yove yeka tyala.” (Mateyu 4:10) Tetyo, n’nga atumiki a Mulungu, tukonkha cisanzo ca Yesu. Tulambila Yehova tyala, tuseŵenzesha zina yake, nipo tuphunzisa ayakine za zina ya Mulungu na zati akaticitile.

9, 10. Mwa tuonesha tyani cikondi kuli umo na muyake?

⁹ Tuwamila kunkhala na cikondi cene-cene pa ŵanthu. Yesu ephunzisa ophunzila ŵake kuti akokondana. (Ŵelengani Yohane 13:35.) Ziliye kanthu kuti tunkhala kuni, tili mu mtundu uni, nise olemela olo osauka. Cikondi casu pali umo na muyake cutikatizhyanisha pamo n’nga akwasu na azilongosi. (Akolose 3:14) Tetyo tuluta lini kunkhondo na kupaya ŵanthu. Baibolo yulaŵila kuti: “Ŵana a Mulungu koma soti ŵana a Maleŵanya oonekela luweme na mfundo iyi: Aliyense osacita zolungama ofumila lini kwa Mulungu, cimozi-mozi soti amene okonda lini mkwake.” Nipo yuyangizhyila kuti: “Tikokondana,  osati n’nga ni Kaini, amene efumila kuli muipa nopaya mkwake.”—1 Yohane 3:10-12; 4:20, 21.

¹⁰ Tuseŵenzesha nthawi yasu, mphamvu zasu, na cuma casu kuyavya nolimbikishana umo na muyake. (Aheberi 10:24, 25) ‘Tucitila ŵanthu onse ziweme.’—Agalatiya 6:10.

11. Ndaŵanji tuvomelezhya Yesu kunkhala njila yofwikila kwa Mulungu?

¹¹ Tuwamila kumvwila Yesu cifukwa cakuti yove niye njila yofwikila kwa Mulungu. Baibolo yulaŵila kuti: “Cipulumuso cupezeka lini muli munthu muyakine aliyense, pakuti paliye zina iyakine pacalo, yamene yatwaliwa ku ŵanthu, yatuwamila kupulumusiwa nayo.” (Machitidwe 4:12) M’Mutu 5 wa buku ino, tephunzila kuti Yehova etuma Yesu kuti atwale moyo wake n’nga dipo kuli ŵanthu omvwila. (Mateyu 20:28) Yehova wasankha Yesu kuti alamulile n’nga Mfumu pacalo conse. Niye cifukwa cake Baibolo yutiuzhya kuti tuwamila kumvwila Yesu keno tufuna kunkhala kosasila pacalo.—Ŵelengani Yohane 3:36.

12. Ndaŵa yanji tutolamo lini mbali m’ndale?

¹² Tuwamila lini kutolamo mbali m’ndale. Yesu aliyotolemo mbali mu ndale. Penzoyesewa, euzhya wolamulila wa Roma, Pilato, kuti: “Ufumu wangu uli lini mbali ya cino calo.” (Ŵelengani Yohane 18:36.) N’nga ni Yesu, nise okhulupilika ku Ufumu wa Mulungu wakululu, nipo pa cifukwa camene ici, tutolamo lini mbali mu ndale mosasamala kanthu kuti tunkhala m’calo cotyani. Koma Baibolo yutilamula kumvwila “olamulila akulu-akulu,” kutanthauza kuti maboma. (Aroma 13:1) Tumvwila malamulo a m’calo mwatunkhala. Koma keno malamulo a m’calo aombana na malamulo a Mulungu, tutolela cisanzo ca atumwi amene elaŵila kuti: “Seo tuwamila kumvwila Mulungu n’nga wolamulila, osati ŵanthu.”—Machitidwe 5:29; Maliko 12:17.

13. Kansi tulalikila uthenga wotyani wokhuza Ufumu wa Mulungu?

 ¹³ Tukhulupilila kuti Ufumu wa Mulungu niye tyala njila yosilizhyila mavuto pacalo. Yesu elaŵila kuti “uthenga uweme wa Ufumu” ukalalikiliwe pacalo conse. (Ŵelengani Mateyu 24:14.) Paliye boma yaumunthu ingacite zauti ukaticitile Ufumu wa Mulungu. (Salimo 146:3) Yesu etiphunzisa kusenga za Ufumu wa Mulungu pecilaŵila kuti: “Ufumu wanu uwele. Cifunilo canu cicitike, n’nga ni kululu, cimozi-mozi pansi pano.” (Mateyu 6:10) Baibolo yutiuzhya kuti Ufumu wa Mulungu ukaceneke maboma onse aumunthu nipo “ukankhalepo mpaka kale-kale.”—Danieli 2:44.

14. Kansi muona kuti ni ŵani olambila Mulungu m’njila yoyenela?

¹⁴ Pavuli pophunzila mfundo izi, zikonsheni kuti: ‘Ni ŵani amene ziphunziso zao ni zozikiwa pa Baibolo? Ni ŵani ouzhya ayakine za zina ya Mulungu? Ni ŵani oonesha cikondi cene-cene kuli umo na muyake nokhulupilila kuti Mulungu etuma Yesu kuti azetipulumuse? Ni ŵani otolamo lini mbali mu ndale za calo? Ni ŵani olalikila kuti ni Ufumu wa Mulungu tyala ungasilizhye mavuto yasu?’ Ni a Mboni za Yehova tyala.—Yesaya 43:10-12.

15. Mwa tuwamila kucita cinji keno tufuna kuti Mulungu avomelezhye kulambila kwasu?

¹⁵ Kukhulupilila tyala kuti Mulungu aliko ni kosakwanila. Nangu viŵanda vukhulupilila kuti Mulungu aliko, koma vumumvwila lini. (Yakobo 2:19) Keno tufuna kuti Mulungu avomelezhye kulambila kwasu, tuwamila lini tyala kukhulupilila kuti yove aliko koma soti tuwamila kucita zakutiuzhya.

16. Ndaŵa yanji tuwamila kulewa cipembezo cawenye?

¹⁶ Kuti Mulungu avomelezhye kulambila kwasu, tuwamila kulewa cipembezo cawenye. Mneneli Yesaya elemba  kuti: “Cokani pakati pake! Nkhalani atuŵa.” (Yesaya 52:11; 2 Akorinto 6:17) Niye cifukwa cake tuwamila kulewa ciliconse cokatizhyana na kulambila kwawenye.

17, 18. Ko “Babulo Mkulu” n’cinji, nipo ndaŵa yanji muwamila kufumamo kamangu?

¹⁷ Ko cipembezo cawenye ni cinji? Ni cipembezo ciliconse cuphunzisa ŵanthu kulambila Mulungu m’njila yosiyana na zayulaŵila Baibolo. Baibolo yuita vipembezo vonse vawenye kuti “Babulo Mkulu.” (Chivumbulutso 17:5) Ndaŵanji? Pavuli pa Cigumula ca m’nthawi ya Nowa, viphunziso vinyinji vawenye va vipembezo veyambila mu mzinda wa Babulo. Viphunziso vamene ivo vefalikila pacalo conse. Mwacisanzo, ŵanthu enzonkhala mu mzinda wa Babulo enzolambila magulu a milungu itatu. Nangu masiku ŵano, vipembezo vinyinji vuphunzisa kuti Mulungu ni Utatu, koma Baibolo yulaŵila momvwika luweme kuti pali tyala Mulungu umo wacendi, Yehova, na kuti Yesu ni Mwana wake. (Yohane 17:3) Ŵanthu enzonkhala mu mzinda wa Babulo enzokhulupilila soti kuti mbali iyakine ya munthu yupitilizhya kunkhala na moyo pavuli pakuti munthu wafwa na kuti mbali yamene iyo inganzunzike m’mulilo wa helo. Koma ici ni cendi lini.—Onani nkhani 14, 17, na 18 ya Zakosilizhyila.

¹⁸ Mulungu elaŵililatu kuti lombapano vipembezo vonse vawenye vicenekewe. (Chivumbulutso 18:8) Kansi mumvwisha cifukwa cake muwamila kufumamo kamangu mu cipembezo cawenye? Yehova Mulungu ofuna kuti mufumemo manzi akali m’nkhokola.—Chivumbulutso 18:4.

19. Keno mwasankha kutumikila Yehova, kansi yove akusamalileni tyani?

¹⁹ Keno mwasankha kufuma mu cipembezo cawenye nosankha kutumikila Yehova, ayakine mwa ayanu olo abanja ŵanu angamvwishe lini cosankha canu nipo angacitishe  kuti vinthu vikuipileni. Koma Yehova akutayeni lini. Munkhale mbali ya banja ya pacalo conse ya ŵanthu mamiliyoni ali na cikondi cene-cene kuli umo na muyake, nipo munkhale na ciyembekezo conkhala na moyo wosasila m’calo calomba ca Mulungu. (Maliko 10:28-30) Payakine ayambine mwa ayanu na abanja ŵanu amene osusha cosankha canu cotumikila Yehova pavuli pake angayambe kuphunzila Baibolo.

20. Ndaŵa yanji ni cinthu cofunika ngako kulambila Mulungu m’njila yovomelezhyeka?

²⁰ Lombapano, Mulungu aceneke ŵanthu onse aipa nipo Ufumu wake ukalamulile pacalo conse. (2 Petulo 3:9, 13) Kulaŵila cendi, iyo ikankhale nthawi yotemwesha ngako! Aliyense akolambila Yehova m’njila yakuvomelezhya. Tetyo ni cinthu cofunika ngako kucitapo kanthu lomba nolambila Mulungu m’njila yovomelezhyeka.