1, 2. Ndaŵa yanji mulingilila kuti pemphelo ni mphaso yapadela, nipo ndaŵa yanji tuwamila kuziŵa zayuphunzisa Baibolo pa nkhani yokhuza pemphelo?

CALO ni kanthu katontho ngako polinganizhya na cilengedwe conse. Yehova akalolesha pacalo, mitundu ya ŵanthu ili n’nga ni kadontho ka manzi kocokela mu mgomo. (Salimo 115:15; Yesaya 40:15) Nangu kuti nise atontho polinganizhya na cilengedwe conse, lembo ya Salimo 145:18, 19 yulaŵila kuti: “Yehova ali pafupi na onse oita pa yove. Yove ali pafupi na onse omuita m’cendi, nipo ŵanthu omuyopa akaŵacitile zofuna zao, akamvwe kulila kwao kosenga thandizo nipo akaŵapulumuse.” Kulaŵila cendi, tili na shuko iweme ngako! Yehova, Nyamalenga wamphamvuyonse, ofuna kunkhala nase pafupi nipo ofuna kumvwishila ku mapemphelo ŵasu. Eee, pemphelo ni mphaso yapadela yawatipasa Yehova.

² Koma kuti Yehova amvwe mapemphelo ŵasu, tuwamila kupemphela m’njila yakuvomelezhya yove. Mwa tingacite tyani zamene izi? Tiyeni tione zayulaŵila Baibolo pa nkhani ya pemphelo.

3. Ndaŵa yanji tuwamila kupemphela kwa Yehova?

³ Yehova ofuna kuti mukolaŵila naye m’pemphelo. Kansi tuziŵa tyani zamene izi? Ŵelengani Afilipi 4:6, 7. Lingililani za wite wamene uyu. Wolamulila wa cilengedwe conse ali na cidwi ngako pali mweo nipo ofuna kuti mukomuuzhya mwamumvwila na nkhaŵa zanu.

4. Kansi kupemphela kwa Yehova nthawi zonse kungatang’ishe tyani ushamwali wanu na yove?

 ⁴ Pemphelo yutiyavya kunkhala pa ushamwali uweme na Yehova. Keno ŵanthu amene ali pa ushamwali ouzhyana malingililo ŵao na nkhaŵa zao nthawi zonse, ushamwali wao unkhala wotang’a. N’cimozi-mozi na pemphelo kwa Yehova. Kupitila m’Baibolo, yove okuuzhyani malingililo ŵake na mwakumvwila nipo okuuzhyani zati acite kusogolo. Mungamuuzhye mwamumvwila mu mtima mwanu mwa kulaŵila naye mu pemphelo nthawi zonse. Pamucita zamene izi, ushamwali wanu na Yehova ukule.—Yakobo 4:8.

5. Mwa tuziŵa tyani kuti Yehova omvwishila lini mapemphelo onse?

⁵ Mwa Yehova omvwishila mapemphelo onse? Yai. M’nthawi ya mneneli Yesaya, Yehova euzhya Aisiraeli kuti: “Nangu kuti mutwale mapemphelo anyinji, neo numvwishila lini. Manja ŵanu azula na milopa yamwakhesa.”  (Yesaya 1:15) Tetyo keno tusamala lini, tingacite zinthu zingacitishe kuti tinkhale patali na Yehova nipo angamvwe lini mapemphelo ŵasu.

6. Ndaŵa yanji cikhulupililo n’cofunika ngako? Mwa mungaoneshe tyani kuti muli na cikhulupililo?

⁶ Keno tufuna kuti Yehova amvwishile mapemphelo ŵasu, tuwamila kunkhala na cikhulupililo muli yove. (Maliko 11:24) Mtumwi Paulo elaŵila kuti: “Paliye cikhulupililo n’zosakwanishika kutemwesha Mulungu. Pakuti aliyense wofwika kwa Mulungu owamila kukhulupilila kuti yove aliko cendi, na kuti otwala mphoto kwa ŵanthu omusakila-sakila na mtima wonse.” (Aheberi 11:6) Koma kulaŵila tyala kuti tili na cikhulupililo n’kosakwanila. Tuwamila kuonesha cikhulupililo casu mwa kumvwila Yehova nsiku zonse.—Ŵelengani Yakobo 2:26.

7. (a) Ndaŵa yanji tuwamila kunkhala olicefya koma soti aulemu popemphela kwa Yehova? (b) Mwa tingaoneshe tyani kuti nise oona mtima popemphela?

⁷ Tuwamila kunkhala olicefya koma soti aulemu popemphela kwa Yehova. Ndaŵanji? Keno tapasiwa shuko yolaŵila na mfumu olo pulezidenti, tingacite zamene izi mwaulemu. Pofwana kuti Yehova ni Mulungu Wamphamvuyonse, mwa tuwamila lini kuonesha ulemu nonkhala olicefya polaŵila naye? (Genesis 17:1; Salimo 138:6) Popemphela kwa Yehova tuwamila soti kulaŵila naye mofumila pansi pa mtima, osati tyala kungowelezhya malizu ŵamo na ŵamo.—Mateyu 6:7, 8.

8. Tikasenga cinthu ciyakine, mwa tuwamila kucita cinji ciyakine?

⁸ Cosilizhyila, keno tapemphela pa cinthu ciyakine, tuwamila kuyesa-yesa kucita zinthu mokatizhyana na pemphelo yasu. Mwacisanzo, keno tusenga kuti Yehova atipase zinthu zatufunikila pa umoyo wasu, tuwamila lini kunkhala aulesi noyembekezela kuti Yehova atipase zilizonse, pamene tingakwanishe kuseŵenza nozipeza. Tuwamila  kukata nchito na mphamvu nonkhala okonzeka kukata nchito iliyonse ingapezeke. (Mateyu 6:11; 2 Atesalonika 3:10) Tikasenga kuti Yehova atiyavye kuleka kucita vinthu viipa, tuwamila kulewa ŵanthu na malo angatiike pa ciyeso. (Akolose 3:5) Tiyeni lomba tione makonsho ayakine okhuza pemphelo.

9. Ko tuwamila kupemphela kwa ŵani? Kansi lembo ya Yohane 14:6 yutiphunzisa cinji pa nkhani ya pemphelo?

⁹ Ko tuwamila kupemphela kwa ŵani? Yesu ephunzisa ophunzila ŵake kupemphela kwa “Ausuwasu akululu.” (Mateyu 6:9) Elaŵila soti kuti: “Neo nine njila, cendi na moyo. Paliye ofwika kwa Atata osapitila muli neo.” (Yohane 14:6) Tetyo tuwamila kupemphela tyala kuli Yehova kupitila muli Yesu. Kansi kupemphela kupitila muli Yesu kutanthauza cinji? Kuti Yehova avomelezhye mapemphelo ŵasu, tuwamila kuonesha ulemu pa udindo wapadela wamene Yehova epasa Yesu. N’nga ni mwetephunzilila, Yesu ewela pacalo kuti atipulumuse ku ucimo na imfwa. (Yohane 3:16; Aroma 5:12) Yehova esankha soti Yesu kunkhala Mkulu wa Ansembe na Woweluza.—Yohane 5:22; Aheberi 6:20.

10. Mwa pali kankhalidwe kapadela kofunikila popemphela? Fotokozani.

¹⁰ Mwa pali kankhalidwe kapadela kofunikila popemphela? Yai, Yehova otiuzhya lini kugwada, kunkhala olo kupanama popemphela. Baibolo yutiphunzisa kuti tingalaŵile na Yehova m’njila zosiyana-siyana. (1 Mbiri 17:16; Nehemiya 8:6; Danieli 6:10; Maliko 11:25) Cinthu cofunika ngako kwa Yehova popemphela ni zili mu mtima mwasu, osati kapanamidwe na kankhalidwe. Tingapemphele mokuwa olo camumtima kulikonse kwatingankhale na pa nthawi iliyonse mzuŵa olo usiku. Tikapemphela kwa  Yehova, tingakhulupilile kuti atimvwe nangu kuti paliye munthu aliyense otimvwa.—Nehemiya 2:1-6.

11. Kansi ni nkhani ziyakine zotyani zatingalaŵile na Yehova m’mapemphelo ŵasu?

¹¹ Mwa ni nkhani zanji zatingaike m’mapemphelo? Tingasenge ciliconse covomelezhyeka kwa Yehova. Baibolo yulaŵila kuti: “Ciliconse catingamusenge mokatizhyana na cifunilo cake, otimvwa.” (1 Yohane 5:14) Mwa tingasenge zinthu zatufunikila pa umoyo wasu? Eee. Kupemphela kwa Yehova kuwamila kunkhala n’nga tulaŵila na shamwali wasu wa pamtima. Tingamuuzhye Yehova zilizonse zili m’malingililo na mumtima mwasu. (Salimo 62:8) Tingasenge kuti atipase mzimu utuŵa kuti utiyavye kucita zinthu zoyenela. (Luka 11:13) Tingasenge soti Yehova kuti atipase nzelu kuti tipange zosankha zanzelu, nipo tingasenge kuti atipase mphamvu kuti tipilile mavuto. (Yakobo 1:5) Tuwamila kusenga Yehova kuti atikhululukile macimo ŵasu. (Aefeso 1:3, 7) Tuwamila soti kuika ayakine m’mapemphelo ŵasu, kuyangizhyilapo abanja ŵasu koma soti akwasu na azilongosi mu mpingo.—Machitidwe 12:5; Akolose 4:12.

12. Kansi ni nkhani zofunika ngako zotyani zatingaike m’mapemphelo ŵasu?

¹² Kansi ni nkhani zofunika ngako zotyani zatingaike m’mapemphelo ŵasu? Ni nkhani zokhuza Yehova na cifunilo cake. Tuwamila kumuyamikila kufumila pansi pa mtima pa zilizonse zawaticitila. (1 Mbiri 29:10-13) Tuziŵa izi cifukwa cakuti Yesu peenze pacalo, ephunzisa ophunzila ŵake mopemphelela. (Ŵelengani Mateyu 6:9-13.) Yove elaŵila kuti coyamba owamila kupemphela kuti zina ya Mulungu ituŵishiwe, kutanthauza kuti owamila kuiona kunkhala yopatulika keno kuti ituŵa. Cokonkhapo, Yesu elaŵila kuti tuwamila kupemphela kuti Ufumu wa Mulungu uwele na kuti cifunilo ca Yehova cicitike pacalo. Pavuli  potomola nkhani zofunika ngako zatingaike m’mapemphelo ŵasu, Yesu elaŵila kuti niye patingasenge zinthu zatufunikila pa umoyo wasu. Keno tuika Yehova na cifunilo cake pa malo oyamba m’mapemphelo ŵasu, tuonesha kuti zinthu zofunika ngako kuli seo ni zotyani.

13. Kansi mapemphelo ŵasu owamila kunkhala atali tyani?

¹³ Kansi mapemphelo ŵasu owamila kunkhala atali tyani? Baibolo yutiuzhya lini kuti mapemphelo owamila  kunkhala atali tyani. Mapemphelo ŵasu angaŵe afupi olo atali kulingana na zocitika. Mwacisanzo, payakine tingatwale pemphelo ifupi tikaliyeyamba kulya koma tingatwale pemphelo itali keno tutamanda Yehova olo patumuuzhya nkhaŵa zasu. (1 Samueli 1:12, 15) Tufuna lini kutwala mapemphelo atali pofuna tyala kusangalasha ŵanthu n’nga ni mwenzocitila ŵanthu ayakine m’nthawi ya Yesu. (Luka 20:46, 47) Yehova otemwa lini na mapemphelo oteti. Cinthu cofunikila kwa Yehova ni kupemphela kufumila pansi pa mtima.

14. Kansi tuwamila kupemphela kangani pa siku, nipo zamene izi zutiphunzisa cinji za Yehova?

¹⁴ Mwa tuwamila kupemphela kangani pa siku? Yehova otiuzhya kuti tuwamila kulaŵila naye nthawi zonse. Baibolo yulaŵila kuti tuwamila ‘kupemphela mosalekezhya’  na ‘kulimbikila kupemphela.’ (Mateyu 26:41; Aroma 12:12; 1 Atesalonika 5:17) Yehova ni wokonzeka kumvwishila ku mapemphelo ŵasu nthawi zonse. Tingamuyamikile siku iliyonse pa cikondi cake na wanzi wake. Nipo tuwamila kumusenga kuti akotitangulila, akotilimbikisha na kutitonthoza. Keno tuyamikila shuko yatili nayo yolaŵila na Yehova m’pemphelo, tikoseŵenzesha mpata uliwonse kulaŵila naye.

15. Ndaŵa yanji tuwamila kulaŵila kuti “ame” pavuli pa pemphelo?

¹⁵ Ndaŵa yanji tuwamila kulaŵila kuti “ame” posilizhyila pa pemphelo? Lizu yakuti “ame” yutanthauza kuti “n’cendi” olo kuti “zinkhale tetyo.” Ni njila yooneshela kuti zatalaŵila mu pemphelo zafumila pansi pa mtima. (Salimo 41:13) Baibolo yutiphunzisa kuti ni cinthu ciweme kulaŵila kuti “ame,” mu mtima olo mokuwa, pavuli pa pemphelo ya pagulu kuti tioneshe kuti takatizhyana nazo zalaŵiliwa.—1 Mbiri 16:36; 1 Akorinto 14:16.

16. Kansi Yehova oyankha cendi mapemphelo ŵasu? Fotokozani.

¹⁶ Kansi Yehova oyankha cendi mapemphelo ŵasu? Eee, oyankha. Baibolo yumuita kuti “Wakumvwa pemphelo.” (Salimo 65:2) Yehova okumvwa noyankha mapemphelo ofumila pansi pa mtima ya ŵanthu mamiliyoni nipo ocita zamene izi m’njila zosiyana-siyana.

17. Mwa Yehova oseŵenzesha tyani angelo na atumiki ŵake pacalo kuti ayankhe mapemphelo ŵasu?

¹⁷ Yehova oseŵenzesha angelo na atumiki ŵake pacalo kuti ayankhe mapemphelo ŵasu. (Aheberi 1:13, 14) Pali visanzo vinyinji va ŵanthu epemphela kuti ayavyiwe kuimvwisha Baibolo nipo nthawi itontho pavuli pake wa Mboni za Yehova eŵafwikila. Baibolo yuonesha kuti angelo otangulila pa nchito yolalikila “uthenga uweme” pacalo conse. (Ŵelengani Chivumbulutso 14:6.) Koma soti,  anyinji a seo tapemphela kwa Yehova kuti atiyavye pa vuto iyakine nipo teyavyiwa na mkwasu olo kalongosi Wacikhilisitu.—Miyambo 12:25; Yakobo 2:16.

18. Kansi Yehova oseŵenzesha tyani mzimu wake utuŵa na Baibolo kuyankha mapemphelo ŵasu?

¹⁸ Yehova oseŵenzesha mzimu wake utuŵa kuyankha mapemphelo ŵasu. Keno tasenga kuti atiyavye kulimbana na mavuto, angaseŵenzeshe mzimu wake kutipasa malangizo na mphamvu. (2 Akorinto 4:7) Yehova oseŵenzesha soti Baibolo kuyankha mapemphelo ŵasu notiyavya kupanga zosankha zanzelu. Poŵelenga Baibolo, tingafwange malembo amene angatiyavye. Yehova angalimbikishe soti munthu muyakine pa misonkhano kulaŵila mfundo yoyavya pa vuto yasu olo mkulu wa mu mpingo angatifotokozele mfundo ya m’Baibolo.—Agalatiya 6:1.

19. Ndaŵa yanji zingaoneke n’nga Yehova ocelwa kuyankha mapemphelo ŵasu?

¹⁹ Koma nthawi ziyakine tingakonshe kuti, ‘Ndaŵa yanji Yehova ocelwa kuyankha mapemphelo ŵangu?’ Kumbukilani kuti yove oziŵa nthawi na njila yoyankhilamo mapemphelo ŵasu. Yove oziŵa zatufunikila. Nthawi ziyakine tingafunike kupitilizhya kupemphela kwa kanthawi kuti tioneshe kuti tufunishisha cendi zinthu zatupempha na kuti tioneshe kuti tumukhulupilila cendi. (Luka 11:5-10) Nthawi ziyakine Yehova oyankha mapemphelo ŵasu m’njila yatisayembekezela. Mwacisanzo, tingasenge pa vuto iyakine, koma m’malo mosilizhya vuto yamene iyo, angatipase mphamvu kuti tipilile.—Ŵelengani Afilipi 4:13.

20. Ndaŵa yanji tuwamila kupemphela kwa Yehova nthawi zonse?

²⁰ Kulaŵila cendi, tili na shuko ikulu yolaŵila na Yehova m’pemphelo! Tingaŵe osimikizhyila kuti yove akumvwa mapemphelo ŵasu. (Salimo 145:18) Tikapitilizhya kupemphela kwa Yehova nthawi zonse mofumila pansi pa mtima, ushamwali wasu na yove unkhala wotang’a.