1, 2. Kansi ayakine mwa ashamwali a Yehova enze ŵani?

MWA mungasankhe munthu wotyani kunkhala muyanu? Mungafune munthu wamulingana naye malingililo, zocita na zamukonda. Mungakonde munthu ali na minkhalidwe iweme, n’nga kuwama mtima.

² Yehova Mulungu osankha ŵanthu ayakine kunkhala ashamwali ŵake. Mwacisanzo, Abulahamu enze yumo mwa ashamwali a Yehova. (Yesaya 41:8; Yakobo 2:23) Davide enze soti shamwali wa Yehova. Mulungu elaŵila kuti Davide enze ‘munthu wapamtima pake.’ (Machitidwe 13:22) Nipo mneneli Danieli enze “munthu wokondeka ngako” kwa Yehova.—Danieli 9:23.

3. Ndaŵa yanji Abulahamu, Davide, na Danieli enze ashamwali a Yehova?

³ Ko Abulahamu, Davide na Danieli enkhala tyani ashamwali a Yehova? Yehova euzhya Abulahamu kuti: “Wamvwila malizu ŵangu.” (Genesis 22:18) Yehova onkhala shamwali wa ŵala omumvwila molicefya. Nangu mtundu wa ŵanthu wenze na shuko yonkhala pa ushamwali na yove. Yehova euzhya mtundu wa Aisiraeli kuti: “Mukomvwila malizu ŵangu, nipo ninkhale Mulungu wanu, mweo munkhale ŵanthu ŵangu.” (Yeremiya 7:23) Keno mumvwila Yehova namwe munkhale shamwali wake.

4, 5. Ko Yehova oteteza tyani ashamwali ŵake?

⁴ Baibolo yulaŵila kuti Yehova osakila njila “kuti aoneshe  mphamvu zake kuli ŵanthu amene mtima wao ni wamphumbulu kuli yove.” (2 Mbiri 16:9) Pa lembo ya Salimo 32:8, Yehova olonjeza ashamwali ŵake kuti: “Nikupase nzelu nokulangiza njila yakuti uyendemo. Nikupase malangizo nokuyanganila.”

⁵ Pali mlwani wamphamvu wamene ofuna kutitaisha ushamwali wasu na Mulungu. Koma Yehova ofuna kutiteteza. (Ŵelengani Salimo 55:22.) N’nga ashamwali a Yehova, tumutumikila na mtima wasu wonse. Tunkhala okhulupilika kwa yove nangu kuti tikumane na mavuto. Nipo tili na cidalilo n’nga ni cenze naco wamasalimo. Polaŵila za Yehova elemba kuti: “Pofwana kuti ali kukwanja kwangu kwendi, nigwendezeke lini.” (Salimo 16:8; 63:8) Mwa Satana oyesa tyani kutitaisha ushamwali wasu na Mulungu?

6. Kansi Satana elaŵila cinji zokhuza ŵanthu?

⁶ M’Mutu 11 tephunzila kuti Satana esusha Yehova nipo elaŵila kuti ni wawenye koma soti aliye cilungamo cifukwa cosalola Adamu na Eva kulisankhila ciweme na ciipa. Buku ya m’Baibolo ya Yobu yutiuzhya kuti Satana olaŵila kuti ashamwali a Mulungu omutumikila cifukwa cadyela, osati cifukwa comukonda. Satana olaŵila soti kuti angafumye aliyense ku mbali ya Mulungu. Tiyeni tione zatingaphunzile kuli Yobu na mwecimutetezela Yehova.

7, 8. (a) Kansi Yehova enzomuona tyani Yobu? (b) Mwa Satana elaŵila cinji zokhuza Yobu?

⁷ Ko Yobu enze ŵani? Yobu enze munthu muweme wamene enkhalako vyaka pafupi-fupi 3,600 vapita. Yehova elaŵila kuti pa nthawi yamene iyo penzeve munthu enze n’nga ni Yobu pacalo. Yobu enzolemekeza ngako Mulungu nipo enzozonda vinthu viipa. (Yobu 1:8) Kulaŵila cendi, Yobu enze shamwali wapamtima wa Yehova.

 ⁸ Satana elaŵila kuti Yobu enzotumikila Mulungu na cifukwa cadyela. Satana euzhya Yehova kuti: “Kansi mweo muliyemutetezele [olo, kumumangila mpanda] yove? Mwateteza soti ng’anda yake na ciliconse caali naco. Mwadalisa nchito ya manja ŵake nipo viŵeto vake vapaka ngako pacalo. Koma lomba tambululani kwanja yanu nokhuza zonse zaali nazo, nipo muone, akutukwaneni m’menso muli gwa!”—Yobu 1:10, 11.

9. Ko Yehova elola Satana kuti acite cinji?

⁹ Satana elaŵila kuti Yobu otumikila Yehova tyala cifukwa cadyela. Satana elaŵila soti kuti angakwanishe kulekesha Yobu kutumikila Yehova. Yehova aliyokatizhyane naye Satana, koma Yove elola kuti Satana ayese Yobu kuti aone keno enzotumikila Yehova cifukwa comukonda.

10. Kansi Satana emuyesa tyani Yobu, nipo Yobu ecita cinji?

¹⁰ Coyamba, Satana eceneka viŵeto vonse va Yobu. Pavuli pake Satana epaya anchito anyinji a Yobu. Zonse zeenze nazo Yobu zecenekewa. Posilizhyila pake, Satana epaya ŵana 10 a Yobu na cimphepo camkuntho. Koma Yobu enkhala wokhulupilika kwa Yehova. “M’zonse izi Yobu aliyocimwe, keno kulaŵila kuti Mulungu wacita zosayenela.”—Yobu 1:12-19, 22.

11. (a) Mwa ni cinji ciyakine cecicita Satana kwa Yobu? (b) Kansi Yobu ecita cinji?

¹¹ Satana aliyolekele pamene apo. Esusha Mulungu mwa kulaŵila kuti: “Khuzani mnyomfu wake mpaka fupa yake, nipo muone, akutukwaneni m’menso muli gwa!” Tetyo Satana eleta nthenda yoŵaŵa pa muŵili wa Yobu. (Yobu 2:5, 7) Yobu epitilizhya kunkhala wokhulupilika kwa Yehova. Yove elaŵila kuti: “Mpaka neo kufwa, nisiye lini kunkhala na mtima wosayaŵanika.”—Yobu 27:5.

12. Kansi Yobu eonesha tyani kuti Satana ni wawenye?

 ¹² Yobu aliyoziŵe zenzoneneza Satana olo cifukwa cake enzovutika. Yove elingilila kuti Yehova niye enzocitisha mavuto yake. (Yobu 6:4; 16:11-14) Nangu n’tetyo, Yobu epitilizhya kunkhala wokhulupilika kwa Yehova. Kukhulupilika kwa Yobu kweonesha kuti enzotumikila Mulungu cifukwa comukonda osati cifukwa cadyela. Zecilaŵila Satana zeoneka kuti zenze zawenye.

13. Kansi ni cinji cefumapo cifukwa ca kukhulupilika kwa Yobu?

¹³ Nangu kuti Yobu enzoziŵa lini zenzocitika kululu, enkhala wokhulupilika kwa Mulungu nipo eonesha kuti Satana ni muipa. Yehova edalisa Yobu cifukwa conkhala wokhulupilika.—Yobu 42:12-17.

14, 15. Kansi Satana olaŵila cinji zokhuza ŵanthu onse?

¹⁴ Mungaphunzilepo zinthu zofunika ngako pali zecitikila Yobu. Nangu masiku ŵano, Satana olaŵila kuti tutumikila Yehova cifukwa cadyela. Pa lembo ya Yobu 2:4, Satana elaŵila kuti: “Munthu angalole kutwala cinthu ciliconse caali naco kuti apulumuse moyo wake.” Tetyo Satana olaŵila kuti ŵanthu onse, analume na anakazi, osati Yobu yeka, otumikila Mulungu cifukwa cadyela. Vyaka mahandiledi pavuli pakuti Yobu wafwa, Satana enze akalunyoza Yehova na kususha atumiki ŵake. Mwacisanzo, pa lembo ya Miyambo 27:11, tuŵelenga kuti: “Mwana wangu, nkhala wanzelu notemwesha mtima wangu, kuti nimuyankhe onitonzhya [olo, oninyoza].”

¹⁵ Mungasankhe kumvwila Yehova nonkhala shamwali wake wokhulupilika kuti muoneshe kuti Satana ni wawenye. Nangu kuti muwamila kucinja mbali ziyakine za umoyo wanu kuti munkhale shamwali wa Mulungu, ico ni cosankha ciweme ngako kupambana cosankha ciliconse camungapange. Cosankha camene ico ni nkhani yofunika  ngako. Satana olaŵila kuti mweo mungankhale lini okhulupilika kwa Mulungu keno mwakumana na mavuto. Oyesa kutinyengelela kuti tisankhale okhulupilika kwa Mulungu. Mwa ocita tyani zamene izo?

16. (a) Kansi ni njila zotyani zakuseŵenzesha Satana poyesa kutilekesha kutumikila Yehova? (b) Ko Maleŵanya angayese tyani kukulekeshani mweo pamweka kutumikila Yehova?

¹⁶ Satana oseŵenzesha njila zosiyana-siyana poyesa kutitaisha ushamwali wasu na Mulungu. Yove otiukila “n’nga ni nkhalamu youluma, yofunishisha kuti imele muyakine.” (1 Petulo 5:8) Osadabwa keno ayanu, abanja ŵanu olo ŵanthu ayakine oyesa kukulekeshani kuphunzila Baibolo nocita zinthu ziweme. Mungamvwe n’nga okuukilani. * (Yohane 15:19, 20) Satana ozisandusha soti kunkhala n’nga ni “mngelo wa kuwala.” Tetyo angayese kutinyengelela mocenjela kuti tisamvwile Yehova. (2 Akorinto 11:14) Njila iyakine yakuseŵenzesha Satana poyesa kutilekesha kutumikila Yehova ni mwakuticitisha kulingilila kuti nise atyala-tyala m’menso mwa Mulungu.—Miyambo 24:10.

17. Ndaŵanji tuwamila kumvwila Yehova?

¹⁷ Keno tumvwila Yehova, tuonesha kuti Satana ni wawenye. Kansi ni cinji cingatiyavye kunkhala omvwila? Baibolo yulaŵila kuti: “Ukokonda Yehova Mulungu wako na mtima wako wonse, moyo wako wonse, na mphamvu zako zonse.” (Deuteronomo 6:5) Tumvwila Yehova cifukwa cakuti tumukonda. Cikondi casu pa Yehova pacukula, tinkhale ofunishisha kumvwila malamulo ŵake onse. Mtumwi  Yohane elemba kuti: “Kukonda Mulungu kutanthauza kusunga malamulo ŵake, nipo malamulo ŵake ni osaŵeŵesha.”—1 Yohane 5:3.

18, 19. (a) Ko ni zinthu ziyakine zotyani zakutiuzhya Yehova kuti ni ziipa? (b) Mwa tuziŵa tyani kuti Yehova otisenga lini kucita vinthu vatingakwanishe lini kucita?

¹⁸ Ko ni zinthu zotyani zakutiuzhya Yehova kuti ni ziipa? Visanzo viyakine vili m’kabokosi kakuti “ Lewani Vinthu Vakuzonda Yehova.” Poyamba, mungalingilile kuti vinthu vamene ivi ni viipa lini ngako. Koma mukaŵelenga mavesi a m’Baibolo noŵasinkha-sinkha mosamala, muone kuwama komvwila malamulo a Yehova. Mungaone soti kuti muwamila kucinja mbali ziyakine pa umoyo wanu. Nangu kuti kucita izi kungankhale kovuta nthawi ziyakine, kucinja kucitishe kuti munkhale na mtendele koma soti cimwemwe camene cuwela cifukwa conkhala okhulupilika kwa Mulungu. (Yesaya 48:17, 18) Mwa tuziŵa tyani kuti zingakwanishike kucinja?

 ¹⁹ Yehova otisenga lini kucita vinthu vatingakwanishe lini kucita. (Deuteronomo 30:11-14) N’nga shamwali wasu ngaye-ngaye, yove otiziŵa luweme kupambana mwatuziziŵila seka. Yove oziŵa zatingakwanishe kucita na zatingakwanishe lini. (Salimo 103:14) Mtumwi Paulo etilimbikisha kuti: “Mulungu ni wokhulupilika, nipo alole lini kuti muyesewe kufwika pamungakwanishe lini kupilila, koma pamukumana na mayeselo amene aŵa yove atwale njila yopulumukila kuti mukwanishe kuŵapilila.” (1 Akorinto 10:13) Tingankhale na cidalilo cakuti nthawi zonse Yehova atipe mphamvu kuti tikwanishe kucita vinthu viweme. Yove akupeni “mphamvu yopambana yacivyalikilo” kuti ikuyavyeni kupilila mayeselo. (2 Akorinto 4:7) Pavuli poona mwecimuyavyila Yehova pa nthawi ya mayeselo, mtumwi Paulo elaŵila kuti: “Pa vinthu vonse, nupeza mphamvu kufumila kuli ula onipasa mphamvu.”—Afilipi 4:13.

20. Ko ni minkhalidwe yotyani yamuwamila kutolela, nipo ndaŵanji?

²⁰ Keno tufuna kunkhala shamwali wa Yehova, tuwamila kuleka kucita vinthu vakulaŵila Yehova kuti ni viipa. Koma pali soti ziyakine zatuwamila kucita. (Aroma 12:9) Ashamwali a Mulungu okonda zakukonda yove. Zinthu zakukonda Mulungu zafotokozewa pa lembo ya Salimo 15:1-5. (Ŵelengani.) Ashamwali a Yehova otolela minkhalidwe yake noonesha “cikondi, cimwemwe, mtendele, kuleza mtima, kuwama mtima, ubwino, cikhulupililo, kusisikanya, kulilesha.”—Agalatiya 5:22, 23.

21. Kansi mungaphunzile tyani kuonesha minkhalidwe yakukonda Mulungu?

²¹ Kansi mungaphunzile tyani kuonesha minkhalidwe iweme yamene iyi? Muwamila kuziŵa zinthu zakukonda Yehova mwa kuŵelenga nophunzila Baibolo nthawi zonse. (Yesaya 30:20, 21) Pamucita zamene izi, cikondi canu pa Yehova cikule nipo cikondi camene ici pacukula, munkhale ofunishisha kumvwila malamulo ŵake.

22. Kansi pangankhale zofumapo zotyani keno mumvwila Yehova?

²² Zinthu zamungawamile kucinja pa umoyo wanu zingalinganizhyiwe na kuvula vovwala vakale novwala valomba. Baibolo yulaŵila kuti muwamila “kuvula umunthu wakale” novwala “umunthu walomba.” (Akolose 3:9, 10) Nangu kuti kucita zamene izo kungankhale kovuta, keno tacinja nomvwila Yehova, yove otilonjeza kutipasa “madaliso anyinji.” (Salimo 19:11) Sankhani kumvwila Yehova noonesha kuti Satana ni wawenye. Tumikilani Yehova, osati cifukwa ca madaliso a kusogolo, koma cifukwa ca cikondi cosalikonda. Mukacita tetyo, munkhale shamwali wene-wene wa Mulungu!