1, 2. (a) Ni cinji cucitisha kuti mphaso inkhale yamtengo wapatali kuli mweo? (b) Ndaŵa yanji dipo ni mphaso yamtengo wapatali yofumila kwa Mulungu?

KO ni mphaso iweme yotyani yemwelondelapo? Kuti mphaso inkhale yamtengo yapatali cudalila lini kuti inkhale yodula. Keno mphaso yakusangalashani olo yakupani zamufunikila, munkhala otemwa nayo.

² Pa mphaso zonse zawatipa Mulungu, pali mphaso imo yatufunikila ngako. Ni mphaso ikulu ngako ku ŵanthu. M’mutu uno, tiphunzile kuti Yehova etuma Mwana wake, Yesu Khilisitu, kuti tikankhale na moyo kosasila. (Ŵelengani Mateyu 20:28) Mwa kutitumizhyila Yesu pacalo kuzotiwombola, Yehova waonesha kuti otikonda.

3. Ndaŵa yanji ŵanthu akufwa?

³ Dipo ni njila ya Yehova yomasulila ŵanthu ku ucimo na imfwa. (Aefeso 1:7) Kuti timvwishe cifukwa cake dipo yenze yofunika, tuwamila kuziŵa zecitika vyaka masauzande vapita m’munda wa Edeni. Avyazi ŵasu oyambilila, Adamu na Eva, ecimwa. Cifukwa cakuti ecimwa, ecifwa. Ŵana ŵao nao ecifwa cifukwa cakuti etolela ucimo kuli Adamu na Eva.—Onani Nkhani 9 ya Zakosilizhyila.

4. Mwa Adamu enze ŵani, nipo enze na umoyo wotyani?

⁴ Yehova pecilenga munthu woyambilila, Adamu, emupa cinthu camtengo wapatali ngako. Yove ecipa Adamu moyo wangwilyo. Enze na malingililo angwilyo na muŵili wangwilyo. Sembe enzolwala lini, sembe enzokulukazhya  lini nipo sembe aliyeufwe. Cifukwa cakuti Yehova niye elenga Adamu, Yove enze n’nga ausuwake. (Luka 3:38) Yehova enzolaŵila naye nthawi zonse. Mulungu emufotokozela momvwika luweme Adamu zenzowamila kucita nipo emupasa nchito yosangalasha.—Genesis 1:28-30; 2:16, 17.

5. Kansi malizu akuti Adamu elengewa “m’cifanizilo ca Mulungu” otanthauza cinji?

⁵ Adamu elengewa “m’cifanizilo ca Mulungu.” (Genesis 1:27) Yehova emupa minkhalidwe n’nga ni yake, yamene yoyangizhyilapo cikondi, nzelu, cilungamo, na mphamvu. Yove epasa Adamu ufulu wolisankhila zocita. Adamu aliyopangiwe n’nga ni makina yamene yokata tyala nchito imo. Mulungu emulenga m’njila yakuti akosankha yeka kucita ciweme olo ciipa. Kuti Adamu enze esankha kumvwila Mulungu, sembe enkhala na moyo kosasila m’Paladaiso.

6. Adamu pecikana kumvwila Mulungu, ko ni cinji cecitaya? Mwa zamene izi zutikhuza tyani?

⁶ Yove pecikana kumvwila Mulungu noweluziwa kuti akafwe, Adamu etaya cinthu camtengo wapatali. Etaya ushamwali wapadela weenze nao na Yehova, moyo wake wangwilyo na Paladaiso. (Genesis 3:17-19) Adamu na Eva esankha kusamvwila Mulungu, tetyo penzeve ciyembekezo ciliconse kuli ŵeve. Cifukwa ca vinthu vecicita Adamu, “ucimo weloŵa m’calo kupitila mwa munthu m’mozi, na imfwa kupitila mu ucimo, imfwa yamene iyo yeyambukila ŵanthu onse cifukwa cakuti onse ecimwa.” (Aroma 5:12) Adamu pecicimwa, “eligulisa” yeka pamo na seo ku ukapolo wa ucimo na imfwa. (Aroma 7:14) Ko paliko ciyembekezo ciliconse kuli seo? Eee cilipo.

7, 8. Ko dipo ni cinji?

⁷ Ko dipo ni cinji? Lingililo ya dipo yuyangizhyilapo  zinthu ziŵili. Coyamba, dipo ni malipilo yolipiliwa pomasula munthu keno kuwombola cinthu ciyakine. Caciŵili, dipo ni malipilo yolipilila cinthu cacenekewa.

⁸ Sembe paliye munthu ekwanisha kulipilila cinthu cikulu ngako cecitaya Adamu pecicimwa notiletela imfwa. Koma Yehova etwala njila kuti atimasule ku ucimo na imfwa. Tiyeni tiphunzile zinyinji zokhuza dipo na mwaingatipindulishile.

9. Mwa dipo yelipiliwa tyani?

⁹ Paliye aliyense wa seo angakwanise kulipila dipo ya moyo wangwilyo wecitaya Adamu. Ndaŵa yanji? Cifukwa cakuti tonse tiliye ungwilyo. (Salimo 49:7, 8) Dipo yamene yenzowamila kulipiliwa ni moyo soti wangwilyo n’nga ni wetaika. Niye cifukwa cake yuitiwa kuti “dipo yokwanila ndendende.” (1 Timoteyo 2:6)

10. Kansi Yehova etwala tyani dipo?

¹⁰ Kansi Yehova etwala tyani dipo? Yehova etumizhya Mwana wake wamtengo wapatali kuwela pacalo. Mwana wamene uyu, Yesu, enze wovyalika yeka. (1 Yohane 4:9, 10) Yesu enze wofunishisha kusiya Ausuwake na malo ŵake kululu. (Afilipi 2:7) Yehova efumya moyo wa mwana wake kufumila kululu kuwela pacalo, nipo Yesu evyalika n’nga munthu wangwilyo, aliye ucimo.—Luka 1:35.

11. Ko zekwanishika tyani kuti munthu umo akwanishe kuwombola ŵana onse ŵa Adamu?

¹¹ Munthu woyambilila, Adamu, etaya moyo wangwilyo wa ŵanthu onse pecipondokela Yehova. Ko munthu umo sembe ekwanisha kuwombola ŵana onse ŵa Adamu? Eee. (Ŵelengani Aroma 5:19.) Yesu, wamene aliyocimwepo, etwala moyo wake wangwilyo n’nga dipo.  (1 Akorinto 15:45) Moyo wake wangwilyo wekwanisha kuwombola ŵana onse ŵa Adamu.—1 Akorinto 15:21, 22.

12. Ndaŵa yanji Yesu evutika ngako?

¹² Baibolo yufotokoza zovuta zosiyana-siyana zecikumana nazo Yesu akaliyekufwa. Ekwapuliwa mwankhanza, epacikiwa pa cimuti conzunzikilapo, nipo ecifwa imfwa yoŵaŵa. (Yohane 19:1, 16-18, 30) Ndaŵa yanji Yesu evutika teti? N’cifukwa cakuti Satana elaŵila kuti paliye munthu angankhale wokhulupilika kwa Mulungu keno wakumana na mavuto akulu. Yesu eonesha kuti munthu wangwilyo angankhale wokhulupilika kwa Mulungu nangu kuti akumane na mavuto akulu. Lingililani tyala mwecimvwila Yehova peciona kukhulupilika kwa Yesu!—Miyambo 27:11; onani Nkhani 15 ya Zakosilizhyila.

13. Kansi dipo yelipiliwa tyani?

¹³ Kansi dipo yelipiliwa tyani? Yesu etwala kwa Awisi mtengo wa moyo wake. M’caka ca 33, pa Nisani 14 pa kalenda ya Ciyuda, Yehova elola kuti Yesu apaiwe na alwani ŵake. (Aheberi 10:10) Pavuli pa masiku atatu, Yehova eukisha Yesu na moyo wauzimu, osati waumunthu. Pavuli pa masiku atontho, Yesu ewelela kwa Awisi kululu nipo etwala mtengo wa moyo wake wangwilyo kwa Yehova n’nga dipo. (Aheberi 9:24) Cifukwa cakuti dipo yelipiliwa, tili na shuko yomasuliwa ku ukapolo wa ucimo na imfwa.—Ŵelengani Aroma 3:23, 24.

14, 15. Ko tuwamila kucita cinji kuti macimo ŵasu akhululukiwe?

¹⁴ Nangu pali lomba tupindula na mphaso ya Mulungu yamtengo wapatali yamene iyi. Tiyeni tione mwatupindulila lomba na mwati tikapindulile kusogolo.

 ¹⁵ Macimo ŵasu okhululukiwa. Kucita vinthu viweme nthawi zonse cunkhala covuta kuli seo. Tupumvya nipo nthawi ziyakine tulaŵila na kucita vinthu volakwika. (Akolose 1:13, 14) Ko tuwamila kucita cinji kuti tikhululukiwe? Tuwamila kulapa mofumila pansi pa mtima keno tacita vinthu viipa nipo tuwamila kusenga Yehova molicefya kuti atikhululukile. Tikacita tetyo tingankhale na cidalilo kuti macimo ŵasu akhululukiwa.—1 Yohane 1:8, 9.

16. Ko tuwamila kucita cinji kuti tinkhale na cikumbumtima ciweme?

¹⁶ Tingankhale na cikumbumtima ciweme. Keno cikumbumtima casu cutiuzhya kuti tacita vinthu viipa, tuzimvwa kunkhala ŵanthu atyala-tyala. Koma tuwamila lini kutaya mtima. Keno tasenga Yehova kuti atikhululukile, tuwamila kunkhala osimikizhyila kuti atimvwe nipo atikhululukile. (Aheberi 9:13, 14) Yehova ofuna kuti tikomuuzhya nkhaŵa zasu na zofooka zasu. (Aheberi 4:14-16) Tikacita tetyo, tinkhale pamtendele na Mulungu.

17. Mwa ni madaliso yotyani yati tikalondele cifukwa cakuti Yesu etifwela?

¹⁷ Tili na ciyembekezo conkhala na moyo wosasila. “Malipilo a ucimo ni imfwa, koma mphaso yakutwala Mulungu ni moyo wosasila kupitila mwa Khilisitu Yesu Asikulu wasu.” (Aroma 6:23) Cifukwa cakuti Yesu etifwela, tingankhale na moyo wosasila koma soti thanzi yangwilyo. (Chivumbulutso 21:3, 4) Koma kansi tuwamila kucita cinji kuti tikalondele madaliso amene aŵa?

18. Ko tuziŵa tyani kuti Yehova otikonda?

¹⁸ Lingililani mwamungamvwile keno muyanu wakupasani mphaso iweme ngako. Dipo ni mphaso yamtengo  wapatali kupambana mphaso zonse, nipo tuwamila kumuyamikila ngako Yehova cifukwa ca mphaso yamene iyi. Lembo ya Yohane 3:16 yutiuzhya kuti “Mulungu ekonda ngako calo mwakuti etwala Mwana wake wovyalika yeka.” Eee, Yehova otikonda cendi mwakuti etipa Mwana wake wamtengo wapatali, Yesu. Nipo tuziŵa kuti naye Yesu otikonda, cifukwa cakuti enze wofunishisha kutifwila. (Yohane 15:13) Mphaso ya dipo yuwamila kukusimikizhyilani kuti Yehova na Yesu okukondani cendi.—Agalatiya 2:20.

19, 20. (a) Mwa mungankhale tyani shamwali wa Yehova? (b) Kansi mungaoneshe tyani cikhulupililo mu nsembe ya dipo ya Yesu?

¹⁹ Pofwana kuti lomba mwaphunzila za cikondi cikulu ca Mulungu, kansi mungankhale tyani shamwali wake? Ni covuta kukonda munthu wamusaziŵa. Lembo ya Yohane 17:3 yulaŵila kuti tingamuziŵe Yehova. Pamucita izi, cikondi canu pa yove cikule, mufwike pofuna kucita zinthu zom’temwesha nipo munkhale shamwali wake. Tetyo pitilizhyani kuphunzila za Yehova mwa kuphunzila Baibolo.—1 Yohane 5:3.

²⁰ Oneshani cikhulupililo mu nsembe ya dipo. Baibolo yulaŵila kuti “uyo wokhulupilila mwa Mwana wamene uyu ali nao moyo wosasila.” (Yohane 3:36) Kansi kuonesha cikhulupililo kutanthauza cinji? Kutanthauza kucita zinthu zecitiphunzisa Yesu. (Yohane 13:15) Tingangolaŵila lini tyala kuti tukhulupilila Yesu. Kuti tioneshe cikhulupililo mu nsembe ya dipo, pali zatuwamila kucita na cikhulupililo casu. Pa lembo ya Yakobo 2:26, tuŵelenga kuti: “Cikhulupililo ciliye nchito zake ni cakufwa.”

21, 22. (a) Ndaŵa yanji tuwamila kupezekapo pa Cikumbukilo ca imfwa ya Khilisitu caka ciliconse? (b) Kansi tikalaŵizhyane cinji m’Mutu 6 na 7?

 ²¹ Mukopezeka pa Cikumbukilo ca imfwa ya Khilisitu. Usiku wakuti Yesu akuyopaiwa, etiphunzisa kuti tuwamila kucita cikumbukilo ca imfwa yake. Tucita zamene izi caka ciliconse nipo mwambo wamene uyu uitiwa kuti Cikumbukilo olo kuti “Cakulya Camcingulo ca Asikulu.” (1 Akorinto 11:20; Mateyu 26:26-28) Yesu ofuna kuti tikokumbukila kuti yove etwala moyo wake wangwilyo kutiwombola. Yove eciti: “Mukocita zamene izi ponikumbukila.” (Ŵelengani Luka 22:19.) Keno mwapezeka pa Cikumbukilo, muonesha kuti mukumbukila dipo na cikondi cikulu caali naco Yehova na Yesu pali seo.—Onani Nkhani 16 ya Zakosilizhyila.

²² Kulaŵila cendi, dipo ni mphaso yamtengo wapatali yatikaliyelondelapo. (2 Akorinto 9:14, 15) Mphaso yamtengo wapatali yamene iyi ikapindulishe soti ŵanthu mamiliyoni ecifwa. M’Mutu 6 na 7, tikalaŵizhyane mwati zikakwanishikile zamene izi.