1, 2. Mwa tingafwane kuni citetezo masiku ŵano?

LINGILILANI kuti muyenda mu mseu nipo kuli cimphepo camphamvu. Kululu kwacita mfinzi cifukwa ca mikumbi. Tuleza tuyamba kuceluka, nipo kumvwika kugunda, pavuli pake cimvula puu! Musakila-sakila malo akuti muloshe. Mukumvwa luweme kuti mwapeza malo aweme oloshamo.

² Nase tunkhala m’nthawi yolingana na ya cimphepo. Zinthu pacalo zuipila-ipila. Payakine mungakonshe kuti, ‘Ni kuni kwaningapeze citetezo?’ Wamasalimo elemba kuti: “Nikauzhye Yehova kuti: ‘Mweo nimwe poutukila pangu na malo ŵangu acitetezo, Mulungu wangu wanukhulupilila.’” (Salimo 91:2) Kulaŵila cendi, Yehova angatiyavye pa mavuto yatukumana nao lomba, nipo otipasa ciyembekezo ciweme ca kusogolo.

3. Kansi tingacite cinji kuti Yehova ankhale malo ŵasu acitetezo?

³ Ko Yehova angatiteteze tyani? Yove angatiyavye kupilila mavuto yatukumana nao, nipo yove ni wamphamvu ngako kupambana munthu aliyense amene angaticitile vinthu viipa. Nangu kuti cinthu ciipa citicitikile lomba, tingankhale osimikizhyila kuti Yehova akawamye soti zinthu kusogolo. Baibolo yutilimbikisha kuti: “Pitilizhyani kucita zinthu zingacitishe Mulungu kukukondani.” (Yuda 21) Tuwamila kupitilizhya kunkhala pafupi na Yehova kuti atiyavye tikakumana na mavuto. Mwa tingacite tyani zamene izi?

4, 5. Mwa Yehova waonesha tyani cikondi cake pali seo?

⁴ Kuti tipitilizhye kunkhala pafupi na Yehova, tufunikila kuziŵa mwawaoneshela cikondi cake kuli seo. Lingililani  zinthu zonse zawaticitila Yehova. Yove watipasa calo ciweme nipo watipasa vimiti na nyama zotemwesha. Watipasa soti vakulya viweme na manzi. Kupitila m’Baibolo, Yehova watiphunzisa za zina yake na minkhalidwe yake iweme. Kupambana zonse, etionesha cikondi cake pecitumizhya Mwana wake wokondeka, Yesu, pacalo kuzotifwela. (Yohane 3:16) Nipo cifukwa ca nsembe yamene iyo, tili na ciyembekezo ca moyo uweme kusogolo.

⁵ Yehova watipasa Ufumu Waumesiya, boma ya kululu yamene isilizhye mavuto onse lombapano. Ufumu ukapange calo kunkhala paladaiso, mwamene aliyense akankhale mwamtendele koma soti mwacimwemwe mpaka kale-kale. (Salimo 37:29) Njila iyakine yawationeshela cikondi Yehova ni mwakutiphunzisa mwatingankhalile na umoyo uweme pali lomba. Watiuzhya soti kuti tikopemphela kuli yove, nipo yove ni wokonzeka kumvwishila ku mapemphelo ŵasu. Yehova waonesha patuŵa cikondi cake pali aliyense wa seo.

6. Kansi mungaoneshe tyani kuti muyamikila cikondi ca Yehova?

⁶ Kansi mungaoneshe tyani kuti muyamikila cikondi ca Yehova? Oneshani kuyamikila pa zinthu zonse zawakucitilani. Ni zomvwisha cisoni kuti ŵanthu anyinji lomba ni osayamikila. Umu niye mwezenzele Yesu peenze pacalo. Pa nthawi iyakine, Yesu epolesha ŵanthu 10 a makhate, koma umo tyala niye ewela kuzom’yamikila. (Luka 17:12-17) Tuwamila kunkhala n’nga ni ula munthu ewelela kuzoyamikila Yesu. Tuwamila kumuyamikila Yehova nthawi zonse.

7. Kansi Yehova tuwamila kumukonda kufwika pani?

⁷ Tuwamila soti kuonesha cikondi casu pa Yehova. Yesu euzhya ophunzila ŵake kuti owamila kukonda Yehova na mtima wao wonse, moyo wao wonse, na malingililo ŵao onse. (Ŵelengani Mateyu 22:37.) Ko izi zutanthauza cinji?

8, 9. Ko tingamuoneshe tyani Yehova kuti tumukonda?

 ⁸ Mwa kulaŵila tyala kuti tukonda Yehova n’kokwanila? Yai. Keno tukonda Yehova na mtima wasu wonse, moyo wasu wonse, na malingililo ŵasu onse, tioneshe cikondi casu mwa zocita zasu. (Mateyu 7:16-20) Baibolo yutiphunzisa momvwika luweme kuti keno tukonda Mulungu, tikomvwila malamulo ŵake. Kansi kucita zamene izi n’kovuta? Yai, cifukwa cakuti ‘malamulo a Yehova ni osaŵeŵesha’.—Ŵelengani 1 Yohane 5:3.

⁹ Keno tumvwila Yehova, tunkhala na umoyo wotemwesha koma soti wokhutilisha. (Yesaya 48:17, 18) Koma kansi ni cinji cingatiyavye kupitilizhya kunkhala pafupi na Yehova? Tiyeni tione.

10. Ndaŵanji muwamila kupitilizhya kuphunzila za Yehova?

¹⁰ Kansi mwenkhala tyani shamwali wa Yehova? Kupitila m’kuphunzila kwanu Baibolo, mwefwika pomuziŵa luweme Yehova nipo mwekulisha ushamwali wanu na yove. Ushamwali wamene uyu uli n’nga ni mulilo wamuwamila kupitilizhya kusonkhela. N’nga ni mulilo wamene ufunikila nkhuni kuti upitilizhye kuyaka, muwamila kupitilizhya kuphunzila za Yehova kuti ushamwali wanu na yove upitilizhye kunkhala wotang’a.—Miyambo 2:1-5.

11. Kansi zinthu zamuphunzila m’Baibolo zingakhuze tyani mtima wanu?

¹¹ Pamupitilizhya kuphunzila Baibolo, muziŵe zinthu zati zikufwikeni pa mtima. Lingililani mwecimvwila ophunzila aŵili a Yesu penzoŵafotokozela maulosi a m’Baibolo. Ove elaŵila kuti: “Kansi si pala mitima yasu yenzotutumila penzolaŵila nase mumseu, notifotokozela malembo momvwika luweme?”—Luka 24:32.

12, 13. (a) Mwa n’cinji cingacitikile cikondi casu pa Mulungu? (b) Ko tingacite cinji kuti cikondi casu pa Yehova cisazime?

¹² N’nga ni mweyekhuziwila mitima ya ophunzila  pecimvwisha Malembo, payakine namwe mwenkhala otemwa pemweyamba kuimvwisha Baibolo. Izi zekuyavyani kuziŵa Yehova nomukonda. Muwamila lini kulola kuti cikondi camene ici cizime.—Mateyu 24:12.

¹³ Mukangonkhala shamwali wa Mulungu, muwamila kucita nthina kuti ushamwali wanu upitilizhye kunkhala wotang’a. Muwamila kupitilizhya kuphunzila za Mulungu na Yesu nosinkha-sinkha zamuphunzila noona mwamungazikatishile nchito pa umoyo wanu. (Yohane 17:3) Pamuŵelenga olo kuphunzila Baibolo, muwamila kulikonsha kuti: ‘Ko zamene izi zuniphunzisa cinji polaŵila za Yehova Mulungu? Ndaŵa yanji nuwamila kumukonda na mtima wangu wonse na moyo wangu wonse?’—1 Timoteyo 4:15.

14. Kansi pemphelo ingatiyavye tyani kuti ushamwali wasu na Yehova unkhale wotang’a?

¹⁴ Keno muli na muyanu wapamtima, mulaŵila naye nthawi zonse nipo izi zucitisha kuti ushamwali wanu upitilizhye  kunkhala wotang’a. Molingana na izi, keno tulaŵila na Yehova nthawi zonse m’pemphelo, cikondi casu pa yove cunkhala cotang’a. (Ŵelengani 1 Atesalonika 5:17.) Pemphelo ni mphaso iweme yofumila kuli Ausuwasu akululu. Tuwamila kulaŵila naye nsiku zonse mofumila pansi pa mtima. (Salimo 62:8) Tuwamila lini kutwala mapemphelo ocitoloŵeza, koma tuwamila kusenga zinthu zene-zene zatufuna. Keno tupitilizhya kuphunzila Baibolo nopemphela kufumila pansi pa mtima, ushamwali wasu na Yehova unkhale wotang’a.

15, 16. Mwa nchito youzhyako ayakine uthenga uweme ingakupindulisheni tyani?

¹⁵ Keno tufuna kupitilizhya kunkhala pafupi na Yehova, tuwamila soti kuuzhyako ayakine za cikhulupililo casu. Kuuzhyako ayakine za cikhulupililo casu ni shuko iweme ngako. (Luka 1:74) Ni udindo wapadela wamene Yesu epasa Akhilisitu onse acendi. Aliyense wa seo owamila kuuzhyako ayakine za uthenga uweme wa Ufumu wa Mulungu. Ko mweyamba kale kucita zamene izi?—Mateyu 24:14; 28:19, 20.

¹⁶ Mtumwi Paulo eona kuti kuuzhyako ayakine uthenga uweme ni cinthu camtengo wapatali; nipo elaŵila kuti ni “cuma” kuli yove. (2 Akorinto 4:7) Kuuzhyako ayakine za Yehova na colinga cake ni nchito iweme ngako yamungacite. Yehova oona nchito yamene iyi yom’tumikila kunkhala yofunika ngako. (Aheberi 6:10) Kuuzhyako ayakine uthenga uweme kungankhale kopindulisha kwa mweo na kwa ŵala omvwishila kuli mweo. Mukacita tetyo mweo na ŵala omvwishila kuli mweo muvwendele pafupi na Yehova koma soti mukalondele moyo wosasila. (Ŵelengani 1 Akorinto 15:58.) Ko pali nchito iyakine iliyonse yamene ingakukhutilisheni?

17. Ndaŵa yanji nchito yolalikila yuwamila kucitika kamangu?

 ¹⁷ Nchito yolalikila uthenga uweme yuwamila kucitika kamangu ngako. Tuwamila ‘kulalikila malizu,’ nipo tuwamila ‘kulalikila molitwala.’ (2 Timoteyo 4:2) Ŵanthu ofuna kuziŵa zinthu zokhuza Ufumu wa Mulungu. Baibolo yulaŵila kuti: “Siku ikulu ya Yehova ili pafupi. Ili pafupi nipo ikuza mofulumila ngako.” Masilizhyilo “acelwe lini.” (Zefaniya 1:14; Habakuku 2:3) Eee, lombapano Yehova akuzoceneka calo ciipa ca Satana. Izi zikaliyocitika, ŵanthu owamila kucenjezewa kuti asankhe kutumikila Yehova.

18. Ndaŵa yanji tuwamila kulambila Yehova pamo na Akhilisitu acendi?

¹⁸ Yehova ofuna kuti tikolambila pamo na Akhilisitu acendi. Baibolo yulaŵila kuti: “Tiyeni tilingililane kuti titang’ishane pa cikondi na nchito ziweme. Tisaleke kusonkhana pamo n’nga ni mwakucitila ayakine aciyoŵelezi cosafwika pa misonkhano. Koma tiyeni titang’ishane nipo tiyangizhyile kucita zamene izi, maka-maka pamuona kuti siku yamene iyo yavwendela pafupi.” (Aheberi 10:24, 25) Tuwamila kucita zilizonse zatingakwanishe kuti tikopezeka pa misonkhano yonse. Misonkhano yotipasa shuko iweme yolimbikishana notang’ishana.

19. Ko n’cinji cingakuyavyeni kukonda akwasu na azilongosi Acikhilisitu?

¹⁹ Keno mupezeka pa misonkhano, mufwane ayanu aweme amene angakuyavyeni kulambila Yehova. Mukumane na akwasu na azilongosi osiyana-siyana ali n’nga ni mweo, amene oyesa-yesa kucita zilizonse zaangakwanishe kuti alambile Yehova. Nao aliye ungwilyo n’nga ni mweo nipo opumvya. Keno akulakwilani, nkhalani okonzeka kuŵakhululukila. (Ŵelengani Akolose 3:13.) Nthawi zonse mukoona minkhalidwe iweme ya akwasu na azilongosi Acikhilisitu, kucita tetyo, kukuyavyeni kuŵakonda nipo muvwendele pafupi na Yehova.

20, 21. Kansi “moyo wene-wene” n’cinji?

²⁰ Yehova ofuna kuti ashamwali ŵake onse ankhale na umoyo uweme. Baibolo yuphunzisa kuti umoyo watili nao lomba ukankhale wosiyana na umoyo wati tikankhale nao kusogolo.

²¹ Tikankhale na moyo wosasila kusogolo osati kunkhala tyala vyaka 70 olo 80. Tikatemwe na “Moyo wosasila” na thanzi yangwilyo, mtendele, na cikondi m’paladaiso. Uyu niye wayulaŵila Baibolo kuti “moyo wene-wene.” Yehova olonjeza kutipasa moyo wene-wene, koma tuwamila kucita zilizonse zatingakwanishe lomba kuti ‘tiukate na mphamvu’ moyo wamene uyu.—1 Timoteyo 6:12, 19.

22. (a) Kansi ‘tingaukate tyani na mphamvu moyo wene-wene’? (b) Ndaŵa yanji tingaugule lini moyo wosasila?

²² Kansi ‘tingaukate tyani na mphamvu moyo wene-wene’? Tuwamila “kucita ziweme” koma soti ‘kunkhala olemela pa nchito ziweme.’ (1 Timoteyo 6:18) Izi zutanthauza kuti tuwamila kukatisha nchito zinthu zatuphunzila kufumila m’Baibolo. Koma moyo wene-wene udalila lini pa zoyesa-yesa zasu. Tingaugule lini moyo wosasila. Ni mphaso yatyala yamene Yehova opasa atumiki ŵake okhulupilika kunkhala cisanzo ca “kuwama mtima kwake kukulu.” (Aroma 5:15) Ausuwasu Akululu ni ofunishisha kupasa atumiki ŵake okhulupilika mphaso yamene iyi.

23. Ndaŵa yanji lomba muwamila kupanga zosankha zanzelu?

²³ Zikonsheni kuti, ‘Kansi nulambila Mulungu m’njila yovomelezhyeka?’ Keno mwaona kuti muwamila kucinja mbali ziyakine, muwamila kucita zamene izi lomba teti. Keno tudalila Yehova nocita zilizonse zatingakwanishe kumumvwila, Yehova ankhale malo ŵasu acitetezo. Yove oteteza atumiki ŵake okhulupilika m’masiku osilizhya a calo ca Satana. Pavuli pake Yehova akaonesheshe kuti tankhala na  moyo wosasila m’Paladaiso, n’nga ni mwecilonjezela. Eee, mungankhale na moyo wene-wene keno mupanga zosankha zanzelu lomba!