MUTU 01
Kansi Baibo Ingakuyavyeni Tyani?
Tonse tunkhala na makonsho okhuza umoyo, kuvutika, imfwa, na sogolo. Tunkhala soti na nkhaŵa yokhuza mwatingapezele zofunikila za pa umoyo na mwatingankhalile na banja yacimwemwe. Ŵanthu anyinji apeza kuti Baibo yuyankha makonsho ofunika ngako pa umoyo wao. Koma kuyangizhyila apo, Baibo yupeleka soti malangizo anzelu pa umoyo wa siku na siku. Kansi muona kuti Baibo ingakupindulisheni?
1. Kansi Baibo yuyankha makonsho otyani?
Baibo yuyankha makonsho ofunika ngako monga aya: Kansi moyo weyamba tyani? Kansi colinga ca moyo n’cinji? Ndaŵa yanji tuvutika? N’cinji cucitika munthu akafwa? Ndaŵa yanji pacalo pali nkhondo? N’cinji cati cicitike msogolo? Baibo yutilimbikisha kupeza mayankho pa makonsho aya ndipo anyinji apeza mayankho okhutilisha.
2. Kansi Baibo ingatiyavye tyani kuti tikosangalala na umoyo wasu?
Baibo yutipasa malangizo anzelu. Mwacisanzo, ili na malangizo amene angathandize mabanja kunkhala acimwemwe. Yutiuzhya zatingacite ngati tili na nkhaŵa na zatingacite kuti tikosangalala na nchito. Muphunzile zayuphunzisa Baibo pa nkhani izi na nkhani ziyakine zati tikambilane m’buku ino. Mwina muvomelezhye kuti “Malemba onse [kapena kuti mau onse ali m’Baibo] . . . ni opindulisha.”—2 Timoteyo 3:16.
Buku ino iliyoloŵe m’malo mwa Baibo. Koma ikuyavyeni kufufuza Baibo pamweka. Tetyo, tukulimbikishani kuti mukoŵelenga malemba onse ali m’mutu ulionse, ndipo mukolinganizhya malemba aya na zamuphunzila.
PHUNZILANI ZINYINJI
Fufuzani kuti muone mwamene Baibo yayavyila ŵanthu ayakine, zamungacite kuti mukosangalala poiŵelenga na cifukwa cake mufunika thandizo kuti muimvwishishe.
3. Baibo ingatisogolele
Baibo ili monga ni tochi yuyaka bwino. Ingatiyavye kupanga zosankha zanzelu na kuziŵa zati zicitike msogolo.
Ŵelengani Salimo 119:105, nokambilana makonsho aŵa:
-
Kansi elemba vesi iyi enzoiona tyani Baibo?
-
Nanga mweo, Baibo muiona tyani?
4. Baibo yutipasa mayankho pa makonsho yatingankhale nayo
Munakazi muyakine epeza mayankho m’Baibo pa makonsho yenzozikonsha kwa vyaka vinyinji. Onelelani VIDYO, nokambilana makonsho aŵa:
-
Kansi munakazi wataona mu vidyo iyi enze na makonsho otyani?
-
Kansi kuphunzila Baibo kwemuyavya tyani?
Baibo yutilimbikisha kukonsha makonsho. Ŵelengani Mateyu 7:7, nokambilana konsho iyi:
-
Kansi muli na makonsho otyani amene Baibo ingakuyavyeni kupeza mayankho?
5. Mungasangalale poŵelenga Baibo
Ŵanthu anyinji osangalala kuŵelenga Baibo ndipo opindula nayo. Onelelani VIDYO, nokambilana makonsho aŵa:
-
Kansi acilumbwana ŵataona mu vidyo iyi, enzoiona tyani nkhani yoŵelenga?
-
Olo kuti okonda lini zoŵelengaŵelenga, ndaŵa yanji osangalala kuŵelenga Baibo?
Baibo yutipasa malangizo amene otitonthoza notipasa ciyembekezo. Ŵelengani Aroma 15:4, nokambilana konsho iyi:
-
Kansi mucita cidwi na zayukamba Baibo zokhuza ciyembekezo na citonthozo?
6. Ayakine angatiyavye kumvwisha Baibo
Anyinji apeza kuti kukambilana Baibo na ayakine ni kothandiza ngako, kuyangizhyila pa kuiŵelenga paŵeka. Ŵelengani Machitidwe 8:26-31, nokambilana konsho iyi:
-
Tingacitenji kuti tikoimvwishisha Baibo?—Onani mavesi 30 na 31.
Munthu wa ku Itiyopiya enzofunika thandizo kuti amvwishe Malemba. Ŵanthu anyinji masiku ŵano apeza kuti kuphunzila Baibo na ŵanthu ayakine n’kothandiza ngako
ŴANTHU AYAKINE OKAMBA KUTI: “Kuŵelenga Baibo n’kutaya nthawi.”
-
Kansi mungayankhe tyani? Ndaŵa yanji?
MFUNDO ZACIDULE
Baibo ili na malangizo othandiza pa umoyo, yuyankha makonsho ofunika ngako, ndipo yupasa ŵanthu ciyembekezo na citonthozo.
Kuwelezhya mfundo zikulu-zikulu
-
Tingapeze malangizo otyani m’Baibo?
-
Kansi Baibo yuyankha makonsho otyani?
-
N’cinji camungakonde kuphunzila m’Baibo?
FUFUZANI
Baibo ili na malangizo othandiza masiku ŵano.
“Ziphunziso za m’Baibo N’zothandiza Nthawi Zonse” (Nsanja ya Mlonda Na. 1 2018)
Onani mwamene Baibo yeyavyila munalume muyakine wamene enzovutika maganizo kuyambila akali mwana.
Fufuzani malangizo a m’Baibo othandiza mabanja.
Onani mwamene Baibo yuongolela maganizo olakwika okhuza olamulila cino calo.
