MUTU 04
Kansi Mulungu ni Ŵani?
M’mbili yonse, ŵanthu ankhala olambila milungu yosiyanasiyana. Koma Baibo yukamba kuti pali Mulungu m’mozi, wamene ni “mkulu kupambana milungu iyakine yonse.” (2 Mbiri 2:5) Kansi Mulungu wamene uyu ni ŵani? Ndipo n’cinji cucitisha kuti ankhale mkulu kupambana milungu iyakine yonse yakulambila ŵanthu? M’mutu uno, tiphunzile zakufuna Mulungu kuti muziŵe zokhuza yove.
1. Kansi zina ya Mulungu ni ŵani? Nanga n’cinji cuonesha kuti ofuna kuti tiiziŵe?
Mulungu otiuzhya zokhuza yove kupitila m’Baibo. Otiuzhya kuti: “Nine Yehova. Iyi ndiye zina yangu.” (Ŵelengani Yesaya 42:5, 8.) M’Ciheberi, zina iyi eimasulila kuti “Yehova.” Yutanthauza kuti “Ocitisha Kunkhala.” Yehova ofuna kuti tiziŵe zina yake. (Ekisodo 3:15) Kansi tuziŵa tyani? M’Baibo, zina yake yupezeka nthawi zopitilila 7,000. a Zina yakuti Yehova, ni ya Mulungu “wacendi kululu na pacalo.”—Deuteronomo 4:39.
2. Kansi Baibo yutiuzhyanji zokhuza Yehova?
Baibo yukamba kuti, pa milungu yonse yakulambila ŵanthu, Yehova ndiye tyala Mulungu wacendi. Ndaŵa yanji? Pali vifukwa vinyinji. Yehova ni wolamulila mkulu. Ndiye cifukwa cake oitiwa kuti “Wapalulu Ngako, wolamulila calo conse.” (Ŵelengani Salimo 83:18.) Baibo yukamba kuti ni “wamphamvuzonse,” cifukwa ali na mphamvu zocita ciliconse cakufuna. Elenga “vinthu vonse” na moyo pacalo. (Chivumbulutso 4:8, 11) Mosiyana na aliyense, Yehova wankhala alipo nthawi zonse, ndipo ankhalepo mpaka kale-kale.—Salimo 90:2.
PHUNZILANI ZINYINJI
Fufuzani kuti muone kusiyana kulipo pakati pa zina yakuti Mulungu, na zina yake yeneyene yamene ni yapadela. Phunzilani cifukwa ceciululila zina yake na mweciiululila.
3. Mulungu ali na mazina anyinji audindo, koma zina yake yeneyene ni imozi
Kansi pali kusiyana pakati poseŵenzesha zina yaudindo na zina yeneyene? Onelelani VIDYO, nokambilana konsho iyi:
-
Kansi pali kusiyana kotyani pakati pa zina yaudindo, monga yakuti “asikulu,” na zina yeneyene?
Baibo yukamba kuti ŵanthu olambila milungu inyinji. Ŵelengani Salimo 136:1-3, nokambilana konsho iyi:
-
Kansi “Mulungu wa milungu” na “Asikulu wa asikulu” ni ŵani?
4. Yehova ofuna kuti muziŵe zina yake noiseŵenzesha
N’cinji cuonesha kuti Yehova ofuna kuti muziŵe zina yake? Onelelani VIDYO, nokambilana makonsho aŵa:
-
Kansi muona kuti Yehova ofuna kuti zina yake iziŵike? Ndaŵa yanji?
Yehova ofuna kuti ŵanthu akoseŵenzesha zina yake. Ŵelengani Aroma 10:13, nokambilana makonsho aŵa:
-
Kansi kuseŵenzesha zina ya Mulungu yakuti Yehova n’kofunika tyani?
-
Kansi mukumvwa tyani ngati munthu wakumbukila zina yanu nokuitani na zina yamene iyo?
-
Kansi muganiza kuti Yehova akumvwa tyani mukaseŵenzesha zina yake?
5. Yehova ofuna kuti munkhale shamwali wake
Munakazi muyakine wa ku Cambodia wa zina yakuti Soten, ekamba kuti kuziŵa zina ya Mulungu kwemuyavya kunkhala “wosangalala.” Onelelani VIDYO, nokambilana konsho iyi:
-
Mu vidyo yatatamba, kansi kuziŵa zina ya Mulungu kwemukhuza tyani Soten?
Mukaliyonkhala pa ushamwali na munthu muyakine, muyambila mwaziŵana mazina. Ŵelengani Yakobo 4:8a, nokambilana makonsho aŵa:
-
Kansi Yehova okusengani kuti mucitenji?
-
Kansi kuziŵa zina ya Mulungu noiseŵenzesha kungakuyavyeni tyani kunkhala naye pa ushamwali?
ŴANTHU AYAKINE OKAMBA KUTI: “Kuli tyala Mulungu m’mozi, ndipo mulimonse mwaungamuitile ziliye vuto.”
-
Kansi mukhulupilila kuti zina ya Mulungu ni Yehova?
-
Muona kuti ndaŵa yanji Mulungu ofuna kuti tikoseŵenzesha zina yake?
MFUNDO ZACIDULE
Yehova ni zina ya Mulungu tyala wacendi. Ofuna kuti zina iyi tiiziŵe, na kuti tikoiseŵenzesha kuti tinkhale naye pa ushamwali.
Kuwelezhya mfundo zikulu-zikulu
-
Kansi Yehova osiyana tyani na milungu iyakine yonse yakulambila ŵanthu?
-
Ndaŵa yanji tufunika kuseŵenzesha zina ya Mulungu?
-
N’cinji cuonesha kuti Yehova ofuna kuti tinkhale naye pa ushamwali?
FUFUZANI
Fufuzani maumboni 5 oonesha kuti Mulungu aliko.
Ganizilani cifukwa cake m’pomwika kuti Mulungu wankhala aliko nthawi zonse.
“Ni Ŵani Epanga Mulungu?” (Nsanja ya Olonda, August 1, 2014)
Olo kuti tuziŵa lini mweenzotomolela zina ya Mulungu m’cilaŵilo coyambilila, ndaŵa yanji tufunika kuiseŵenzesha.
“Kansi Yehova ni ŵani?” (Nkhani yupezeka tyala pa webusaiti)
Kansi pali vuto kuita Mulungu na zina iliyonse? Onani cifukwa cake tunena kuti ali tyala na zina imozi.
“Kansi Mulungu Ali na Mazina Angani?” (Nkhani yupezeka tyala pa webusaiti)
a Kuti muziŵe zinyinji zokhuza tanthauzo ya zina ya Mulungu na cifukwa cake omasulila anyinji aicosamo m’Baibo, onani Appendix A4 mu Baibulo la Dziko Latsopano la Malemba Opatulika ya m’Cizungu.
