Yehova ofuna kuti mum’ziŵe bwino. Ndaŵa yanji? Oziŵa kuti mungankhale naye pa ushamwali mukaziŵa zinyinji zokhuza minkhalidwe yake, mwaakucitila zinthu na ŵanthu, na colinga cake. Kansi mukhulupilila kuti mungankhale pa ushamwali na Mulungu? (Ŵelengani Salimo 25:14.) Mungacitenji kuti munkhale naye pa ushamwali? Baibo yuyankha makonsho aŵa, ndipo yutiyavya kuziŵa kuti kunkhala pa ushamwali na Yehova n’cinthu cofunika ngako.

1. Kansi Yehova okusengani kuti mucitenji?

“Vwendelani pafupi na Mulungu, ndipo naye avwendele pafupi na mweo.” (Yakobo 4:8) Kansi izi zutanthauzanji? Zutanthauza kuti Yehova ofuna kuti munkhale shamwali wake. Ayakine oona kuti n’covuta kunkhala pa ushamwali na Mulungu cifukwa omuona lini. Koma kupitila m’Mau ŵake, Baibo, Yehova otiuzhya zilizonse zatufunikila kuziŵa zokhuza minkhalidwe yake kuti tinkhale naye pa ushamwali. Tikaŵelenga uthenga wa Mulungu uli m’Baibo, ushamwali wasu na Yehova ukula olo kuti tikaliyomuonapo.

2. Ndaŵa yanji Yehova angankhale muyanu wabwino ngako?

Yehova okukondani ngako kupambana mwaangakukondeleni munthu aliyense. Ofuna kuti mukonkhala osangalala na kuti mukopemphela kuli yove nthawi iliyonse mukafuna thandizo. “Mungamutulile nkhaŵa zanu zonse cifukwa okudelani nkhaŵa.” (1 Petulo 5:7) Nthawi zonse, Yehova ni wokonzeka kucilikiza, kutonthoza na kumvwishila kuli ashamwali ŵake.—Ŵelengani Salimo 94:18, 19.

3. Kansi Yehova ofuna kuti ashamwali ŵake akocitanji?

N’cendi kuti Yehova okonda ŵanthu onse, “koma okonda ngako ŵala amene ni oongoka mtima.” (Miyambo 3:32) Yehova ofuna kuti ashamwali ŵake akocita vinthu vamene yove oona kuti ni vabwino nopewa kucita vinthu vamene yove oona kuti ni viipa. Ŵanthu ayakine oona kuti angakwanishe lini kukonkha malamulo onse a Yehova. Koma Yehova ni Mulungu wacifundo. Olandila munthu aliyense wamene omukonda cendi nocita zilizonse zaangakwanishe kuti amukondweleshe.—Salimo 147:11; Machitidwe 10:34, 35.

 PHUNZILANI ZINYINJI

4. Abulahamu enze shamwali wa Yehova

Nkhani ya m’Baibo yonena za Abulahamu (kapena kuti Abulamu) yutiyavya kuziŵa zatufunika kucita kuti tinkhale pa ushamwali na Mulungu. Ŵelengani nkhani ya Abulahamu pa Genesis 12:1-4, nokambilana makonsho aŵa:

• Kansi Yehova emuuzhya kuti acitenji Abulahamu?

• Kansi Yehova emulonjeza cinji?

• Nanga Abulahamu ecitanji?

5. Zinthu zamene Yehova ofuna kuti ashamwali ŵake akocita

Tonse tufuna kuti ashamwali ŵasu akoticitila zinthu ziyakine.

• Ni zinthu zotyani zamufuna kuti ashamwali ŵanu akokucitilani?

Ŵelengani 1 Yohane 5:3, nokambilana konsho iyi:

• Kansi Yehova ofuna kuti ashamwali ŵake akocitanji?

Kuti tikwanishe kumvwila Yehova, tufunikila kucinja minkhalidwe yasu. Ŵelengani Yesaya 48:17, 18, nokambilana konsho iyi:

• Ndaŵa yanji Yehova ofuna kuti ashamwali ŵake acinje umoyo wao?

 6. Zakucita Yehova kuti ayavye ashamwali ŵake

 MFUNDO ZACIDULE

Yehova ofuna kuti munkhale shamwali wake ndipo akuyavyeni kuti munkhale naye pafupi.

Kuwelezhya mfundo zikulu-zikulu

• Kansi Yehova oŵayavya tyani ashamwali ŵake?

• Ndaŵa yanji Yehova ouzhya ashamwali ŵake kucinja umoyo wao?

• Kansi muganiza kuti n’cinthu covuta ngako kunkhala pa ushamwali na Yehova? Ngati muganiza tetyo, ndaŵa yanji? Ndipo ngati muganiza lini tetyo, ndaŵa yanji?