MUTU 09
Pemphelo Ingatang’ishe Ushamwali Wanu na Mulungu
Kansi mukumvwa kuti mufunikila cisogozo mu umoyo wanu? Kansi musakilasakila mayankho pa makonsho yofunika ngako yamuli nayo? Kansi mufunikila citonthozo na cilimbikiso? Kansi mufuna kunkhala pa ushamwali na Yehova? Pemphelo ingakuyavyeni pa mbali zonse izi. Koma kansi njila yoyenela yopemphelela ni yotyani? Kansi Mulungu omvwishila mapemphelo onse? N’cinji camufunika kucita kuti Mulungu akokumvwa mapemphelo ŵanu? Tiyeni tione.
1. Kansi tufunika kupemphela kwa ŵani? Nanga tufunika kupemphelela zinthu zotyani?
Yesu ephunzisa kuti tufunika kupemphela tyala kwa Ausuwasu akululu. Ndipo naye enzopemphela kwa Yehova. Ekamba kuti: “Mukopemphela m’njila iyi: ‘Ausuwasu akululu . . . ’” (Mateyu 6:9) Ngati tupemphela kwa Yehova, tutang’isha ushamwali wasu na yove.
Tingapemphelele nkhani zosiyanasiyana. Kuti Mulungu atiyankhe, mapemphelo ŵasu ofunika kunkhala okatizhyana na cifunilo cake. “Ciliconse catingamusenge mokatizhyana na cifunilo cake, otimvwa.” (1 Yohane 5:14) Yesu efotokoza za vinthu voyenelela vatingapemphelele. (Ŵelengani Mateyu 6:9-13.) Tingapemphelele zinthu zokhuza umoyo wasu. Kuyangizhyila apo, tufunika lini kuluŵa kumuyamikila Mulungu pa zinthu zabwino zakuticitila, nomusenga kuti ayavye ayakine.
2. Kansi tufunika kupemphela m’njila yotyani?
Baibo yutilimbikisha ‘kumukhutulila Mulungu za mumtima mwasu.’ (Salimo 62:8) Tetyo, tufunika kupemphela mocokela pansi pa mtima. Tingapemphele cokuwa olo camumtima. Paliye kankhalidwe kapadela popemphela. Tingankhale m’njila iliyonse yolemekezeka popemphela kwa Mulungu. Tingapemphele pa nthawi iliyonse na kulikonse kwatingankhale.
3. Kansi Mulungu oyankha tyani mapemphelo ŵasu?
Oyankha m’njila zosiyanasiyana. Yehova watipasa Mau ŵake, Baibo. Ndipo m’Baibo muli mayankho a makonsho yatunkhala nayo. Kuŵelenga Mau a Mulungu ‘kupasa nzelu munthu wosaziŵa zinthu.’ (Salimo 19:7; ŵelengani Yakobo 1:5.) Angatipase mtendele wa m’maganizo ngati takumana na mavuto. Ndipo angacitishe atumiki ŵake kutipasa thandizo yatufunikila.
PHUNZILANI ZINYINJI
Onani zamungacite kuti mapemphelo ŵanu akokondwelesha Mulungu, ndipo onani mwamungapindulile ngati mupemphela.
4. Zamufunika kucita kuti Mulungu akokumvwa mapemphelo ŵanu
N’cinji cucitisha kuti mapemphelo ŵasu ankhale ovomelezhyeka kwa Mulungu kapena yai? Onelelani VIDYO.
Yehova ofuna kuti tikopemphela kuli yove. Ŵelengani Salimo 65:2, nokambilana makonsho aŵa:
-
Kansi muganiza kuti “Wakumvwa pemphelo” ofuna kuti mweo mukopemphela kuli yove? Ngati muganiza tetyo, ndaŵa yanji? Nanga ngati muganiza lini tetyo, ndaŵa yanji?
Tufunika kunkhala na minkhalidwe yabwino kuti Mulungu akokumvwa mapemphelo ŵasu. Ŵelengani Mika 3:4 na 1 Petulo 3:12, nokambilana konsho iyi:
-
N’cinji catufunika kucita kuti Yehova akokumvwa mapemphelo ŵasu?
Pa nkhondo, masoja a mbali zonse ziŵili angapemphele kuti apambane. Kansi muganiza kuti Mulungu angaŵayankhe?
5. Tufunika kupemphela mocokela pansi pa mtima
Ŵanthu ayakine ophunzisiwa kupeleka mapemphelo yoloŵeza pamtima. Koma kansi Mulungu ofuna kuti tikopeleka mapemphelo yoteti? Ŵelengani Mateyu 6:7, nokambilana konsho iyi:
-
N’cinji cingakuyavyeni kuti osati mukowelezhya mau amozi na amozi popemphela?
Siku iliyonse, ganizilani za cinthu ciyakine capadela cawakucitilani Yehova. Ndipo muyamikileni pa cinthu camene ico. Ngati siku iliyonse muganizila za cinthu capadela cawakucitilani Yehova, ndiye kuti mungankhale na zinthu 7 zosiyanasiyana zamungamuyamikililemo pa wiki.
Kolo yabwino yufuna kuti mwana wake akoiuzhya zinthu mocokela pansi pa mtima. Naye Yehova ofuna kuti tikopemphela kuli yove mocokela pansi pa mtima
6. Pemphelo ni mphaso yapadela yocokela kwa Mulungu
Kansi pemphelo ingatiyavye tyani makamaka ngati takumana na mavuto? Onelelani VIDYO.
Baibo yulonjeza kuti pemphelo ingatiyavye kupeza mtendele wa m’maganizo. Ŵelengani Afilipi 4:6, 7, nokambilana makonsho aŵa:
-
Olo kuti nthawi ziyakine pemphelo ingaticoselepo lini mavuto, kansi yutiyavya tyani?
-
Ni zinthu zotyani zamungakonde kupemphelela?
Kansi muziŵa?
Mau akuti “ame” otanthauza kuti “zinkhale tetyo” kapena kuti “n’cendi.” Kuyambila m’nthawi za m’Baibo, ŵanthu ankhala okamba kuti “ame” kosilizhyila kwa pemphelo.—1 Mbiri 16:36.
7. Mukopatula nthawi yopemphela
Nthawi ziyakine tingankhale otangwanika ngako cakuti tingaluŵe kupemphela. Kansi Yesu enzoona kuti pemphelo ni yofunika tyani? Ŵelengani Mateyu 14:23 na Maliko 1:35, nokambilana makonsho aŵa:
-
Kansi Yesu enzocita cinji kuti apatule nthawi yopemphela?
-
Ni nthawi yanji ingankhale yabwino kuli mweo kuti mukopemphela?
ŴANTHU AYAKINE OKAMBA KUTI: “Kupemphela ni kutaya nthawi cifukwa paliye akumvwa.”
-
Nanga mweo muona tyani?
MFUNDO ZACIDULE
Ngati tupemphela mocokela pansi pa mtima, tunkhala pa ushamwali wotang’a na Mulungu, tunkhala na mtendele wa m’maganizo ndipo tunkhala na mphamvu zocita zinthu zokondwelesha Yehova.
Kuwelezhya mfundo zikulu-zikulu
-
Kansi tufunika kupemphela kwa ŵani?
-
Nanga tufunika kupemphela m’njila yotyani?
-
Ni mapindu yotyani yatupeza ngati tupemphela?
FUFUZANI
Pezani mayankho ya makonsho yakukonsha anyinji yokhuza pemphelo.
“Zinthu 7 Zamufunika Kuziŵa Zokhuza Pemphelo” (Nsanja ya Olonda, October 1, 2010)
Phunzilani cifukwa cake mufunika kupemphela na zamungacite kuti mapemphelo ŵanu akonkhala abwino ngako kwa Mulungu.
“Ndaŵa Yanji Nufunika Kupemphela?” (Nkhani yupezeka tyala pa webusaiti)
Onani zayuphunzisa Baibo pa nkhani yakuti tufunika kupemphela kwa ŵani.
“Kansi Nufunika Kupemphela kwa Oyela Mtima?” (Nkhani yupezeka tyala pa webusaiti)
Vidyo iyi ya nyimbo yuonesha kuti tingapemphele kulikonse na pa nthawi iliyonse.
