MUTU 10
Kansi Misonkhano ya Mboni za Yehova Ingakupindulisheni Tyani?
Kansi mwepezekapo kale pa misonkhano ya Mboni za Yehova? Ngati mukaliye, payakine mungacite mantha kuti mukapezekepo kwa nthawi yoyamba. Payakine mungazikonshe kuti: ‘N’cinji cucitika pa misonkhano iyi? Ndaŵa yanji ni yofunika? Ndaŵa yanji nufunika kupezekapo?’ M’mutu uno, muphunzile mwamene misonkhano ya Mboni za Yehova ingakuyavyileni kuvwendela pafupi na Mulungu. Muphunzile soti mwaingakupindulishileni mu umoyo wanu.
1. Ndaŵa yanji a Mboni za Yehova osonkhana pamozi?
Wolemba Baibo muyakine efotokoza cifukwa cimozi cofunika ngako cosonkhanila pamozi na ayakine. Ekamba kuti: “Pa msonkhano, nikotamanda Yehova.” (Salimo 26:12) Nao a Mboni za Yehova masiku ŵano, osangalala akasonkhana pamozi. Pacalo conse, osonkhana wiki iliyonse kuti atamande Mulungu, kuimba nyimbo, nopemphela. Caka ciliconse onkhala soti na misonkhano ikulu-ikulu.
2. Kansi tuphuzilanji pa misonkhano iyi?
Pa misonkhano iyi, tuphunzila Mau a Mulungu. Mau a Mulungu “ofotokozewa bwino nomvwikisha tanthauzo yake.” (Ŵelengani Nehemiya 8:8.) Pa misonkhano iyi, tuphunzila za Yehova na minkhalidwe yake yabwino. Mukaziŵa zinyinji zokhuza cikondi cake pali mweo, muvwendele pafupi na yove. Pa misonkhano iyi, tuphunzila soti mwaangatiyavyile Yehova kunkhala na umoyo wokhutilisha.—Yesaya 48:17, 18.
3. Kansi ŵanthu ŵamungakumane nao pa misonkhano yasu angakuyavyeni tyani?
Yehova otilimbikisha kuti ‘tufunika kuganizilana kuti tilimbikishane pa cikondi na nchito zabwino na kuti tisaleke kusonkhana pamozi.’ (Aheberi 10:24, 25) Pa misonkhano yasu, mukaone ŵanthu amene okondana cendi koma soti amene ofunishisha kuziŵa zinyinji zokhuza Mulungu, molingana na mweo. Pa misonkhano iyi, ponkhala nkhani zamene munthu okamba yeka na ziyakine zocitokambilana. Kuyangizhyila apo, misonkhano ikaliyoyamba koma soti ikasila, ponkhala mayanjano acikhristu. (Ŵelengani Aroma 1:11, 12.) Mukaziŵane soti na ŵanthu ayakine—ali pa banja na asali pa banja—amene ni osangalala olo kuti okumana na mavuto. Ndiye cifukwa cake Yehova ofuna kuti tikosonkhana pamozi.
PHUNZILANI ZINYINJI
Fufuzani kuti muone zucitika pa misonkhano ya Mboni za Yehova, na cifukwa cake tufunika kupezekapo.
4. Misonkhano ya Mboni za Yehova
M’vyaka 100 voyambilila, Akhristu enzosonkhana pamozi kuti alambile Yehova. (Aroma 16:3-5) Ŵelengani Akolose 3:16, nokambilana konsho iyi:
-
Kansi Akhristu oyambilila enzomulambila tyani Yehova?
Masiku ŵano, a Mboni za Yehova osonkhana pamozi m’malo osiyanasiyana olambilila. Kuti muone zucitika pa misonkhano yao, onelelani VIDYO. Pavuli pake, onani cithunzithunzi cuonesha misonkhano ya mpingo nokambilana makonsho aŵa.
-
Kansi pali kugwilizana kotyani pakati pa zinthu zucitika pa Ng’anda ya Ufumu na zamwaŵelenga pa Akolose 3:16?
-
Kansi mwaonako ciliconse cakucitishani cidwi cokhuza misonkhano yasu mu vidyo kapena pa cithunzithunzi?
Ŵelengani 2 Akorinto 9:7, nokambilana konsho iyi:
-
Ndaŵa yanji a Mboni za Yehova olipilisha lini ndalama pa misonkhano yao?
Pamozi na wokuphunzisani Baibo, onani zati zikaphunziliwe pa misonkhano ya wiki ino.
-
Ni mbali yotyani ya misonkhano yamwaona kuti mungasangalale nayo?
Kansi muziŵa?
Pa jw.org, pali nthawi na malo yayocitikilamo misonkhano ya Mboni za Yehova pacalo conse.
-
Pa misonkhano yasu, ponkhala nkhani, visanzo na mavidyo. Misonkhano iyi yuyamba nosila na nyimbo na pemphelo
-
Ponkhala mbali ziyakine pamene omvwishila osengewa kuti ayankhepo
-
Aliyense angapezekepo—mabanja, ŵala asali pa banja, acikulile na ŵana
-
Misonkhano yasu ni yamahala. A Mboni za Yehova olipilisha lini ndalama olo kupitishamo mbale ya zopeleka
5. Pofunika khama kuti tipezeke pa misonkhano
Ganizilani cisanzo ca banja ya Yesu. Kuti apezeke pa misonkhano ya pa caka ku Yerusalemu, enzofunika kuyenda msenga wa makilomita 100 kupita m’malupili kucokela kwao ku Nazareti. Ŵelengani Luka 2:39-42, nokambilana makonsho aŵa:
-
Kansi muona kuti penzofunika khama kuti akwanishe kuyenda msenga utali teti?
-
Ndaŵa yanji pofunika khama kuti mupezeke pa misonkhano?
-
Kansi muona kuti mufunika mphela kupezeka pa misonkhano olo kuti nthawi ziyakine zingankhale zovuta? Ndaŵa yanji?
Baibo yukamba kuti kusonkhana pamozi ni cinthu cofunika ngako. Ŵelengani Aheberi 10:24, 25, nokambilana konsho iyi:
-
Ndaŵa yanji tufunika kupezeka pa misonkhano nthawi zonse?
ŴANTHU AYAKINE OKAMBA KUTI: “Mufunika lini kucitosonkhana pamozi na ŵanthu ayakine. Kuŵelenga Baibo kung’anda n’kokwanila.”
-
Ni lemba yotyani kapena cisanzo cotyani ca m’Baibo cuonesha zakufuna Yehova?
MFUNDO ZACIDULE
Kupezeka pa misonkhano kukuyavyeni kuti muphunzile zinyinji za Yehova, mukulishe ushamwali wanu na yove, na kuti mukomulambila pamozi na ayakine.
Kuwelezhya mfundo zikulu-zikulu
-
Ndaŵa yanji Yehova otilimbikisha kuti tufunika kusonkhana pamozi?
-
Kansi mukaphunzilenji pa misonkhano ya Mboni za Yehova?
-
Kansi muganiza kuti misonkhano ya Mboni za Yehova ingakupindulisheni tyani?
FUFUZANI
Tyani ngati mucita mantha kuti mukapezekepo pa misonkhano? Onani mweciyambila kukonda misonkhano munalume muyakine wamene poyamba enzokumvwa mantha.
Onani mwecisangalalila wacilumbwana muyakine pecipezeka pa misonkhano kwa nthawi yoyamba na zecicita kuti apitilizhye kupezekapo.
Onani mwakumvwila ŵanthu ayakine akapezeka pa misonkhano.
Onani mwewecinjila umoyo wa munthu wamene enze nyankapondo pecipezeka pa misonkhano ya Mboni za Yehova.
“Kulikonse Kwenenzoluta Nenzonkhala na Mfuti” (Nsanja ya Olonda, July 1, 2014)
