MUTU 11

Mungacitenji Kuti Mukopindula na Zamuŵelenga M’Baibo?

MVWISHILANI

Yelekezelani kuti mufuna kuyamba nchito yamuona kuti ni yovuta ngako. Kuti mukwanishe kuseŵenza nchito iyi, mungafunike kukonzekelesha maganizo ŵanu. Mungayambile kucitako zinthu zitontho-zitontho zamene zingakupaseni mphamvu kuti musilizhye nchito yonse. N’cimozimozi na kuŵelenga Baibo. Mwina mungazikonshe kuti, ‘Kansi ningayambile pani?’ M’mutu uno, tikambilane zinthu zitontho-zitontho zamungacite, zamene zingakuyavyeni kuti mukosangalala poŵelenga Baibo noiphunzila.

1. Ndaŵa yanji tufunika kuŵelenga Baibo nthawi zonse?

Ngati munthu oŵelenga Baibo, kapena kuti “cilamulo ca Yehova” nthawi zonse, onkhala wosangalala ndipo zinthu zumuyendela bwino. (Ŵelengani Salimo 1:1-3.) Kuti muyambe, yesani kuŵelenga Baibo kwa maminesi yatontho siku iliyonse. Mukayamba kuziŵa bwino Mau a Mulungu, mukosangalala poŵelenga Baibo.

2. N’cinji cingakuyavyeni kuti mukopindula poŵelenga Baibo?

Kuti tipindule poŵelenga Baibo, tufunika kuganizila pa zinthu zatuŵelenga. Tufunika kuŵelenga “nosinkhasinkha.” (Yoswa 1:8) Poŵelenga, mufunika kuzikonsha makonsho monga akuti: ‘Kansi izi zuniphunzisa cinji ponena za Yehova Mulungu? Ningaziseŵenzeshe tyani mu umoyo wangu? Kansi mavesi aya ningayaseŵenzeshe tyani poyavya ayakine?’

3. Mungacitenji kuti mukopeza nthawi yoŵelenga Baibo?

Kansi muvutika kupeza nthawi yoŵelenga Baibo? Anyinji a seo tuvutika. Ngati namwe muvutika, yesani kuseŵenzesha “nthawi yanu mwanzelu.” (Aefeso 5:16) Mungacite izi mwa kupatula nthawi yoŵelenga Baibo siku iliyonse. Ŵanthu ayakine oŵelenga Baibo m’mamawa. Ayakine oŵelenga mzuŵa, mwina panthawi ya cakulya. Pamene ayakine oŵelenga Baibo m’cingulo, akaliyolala. Nanga mweo, muona kuti nthawi yabwino ingankhale yotyani?

PHUNZILANI ZINYINJI

Onani zamungacite kuti mukosangalala poŵelenga Baibo. Onani zamungacite pokonzekela phunzilo ya Baibo kuti mukopindula na zamuphunzila.

Mungayambe kukonda kuŵelenga Baibo monga ni mwamungayambile kukonda vakulya vosiyanasiyana

4. Zamungacite kuti mukosangalala poŵelenga Baibo

Nthawi ziyakine cingankhale covuta kuti muyambe kuŵelenga Baibo. Koma tingakulishe ‘cilaka’ coiŵelenga, monga ni mwatingakondele cakulya cetenzokonda lini kale. Ŵelengani 1 Petulo 2:2, nokambilana konsho iyi:

Ngati mwayamba kuŵelenga Baibo siku iliyonse, muganiza kuti mungasangalale nonkhala na cifuno copitilizhya kuiŵelenga?

Onelenani VIDYO kuti muone zeyavya ŵanthu ayakine kuti ayambe kusangalala poŵelenga Baibo. Pavuli pake, kambilanani makonsho okonkhapo.

VIDYO: Acilumbwana Amene Eyamba Kukonda Kuŵelenga Mau a Mulungu (5:33)

Kansi acilumbwana ŵataona mu vidyo iyi, elimbana na mavuto otyani?
N’cinji ceŵayavya kuti apitilizhye kuŵelenga Baibo nthawi zonse?
Nanga ecita cinji kuti akosangalala poŵelenga Baibo?

Zinthu zamene zingakuyavyeni kuti mukosangalala poŵelenga Baibo:

Mukoseŵenzesha Baibo yomasuliliwa m’cilaŵilo cosavuta kumvwa, koma soti yolondola. Yesani kuŵelenga Baibulo la Dziko Latsopano ngati ilimo m’cilaŵilo canu.
Mukoyambila kuŵelenga nkhani zukukondweleshani ngako. Kuti mupeze zingakuyavyeni, onani chati ya mutu wakuti “Yambani Kuŵelenga Baibo.”
Mukolemba zinthu zamuŵelenga. Seŵenzeshani chati ya mutu wakuti “Ndandanda Yoŵelengela Baibo” yamene ili m’buku ino.
Seŵenzeshani JW Library^®app. JW Library ingakuyavyeni kuti mukoŵelenga olo kumvwishila ku Baibo yolekodewa, kulikonse kwamungankhale poseŵenzesha foni olo cipangizo ciyakine.
Seŵenzeshani mbali ya Zakumapeto mu Baibulo la Dziko Latsopano. Mbali iyi ili na mamapu, machati na matanthauzo a mau ayakine. Zinthu izi zingakuyavyeni kuti mukosangalala poŵelenga Baibo.

5. Mukokonzekela phunzilo ya Baibo

Ŵelengani Salimo 119:34, nokambilana konsho iyi:

Ndaŵa yanji mufunika kupemphela mukaliyoyamba kuŵelenga Baibo olo kukonzekela phunzilo ya Baibo?

Mungacitenji kuti mukopindula na phunzilo iliyonse? Pokonzekela mutu ulionse m’buku ino, yesani kucita izi:

Ŵelengani ndime zoyambilila m’mutu ulionse.
Ŵelengani malemba onse, ndipo yesani kumvwisha mwamene malemba aŵa okatizhyilana na mfundo zili m’mutu ulionse.
Congani mau kapena viganizo vamene vuyankha makonsho. Izi zikuyavyeni kuti osati mukovutika kuyankha ngati okuphunzisani wakukonshani konsho.

Kansi muziŵa?

Mboni za Yehova zaseŵenzeshapo Mabaibo osiyanasiyana. Koma zukonda ngako Baibulo la Dziko Latsopano la Malemba Opatulika cifukwa ni yolondola, ni yosavuta kumvwisha, ndipo yuseŵenzesha zina ya Mulungu.—Onani nkhani ya pa webusaiti ya mutu wakuti “Kansi a Mboni za Yehova Ali na Baibo Yao-yao?”

ŴANTHU AYAKINE OKAMBA KUTI: “Kuŵelenga Baibo ni kovuta ngako ndipo niliye nthawi yocita izi.”

Nanga mweo muona tyani?

MFUNDO ZACIDULE

Kuti mukopindula na mfundo za m’Baibo, mukopatula nthawi yoiŵelenga, mukopemphela kuti mukomvwishisha zinthu zamuŵelenga ndipo mukokonzekela phunzilo iliyonse ya Baibo.