MUTU 12
N’cinji Cingakuyavyeni Kuti Mupitilizhye Kuphunzila Baibo?
Kuphunzila Baibo n’kopindulisha ngako. Koma nthawi ziyakine kungankhale kovuta. Payakine mungaganize kuti mungakwanishe lini kupitilizhya kuphunzila Baibo. Koma ndaŵa yanji mufunika kupitilizhya? N’cinji cingakuyavyeni kupitilizhya kuphunzila Baibo olo kuti mukumana na mavuto?
1. Ndaŵa yanji kuphunzila Baibo n’kofunika ngako?
“Mau a Mulungu ni amoyo koma soti amphamvu.” (Aheberi 4:12) Baibo ni yofunika ngako cifukwa yukuuzhyani maganizo a Mulungu na zinthu zakufuna kukucitilani mweo pamweka. Yukuyavyani kuziŵa zinthu, kupeza nzelu nonkhala na ciyembekezo. Koma cofunika ngako n’cakuti, Baibo ingakuyavyeni kunkhala pa ushamwali na Yehova. Mfundo za m’Baibo zingakuyavyeni kucinja umoyo wanu.
2. Ndaŵa yanji mufunika kuona kuti cendi ca m’Baibo ni camtengo wapatali?
Cendi ca m’Baibo cili monga cuma camtengo wapatali. Ndiye cifukwa cake Baibo yutilimbikisha kuti: “Gula cendi ndipo usacigulise.” (Miyambo 23:23) Ngati tuona kuti cendi ca m’Baibo ni camtengo wapatali, ticite zilizonse zatingakwanishe kuti tipitilizhye kuiphunzila olo kuti takumana na mavuto.—Ŵelengani Miyambo 2:4, 5.
3. Kansi Yehova angakuyavyeni tyani kuti mupitilizhye kuphunzila?
Pofwana kuti Yehova ni Nyamalenga wamphamvu koma soti muyanu, ofuna kukuyavyani kuti mupitilizhye kuphunzila za yove. Angakuyavyeni kunkhala na ‘cifuno ndipo angakupaseni mphamvu kuti mupitilizhye kuphunzila Baibo.’ (Ŵelengani Afilipi 2:13.) Tetyo, angakulimbikisheni kuti mupitilizhye kuphunzila Baibo, olo kuseŵenzesha zinthu zamuphunzila. Angakupaseni mphamvu kuti mukwanishe kulimbana na mavuto na cisuso. Nthawi zonse mukomusenga Yehova m’pemphelo kuti akuyavyeni kupitilizhya kuphunzila Baibo.—1 Atesalonika 5:17.
PHUNZILANI ZINYINJI
Onani zamungacite kuti mupitilizhye kuphunzila Baibo ngati munkhala otangwanika olo ngati ŵanthu ayakine okusushani. Ndipo onani mwaangakuyavyileni Yehova kuti mupitilizhye kuphunzila Baibo.
4. Mukoona kuti kuphunzila Baibo ni cinthu cofunika ngako
Nthawi ziyakine mungaone kuti muli na vocita vinyinji ngako cakuti mungapeze lini nthawi yophunzila Baibo. N’cinji cingakuyavyeni? Ŵelengani Afilipi 1:10, nokambilana makonsho aŵa:
-
Ni zinthu zotyani zamuona kuti “ni zofunika ngako” pa umoyo wanu?
-
Mungacitenji kuti mukoona kuti kuphunzila Baibo ni cinthu cofunika ngako?
-
Ngati mwayambila kuika misece m’baketi, lomba mufuna kuikamo miyala, miyala iyakine ingasoŵe konkhala
-
Koma ngati mwayambila kuikamo miyala, m’baketi musale malo yakuti muloŵe misece inyinji. Molingana na izi, ngati muika “zinthu zofunika gako” pasogolo mu umoyo wanu, mukokwanisha kuzicita nonkhala na nthawi yocita zinthu ziyakine zosafunika ngako
Kuphunzila Baibo kukhutilisha cosoŵa casu cauzimu. Cosoŵa casu cauzimu ni kuziŵa Mulungu nomulambila. Ŵelengani Mateyu 5:3, nokambilana konsho iyi:
-
Tupindula tyani ngati tuyesayesa kupeza nthawi yophunzila Baibo?
5. Pitilizhyani kuphunzila Baibo olo kuti musushiwa
Nthawi ziyakine ŵanthu ayakine angafune kuti muleke kuphunzila Baibo. Tiyeni tione cisanzo ca Francesco. Onelelani VIDYO, nokambilana makonsho aŵa:
-
Mu vidyo iyi, kansi ayake a Francesco na abanja ŵake ecitanji peciŵauzhya zinthu zenzophunzila?
-
Kansi epeza madaliso otyani cifukwa copilila?
Ŵelengani 2 Timoteyo 2:24, 25, nokambilana makonsho aŵa:
-
Kansi abanja ŵanu na ayanu akumvwa tyani cifukwa cakuti muphunzila Baibo?
-
Molingana na mavesi aŵa, mungacitenji ngati ŵanthu ayakine okukalipilani cifukwa cakuti muphunzila Baibo? Ndaŵa yanji?
6. Dalilani Yehova kuti akuyavyeni
Ngati tuvwendela pafupi na Yehova, tunkhala ofunishisha kucita zinthu zomukondwelesha. Koma nthawi ziyakine, cingankhale covuta kucinja umoyo wasu kuti ukatizhyane na zakufuna Yehova. Ngati mukumvwa tetyo, musataye mtima. Yehova akuyavyeni. Onelelani VIDYO, nokambilana makonsho aŵa:
-
Mu vidyo iyi, kansi Jim ecinja zinthu zotyani kuti akondweleshe Yehova?
-
Mwaphunzilapo cinji pa cisanzo cake?
Ŵelengani Aheberi 11:6, nokambilana makonsho aŵa:
-
Kansi Yehova walonjeza kuti aŵapase cinji ŵanthu amene “omusakilasakila na mtima wonse”—kapena kuti ŵala amene oyesayesa kumuziŵa nocita zinthu zomukondwelesha?
-
Kansi izi zuonesha kuti Yehova akumvwa tyani akaona khama yamucita kuti mukophunzila Baibo?
AYAKINE ANGAKONSHE KUTI: “Ndaŵa yanji muphunzila Baibo?”
-
Kansi mungaŵayankhe kuti tyani?
MFUNDO ZACIDULE
Olo kuti nthawi ziyakine zingankhale zovuta, kuphunzila Baibo kungakuyavyeni kuti musangalale na moyo kosasila. Pitilizhyani kudalila Yehova, ndipo akudaliseni.
Kuwelezhya mfundo zikulu-zikulu
-
Ndaŵa yanji muona kuti cendi ca m’Baibo ni camtengo wapatali?
-
N’cinji cingakuyavyeni kuti mukosimikizhyila zinthu zofunika ngako?
-
Ndaŵa yanji mufunika kusenga Yehova kuti akuyavyeni kupitilizhya kuphunzila Baibo?
FUFUZANI
Onani vinthu 4 vamene vayavya ŵanthu anyinji kuseŵenzesha nthawi yao mwanzelu.
“Mungacitenji Kuti Mukoseŵenzesha Bwino Nthawi?” (Galamukani!, February 2014)
Onani mwamene Yehova eyavyila munakazi wamene mulume wake enzomususha.
Onani mwecipindulila munalume muyakine cifukwa ca kupilila kwa mkazi wake.
Nthawi ziyakine a Mboni za Yehova onenezewa kuti opasula vikwati. Kansi izi n’zacendi?
“Kansi a Mboni za Yehova Opasula Mabanja ya Ŵanthu Kapena Oyavya Kuti Yankhale Yotang’a?” (Nkhani yupezeka tyala pa webusaiti)
