MUTU 13
Mwamene Cipembezo Cawenye Cuipishila Zina ya Mulungu
Mulungu ni cikondi. Koma vipembezo vamene vukamba kuti vumupanamilako, vucita vinthu vinyinji viipa. Ndaŵa yanji vipembezo ivi vucita vinthu viipa? Yankho yacidule ni yakuti vipembezo ivi ni vawenye ndipo vuipisha tyala zina ya Mulungu. Kansi vuipisha tyani zina ya Mulungu? Nanga Mulungu akumvwa tyani? Kansi yove acitepo cinji?
1. Kansi viphunziso va cipembezo cawenye vuipisha tyani zina ya Mulungu?
Cipembezo cawenye ‘casinthanisha cendi ca Mulungu na wenye.’ (Aroma 1:25) Mwacisanzo, ŵanthu anyinji ophunzisiwa lini zina ya Mulungu ku vipembezo vao. Koma Baibo yukamba kuti zina ya Mulungu yufunika kuseŵenzeshewa. (Aroma 10:13, 14) Ngati vinthu viipa vacitika, asogoleli ayakine acipembezo olaŵila kuti ni cifunilo ca Mulungu. Koma uyu ni wenye. Mulungu ndiye lini ocitisha vinthu viipa. (Ŵelengani Yakobo 1:13.) N’comvwisha cisoni kuti ŵanthu ayakine oona kuti angankhale lini pa ushamwali na Mulungu cifukwa ca vinthu vawenye vavuphunzisa vipembezo.
2. Kansi vocita va cipembezo cawenye vuipisha tyani zina ya Mulungu?
Cipembezo cawenye cusamalila lini ŵanthu, olo kuŵaonesha cikondi monga ni mwakucitila Yehova. Ponena za cipembezo cawenye, Baibo yulaŵila kuti “macimo ŵake aunjikana mpaka kululu.” (Chivumbulutso 18:5) Kwa vyaka vinyinji, vipembezo ivi vankhala vutolamo mbali m’ndale, kucilikiza nkhondo, nocitisha imfwa za ŵanthu masauzande anyinji ngako. Asogoleli ayakine a vipembezo ofunishisha kulemela. Tetyo, okakamizhya mamemba ŵao kuti akoŵapasa ndalama zinyinji. Izi zuonesha kuti omuziŵa lini Mulungu ndipo ni osayenelela kumupanamilako.—Ŵelengani 1 Yohane 4:8.
3. Kansi Mulungu akumvwa tyani na vacucita cipembezo cawenye?
Ngati mweo mukalipa na vocita va cipembezo cawenye, nanji-nanji Yehova akumvwa tyani? Okonda ŵanthu onse, koma okondwela lini na asogoleli acipembezo amene oipisha zina yake nocita vinthu viipa ku mamemba ŵao. Ndiye cifukwa cake olonjeza kuti cipembezo cawenye cikaonongewe ndipo ‘cikankhalepo lini soti.’ (Chivumbulutso 18:21) Lombapano, Mulungu akaononge vipembezo vonse vawenye.—Chivumbulutso 18:8.
PHUNZILANI ZINYINJI
Fufuzani kuti muone mwakumvwila Mulungu cifukwa ca vacucita cipembezo cawenye. Fufuzani soti zacucita cipembezo cawenye noona cifukwa cake vinthu ivi vufunika lini kukukangishani kuziŵa Yehova.
4. Ni vipembezo lini vonse vakuvomelezhya Mulungu
Ŵanthu anyinji okhulupilila kuti: “Vipembezo vili monga ni njila zosiyanasiyana. Koma njila zonse zutifwikisha kwa Mulungu!” Kansi muona kuti mfundo iyi ni yacendi? Ŵelengani Mateyu 7:13, 14, nokambilana konsho iyi:
-
Kansi Baibo yulaŵila cinji ponena za njila ikuya ku moyo?
Onelelani VIDYO, nokambilana konsho yokonkhapo.
-
Kansi Baibo yukamba kuti pali vipembezo vinyinji vukondwelesha Mulungu?
5. Cipembezo cawenye cuonesha lini cikondi ca Mulungu
Vipembezo vuipisha zina ya Mulungu m’njila zinyinji. Njila ikulu ngako yavucitilamo izi, ni mwa kutolamo mbali mu nkhondo. Kuti muone umboni umozi wa mfundo iyi, onelelani VIDYO. Pavuli pake, kambilanani makonsho okonkhapo.
-
Kansi vipembezo vecita cinji pa nkhondo yaciŵili ya pacalo conse?
-
Kansi mukumvwa tyani pa vinthu vevicita vipembezo ivi?
Ŵelengani Yohane 13:34, 35 na 17:16, nokambilana makonsho aŵa:
-
Muganiza kuti Yehova akumvwa tyani akaona kuti vipembezo vutolamo mbali mu nkhondo?
-
Cipembezo cawenye cacitisha vinthu vinyinji viipa. Kansi cipembezo cawenye cakangiwa tyani kutolela cikondi ca Mulungu?
Cipembezo cawenye cuonesha lini cikondi ca Mulungu
6. Mulungu ofuna kuyavya ŵanthu kuti afumemo m’cipembezo cawenye
Ŵelengani Chivumbulutso 18:4, a nokambilana konsho iyi:
-
Mwamvwa tyani pamwaziŵa kuti Mulungu ofuna kuyavya ŵanthu amene osoŵeshewa na cipembezo cawenye?
7. Pitilizhyani kuphunzila za Mulungu wacendi
Kansi vocita viipa va cipembezo cawenye vufunika kukupangishani kuona kuti Mulungu okusamalilani lini? Ganizilani za mwana wamene okana kumvwila awisi. M’kuluta kwa nthawi, ocoka pang’anda noyamba kucita vinthu viipa. Ausuwake okatizhyana lini na vocita vake. Muona kuti cingankhale cinthu canzelu kuimba mlandu awisi cifukwa ca vinthu viipa vakucita mwana uyu?
-
Kansi vocita viipa va cipembezo cawenye vufunika kukupangishani kuimba mlandu Yehova noleka kuphunzila za yove?
ŴANTHU AYAKINE OKAMBA KUTI: “Nufuna lini kumvwa za Mulungu cifukwa cipembezo ndiye cacitisha mavuto anyinji.”
-
Kansi namwe muganiza tetyo?
-
Ndaŵa yanji vocita va cipembezo cawenye vufunika lini kutipangisha kuona kuti Yehova otisamalila lini?
MFUNDO ZACIDULE
Cipembezo cawenye cuipisha zina ya Mulungu kupitila mu viphunziso vake vawenye na vocita vake viipa. Mulungu walonjeza kuti aononge vipembezo vonse vawenye.
Kuwelezhya mfundo zikulu-zikulu
-
Mukumvwa tyani mukaganizila zacuphunzisa cipembezo cawenye na zacucita?
-
Kansi Yehova akumvwa tyani na vocita va cipembezo cawenye?
-
Nanga walonjeza kuti avicite cinji vipembezo vawenye?
FUFUZANI
Phunzilani za magulu aŵili a vipembezo vamene vukondwelesha lini Mulungu.
Ndaŵa yanji Yehova ofuna kuti tikomulambila pamozi na ŵanthu ayakine?
“Kansi Pali Vuto Ngati Uli Lini m’Cipembezo Ciliconse?” (Nkhani yupezeka tyala pa webusaiti)
Wansembe wa cipembezo cawenye enzovutishiwa na acipembezo cake. Koma izi ziliyocitishe kuti aleke kuphunzila cendi cokhuza Mulungu.
“Ndaŵa Yanji Mkulu wa Cipembezo Esiya Cipembezo Cake?” (Galamukani!, February 2015)
Kwa vyaka vinyinji, vipembezo vankhala vuphunzisa vinthu vawenye vamene vapangisha ŵanthu kuganiza kuti Mulungu osamala lini za ŵanthu ndipo ni wankhanza. Phunzilani mfundo zacendi pa vitatu mwa viphunziso ivi.
“Viphunziso Vawenye Vamene Vukangisha Ŵanthu Kukonda Mulungu” (Nsanja ya Olonda, November 1, 2013)
a Kuti muziŵe cifukwa cake buku ya Chivumbulutso yulaŵila kuti Babulo Mkulu opanamila vipembezo vawenye, onani Zakosilizhyila 1.
