MUTU 14
Tingacitenji Kuti Mulungu Akovomelezhya Kulambila Kwasu?
Monga ni mwetephunzilila m’mutu wapita, ni vipembezo lini vonse vakukondwela navo Mulungu. Koma tingakwanishe kulambila Nyamalenga wasu m’njila yomukondwelesha. Kansi ni kupembeza kotyani kumukondwelesha? (Yakobo 1:27) Tiyeni tione zayukamba Baibo.
1. Kansi kulambila kwasu kufunika kuzikiwa pa cinji?
Kulambila kwasu kufunika kuzikiwa pa Mau a Mulungu, Baibo. Popemphela kwa Mulungu, Yesu ekamba kuti: “Mau ŵanu ni cendi.” (Yohane 17:17) Vipembezo viyakine vunyalanyaza cendi cupezeka m’Mau ouzhyiliwa a Mulungu, Baibo. M’malo mwake, vukonkha miyambo na viphunziso va ŵanthu. Yehova osangalala lini na ŵanthu amene ‘okankhila pambali malamulo’ ŵake. (Ŵelengani Maliko 7:9.) Koma tukondwelesha mtima wake ngati kulambila kwasu ni kozikiwa pa Baibo nokonkha malamulo ŵake.
2. Kansi tufunika kumulambila tyani Yehova?
Tufunika kulambila tyala Yehova cifukwa ni Nyamalenga wasu. (Chivumbulutso 4:11) Izi zutanthauza kuti tufunika kumukonda nolambila tyala yove. Ndipo tufunika lini kuseŵenzesha mafano olo vifanizilo pomulambila.—Ŵelengani Yesaya 42:8.
Kulambila kwasu kufunika kunkhala “kutuŵa na kovomelezhyeka” kwa Yehova. (Aroma 12:1) Izi zutanthauza kuti tufunika kukonkha malamulo ŵake nthawi zonse. Mwacisanzo, ŵanthu amene okonda Yehova, okonda malamulo ŵake pa nkhani ya ukwati ndipo oyakonkha. Ndipo opewa kucita vinthu viipa monga kupepa fwaka, kuseŵenzesha mankhwala osokoneza tomfwe olo kumwa walwa mopitilila malile. a
3. Ndaŵa yanji tufunika kulambila Yehova pamozi na okhulupilila ayasu?
Pa misonkhano ya wiki iliyonse, tunkhala na mwai ‘wotamanda Yehova.’ (Salimo 111:1, 2) Njila imozi yatucitilamo izi ni mwa kuimba nyimbo zotamanda Mulungu. (Ŵelengani Salimo 104:33.) Yehova otiuzhya kuti tufunika kupezeka pa misonkhano cifukwa otikonda. Ndipo oziŵa kuti misonkhano ingatiyavye kuti tikasangalale na moyo kosasila. Tulimbikishana tikakumana pamozi pa misonkhano.
PHUNZILANI ZINYINJI
Onani cifukwa cake Yehova ofuna lini kuti tikoseŵenzesha zifanizilo pomulambila. Onani soti njila zofunika ngako zatingatamandile Mulungu.
4. Tufunika lini kuseŵenzesha zifanizilo polambila
Tuziŵa tyani kuti Mulungu osangalala lini ngati tuseŵenzesha zifanizilo pomulambila? Onelelani VIDYO, nokambilana konsho iyi:
-
N’cinji cecitikila ŵanthu ayakine m’nthawi za m’Baibo amene eyesa kumulambila poseŵenzesha fano?
Ŵanthu ayakine oseŵenzesha zifanizilo polambila cifukwa oganiza kuti ndiye paangankhale pafupi na Mulungu. Muona kuti kucita izi kungaŵapangishe cendi kunkhala naye pafupi? Ŵelengani Ekisodo 20:4-6 na Salimo 106:35, 36, nokambilana makonsho aŵa:
-
Ni zifanizilo zotyani zamwaonako zakuseŵenzesha ŵanthu polambila?
-
Kansi Yehova akumvwa tyani akaona ŵanthu oseŵenzesha zifanizilo pomulambila?
-
Nanga mweo maganizo ŵanu ni otyani pa nkhani yoseŵenzhesha zifanizilo?
5. Kulambila Yehova m’njila yoyenelela kutimasula ku viphunziso vawenye
Onani mwatumasukila ku viphunziso vawenye ngati tulambila Yehova m’njila yoyenelela. Onelelani VIDYO.
Ŵelengani Salimo 91:14, nokambilana konsho iyi:
-
Kansi Yehova walonjeza kuti aticitile cinji ngati tuonesha kuti tumukonda mwa kulambila yove yeka?
6. Tulambila Mulungu pa misonkhano ya mpingo
Tutamanda Yehova nolimbikisha ayakine ngati tuyankhapo pa misonkhano noimbako nyimbo. Ŵelengani Salimo 22:22, nokambilana makonsho aŵa:
-
Kansi musangalala mukamvwa ayakine opelekapo ndemanga pa misonkhano?
-
Nanga namwe mungakonde kuti mukayankhepo?
7. Yehova osangalala ngati tuuzhyako ayakine zatuphunzila
Pali njila zinyinji zatingaseŵenzeshe pouzhyako ayakine zatuphunzila m’Baibo. Ŵelengani Salimo 9:1 na 34:1, nokambilana konsho iyi:
-
Ni zinthu zotyani zamwaphunzila m’Baibo zamungakonde kuuzhyako ayakine?
ŴANTHU AYAKINE OKAMBA KUTI: “Seo teŵanthu tingakwanishe lini kumukondwelesha Mulungu.”
-
Nanga mweo muona tyani?
MFUNDO ZACIDULE
Tukondwelesha Nyamalenga wasu ngati tulambila tyala yove, tumutamanda pa misonkhano ya mpingo, nouzhyako ayakine zatuphunzila.
Kuwelezhya mfundo zikulu-zikulu
-
Ni kuni kwatingaziŵile njila yoyenelela yolambilila Mulungu?
-
Ndaŵa yanji tufunika kulambila tyala Yehova?
-
Ndaŵa yanji tufunika kulambila Mulungu pamozi na ayakine amene ofuna kumukondwelesha?
FUFUZANI
M’nkhani yakuti “Neleka Kulambila Mafano,” onani mwamene munakazi muyakine elekela kulambila mafano.
“Baibo Yucinja Umoyo wa Ŵanthu” (Nsanja ya Olonda, July 1, 2011)
Onani zamungacite kuti mukoyankhapo pa misonkhano ya mpingo.
“Tamandani Yehova Pakati pa Mpingo” (Nsanja ya Mlonda, January 2019)
Onani mwecipindulila wacilumbwana muyakine pecipezeka pa misonkhano ya mpingo olo kuti cenze covuta kuti apezekepo.
Ŵanthu anyinji oganiza kuti mtanda ni cizindikilo cakuti munthu ni Mkhristu wenewene. Koma kansi tufunika kuuseŵenzesha polambila?
“Ndaŵa Yanji a Mboni za Yehova Oseŵenzesha Lini Mtanda Polambila?” (Nkhani yupezeka tyala pa webusaiti)
a Nkhani izi zikaphunziliwe m’mitu yakusogolo.
