MUTU 16
Ni Zinthu Zotyani Zecicita Yesu Peenze Pacalo?
Ŵanthu anyinji akamvwa za Yesu oganiza za kamwana katontho, mneneli wanzelu kapena munthu wamene wasala patontho kufwa. Koma tingaphunzile zinyinji za umoyo wake tikaona zecicita peenze pacalo. M’mutu uno, tiphunzile zinthu zofunika ngako zecicita Yesu na mwazingatiyavyile.
1. Ni nchito yotyani yenze yofunika ngako kwa Yesu?
Nchito yofunika ngako yenzocita Yesu ni ‘kulengeza uthenga wabwino wa ufumu wa Mulungu.’ (Ŵelengani Luka 4:43.) Uthenga wabwino wenzolalikila ni wakuti Mulungu azenkhazikishe Ufumu, kapena kuti boma yamene izecosepo mavuto onse ya ŵanthu. a Kwa vyaka vitatu na hafu, Yesu eseŵenza mwamphamvu pouzhya ŵanthu uthenga uyu wolimbikisha.—Mateyu 9:35.
2. Ndaŵa yanji Yesu enzocita zozizwisa?
Baibo yufotokoza kuti Mulungu ecita ‘nchito zinyinji zamphamvu, zodabwisa, koma soti zizindikilo kupitila mwa Yesu.’ (Machitidwe 2:22) Mulungu epasa Yesu mphamvu zolamulila zinthu za m’cilengedwe, kulyesha ŵanthu masauzande, kupolesha olwala noukisha akufwa. (Mateyu 8:23-27; 14:15-21; Maliko 6:56; Luka 7:11-17) Zozizwisa zecicita Yesu zepeleka umboni wakuti etumiwa na Mulungu. Zeonesha soti kuti Yehova ali na mphamvu zocosapo mavuto onse.
3. Kansi cisanzo ca Yesu cutiphunzisanji?
Yesu enzomvwila Yehova nthawi zonse. (Ŵelengani Yohane 8:29.) Olo kuti enzosushiwa, Yesu ecita zinthu zonse zecimuuzhya Awisi mpaka imfwa yake. Zocita zake zeonesha kuti ŵanthu angakwanishe kutumikila Mulungu mokhulupilika olo kuti akumane na mavuto otyani. Tetyo, Yesu etisiila “cisanzo kuti tikonkhe maluwayo ŵake mosamala.”—1 Petulo 2:21.
PHUNZILANI ZINYINJI
Onani njila zenzoseŵenzesha Yesu polalikila uthenga wabwino nocita zozizwisa.
4. Yesu enzolalikila uthenga wabwino
Yesu enzoyenda misenga itali-itali m’miseu ya kalukungu, kuti akalalikile uthenga wabwino ku ŵanthu anyinji. Ŵelengani Luka 8:1, nokambilana makonsho aŵa:
-
Kansi Yesu enzolalikila tyala ŵanthu amene enzowela kuzomvwishila ku uthenga wake?
-
N’cinji cenzocita Yesu kuti apeze ŵanthu?
Mulungu elosela kuti Mesiya azelalikile uthenga wabwino. Ŵelengani Yesaya 61:1, 2, nokambilana makonsho aŵa:
-
Kansi Yesu ekwanilisha tyani ulosi uyu?
-
Muganiza kuti ŵanthu masiku ŵano ofunika kumvwa uthenga wabwino uyu?
5. Yesu ephunzisa mfundo zamtengo wapatali
Kuyangizhyila pa kulalikila uthenga wabwino wonena za Ufumu wa Mulungu, Yesu ephunzisa mfundo zothandiza pa umoyo. Tiyeni tioneko ziyakine mwa mfundo zeciphunzisa pa Ulaliki wake wa Palupili. Ŵelengani Mateyu 6:14, 34 na 7:12, nokambilana makonsho aŵa:
-
Ni mfundo zothandiza zotyani zecikamba Yesu m’mavesi aŵa?
-
Muganiza kuti mfundo izi zikali zoyavya masiku ŵano?
6. Yesu enzocita zozizwisa
Yehova epasa Yesu mphamvu zocita zinthu zinyinji zodabwisa. Kuti muoneko cisanzo cimozi, ŵelengani Maliko 5:25-34 olo onelelani VIDYO. Pavuli pake, kambilanani makonsho okonkhapo.
-
Kansi munakazi wataona mu vidyo enze na cidalilo cotyani?
-
Nanga mweo mwaphunzilapo cinji pa cozizwisa ici?
Ŵelengani Yohane 5:36, nokambilana konsho iyi:
-
Kansi zozizwisa zecicita Yesu ‘zepeleka umboni’ wotyani wokhuza yove?
Kansi muziŵa?
Zinthu zinyinji zatuziŵa zokhuza Yesu zupezeka m’mabuku a Mateyu, Maliko, Luka, na Yohane. Wolemba aliyense elemba zinthu zosiyanasiyana zokhuza Yesu. Tikaŵelenga mabuku aŵa, tunkhala na cithunzi cokwanila cokhuza umoyo wa Yesu.
-
MATEYU
ndiye enze woyamba kulemba umoyo wa Yesu. Buku ya Mateyu yufotokoza zeciphunzisa Yesu, makamaka zokhuza Ufumu wa Mulungu.
-
MALIKO
ndiye buku ifupi ngako pa mabuku onse 4. Koma buku iyi yufotokoza zinthu zinyinji zocitisha cidwi zokhuza umoyo wa Yesu.
-
LUKA
ni buku yamene yutiyavya kuziŵa kuti Yesu enzoona kuti kupemphela ni cinthu cofunika ngako. Yutiyavya soti kuziŵa kuti Yesu enzolemekeza anakazi.
-
YOHANE
ni buku yamene yutiyavya kuziŵa zinthu zenzokambilana Yesu na ayake a pamtima koma soti ŵanthu ayakine. Izi zutiyavya kuziŵa umunthu wake.
ŴANTHU AYAKINE OKAMBA KUTI: “Yesu enze tyala munthu wabwino, osati Mesiya.”
-
Nanga mweo muona tyani?
MFUNDO ZACIDULE
Yesu enzolalikila zokhuza Ufumu wa Mulungu, enzocita zozizwisa ndipo enzomvwila Yehova nthawi zonse.
Kuwelezhya mfundo zikulu-zikulu
-
Kansi nchito yofunika ngako yenzocita Yesu peenze pacalo ni yotyani?
-
Kansi zozizwisa zenzocita Yesu zesimikizhyila cinji?
-
Ni mfundo zothandiza zotyani zeciphunzisa Yesu?
FUFUZANI
Ni nkhani yanji yenzokonda kulaŵila Yesu?
“Yesu Enzoona Kuti Ufumu wa Mulungu ni Wofunika Ngako” (Nsanja ya Olonda, October 1, 2014)
Onani cifukwa cake tukhulupilila kuti Yesu enzocita cendi zozizwisa.
“Kansi Mungaphunzilepo Cinji pa Zozizwisa za Yesu?” (Nsanja ya Olonda, July 15, 2004)
Onani mwecisinthila munalume muyakine peciziŵa kuti Yesu okonda ngako ŵanthu.
“Nenze Wozikonda” (Nsanja ya Mlonda, October 1, 2014)
Onani zinthu zofunika ngako zecicita Yesu, zamene zandandalikiwa kulingana na nthawi yezecitikilamo.
“Zocitika Zikulu-Zikulu mu Umoyo wa Yesu Pacalo” (Baibulo la Dziko Latsopano la Malemba Opatulika, Zakumapeto 21)
a M’mitu 31-33 tikaphunzile zinyinji zokhuza Ufumu wa Mulungu.
