MUTU 17

Kansi Yesu Ali na Minkhalidwe Yotyani?

MVWISHILANI

Ngati tuphunzila zinthu zecicita Yesu na zecikamba peenze pacalo, tufwika pozindikila kuti ali na minkhalidwe yabwino. Izi zuticitisha kufuna kunkhala pa ushamwali na yove na Ausuwake, Yehova. Kansi iyakine mwa minkhalidwe yabwino ngako yaali nayo Yesu ni yotyani? Nanga tingatolele tyani cisanzo cake mu umoyo wasu?

1. Kansi Yesu ali monga Awisi m’njila zotyani?

Yesu wankhala na Ausuwake acikondi kwa vyaka mabiliyoni anyinji kululu. Pa vyaka vonse ivi, wankhala oona zocita za Ausuwake ndipo waphunzilako zinyinji. Cifukwa ca izi, oganiza nocita zinthu monga ni mwakucitila Awisi. (Ŵelengani Yohane 5:19.) Yesu otolela minkhalidwe ya Ausuwake ndendende cakuti efwika pokamba kuti: “Waona neo waona soti Atata.” (Yohane 14:9) Mukaziŵa minkhalidwe ya Yesu, mufwike pomuziŵa bwino Yehova. Mwacisanzo, Yesu enzomvwila cifundo ŵanthu. Izi zuonesha kuti naye Yehova okumvwilani cifundo.

2. Kansi Yesu eonesha tyani kuti okonda Yehova?

Yesu ekamba kuti: “Kuti calo ciziŵe kuti nukonda Atata, nucita izi pokonkha lamulo yecinipasa Atata.” (Yohane 14:31) Peenze pacalo, Yesu eonesha kuti okonda Awisi mwa kuŵamvwila olo pa nthawi yovuta. Yesu eonesha soti cikondi cake mwa kuuzhyako ŵanthu ayakine zokhuza Awisi. Izi zeŵayavya kunkhala pa ushamwali na Yehova.—Yohane 14:23.

3. Kansi Yesu eonesha tyani kuti okonda ŵanthu?

Baibo yukamba kuti Yesu ‘okonda ngako ŵanthu.’ (Miyambo 8:31) Peenze pacalo, eonesha cikondi ici mwa kulimbikisha ŵanthu noŵayavya mozipeleka. Zozizwisa zecicita zeonesha kuti ni wamphamvu koma soti wacikondi. (Maliko 1:40-42) Enze munthu wacifundo ndipo enzeve sankho. Mau ŵake enzopeleka ciyembekezo na citonthozo ku ŵanthu oona mtima amene enzomumvwishila. Cifukwa okonda ŵanthu onse, Yesu ezipeleka kuti anzunzike noŵafwila. Koma okonda ngako ŵala amene omvwila malamulo ŵake.—Ŵelengani Yohane 15:13, 14.

PHUNZILANI ZINYINJI

Phunzilani zinyinji zokhuza minkhalidwe ya Yesu. Ndipo onani mwatingatolele cisanzo cake mwa kuonesha cikondi na wanzi.

4. Yesu okonda Awisi

Cisanzo ca Yesu cutiphunzisa zatufunika kucita kuti tioneshe kuti tukonda Mulungu. Ŵelengani Luka 6:12 na Yohane 15:10; 17:26. Pavuli poŵelenga lemba iliyonse, kambilanani konsho iyi:

Potolela cisanzo ca Yesu, kansi tingaoneshe tyani kuti tukonda Yehova?

Yesu enzokonda Ausuwake akululu ndipo enzokamba nao nthawi zonse m’pemphelo

5. Yesu osamalila ŵanthu ovutika

Yesu enzoika zofuna za ŵanthu ayakine pasogolo pa zofuna zake. Olo kuti waŵeŵa, enzoseŵenzesha nthawi yake na mphamvu zake poyavya ŵanthu. Ŵelengani Maliko 6:30-44, nokambilana makonsho aŵa:

Pa mavesi yataŵelenga, kansi Yesu eonesha tyani kuti oika zofuna za ŵanthu ayakine pasogolo?—Onani vesi 31, 34, 41, na 42.
N’cinji celimbikisha Yesu kuyavya ŵanthu?—Onani vesi 34.
Pofwana kuti Yesu enzoonesha minkhalidwe ya Yehova, kansi izi zuonesha kuti Yehova ali na minkhalidwe yotyani?
Ni njila ziyakine zotyani zatingaoneshele kuti tuika zofuna za ŵanthu ayakine pasogolo potolela cisanzo ca Yesu?

6. Yesu ni wawanzi

Olo kuti enzeve vinthu vinyinji, Yesu enzokonda kupasako ayakine vinthu vake. Ndipo ofuna kuti nase tikocita cimozimozi. Ŵelengani Machitidwe 20:35, nokambilana konsho iyi:

Molingana na zecikamba Yesu, n’cinji cingatiyavye kunkhala acimwemwe?

Onelelani VIDYO, nokambilana konsho iyi:

VIDYO: “Kupasa Kuleta Cimwemwe Cikulu”—Kambali kake (4:00)

Ni njila ziyakine zotyani zatingaoneshele kuti nise opasa olo kuti nise osauka?

Kansi muziŵa?

Baibo yulaŵila kuti tufunika kupemphela kwa Yehova kupitila m’zina ya Yesu. (Ŵelengani Yohane 16:23, 24.) Ngati tucita izi, tuonesha kuti tuyamikila zawaticitila Yesu potiyavya kunkhala pa ushamwali na Yehova.

ŴANTHU AYAKINE OKAMBA KUTI: “Mulungu osamala lini za mavuto ŵasu.”