Yehova ni Mulungu wadongosolo. (1 Akorinto 14:33) Tetyo, nayo gulu yake yufunika kunkhala yadongosolo. Kansi mumpingo wacikhristu muli dongosolo yotyani? Nanga tingacitenji kuti ticilikize dongosolo iyi?

1. Ni ŵani osogolela mpingo?

‘Khristu ndiye mutu wa mpingo.’ (Aefeso 5:23) Kucokela kululu, oyanganila nchito ya atumiki a Yehova pacalo conse. Yesu waika “kapolo wokhulupilika na wanzelu,” kapena kuti Bungwe Yolamulila. Bungwe Yolamulila ni kagulu katontho ka akulu amene atumikila Yehova mokhulupilika kwa vyaka vinyinji. (Ŵelengani Mateyu 24:45-47.) Monga ni mwenzocitila atumwi na akulu ku Yerusalemu m’vyaka 100 voyambilila, Bungwe Yolamulila yupeleka malangizo ku gulu ya Mulungu pacalo conse. (Machitidwe 15:2) Koma izi zutanthauza lini kuti ni asogoleli a gulu yasu. Odalila cisogozo ca Yehova na Mau ŵake, ndipo ogonjela usogoleli wa Yesu.

2. Kansi akulu ocita nchito yanji?

Akulu ni analume amene atumikila Yehova kwa vyaka vinyinji. Ophunzisa atumiki a Yehova kucokela m’Baibo ndipo oŵayavya noŵalimbikisha. Olandila lini malipilo aliwonse pa nchito yao. Koma otumikila Mulungu “mofunishisha, osati cifukwa cofuna kupindulapo kanthu, koma na mtima wonse.” (1 Petulo 5:1, 2) Akulu othandiziwa na atumiki oyavya, amene m’kupita kwa nthawi, nao angayenelele kunkhala akulu.

Bungwe Yolamulila yusankha akulu ayakine kunkhala oyanganila amadela. Oyanganila amadela oyendela mipingo yosiyanasiyana kuti apeleke malangizo nolimbikisha akwasu na azilongosi. Oika akulu na atumiki oyavya ngati akwanilisha ziyeneleso za m’Malemba.—1 Timoteyo 3:1-10, 12; Tito 1:5-9.

3. Kansi Mboni ya Yehova iliyonse ili na udindo wotyani?

Onse mumpingo ‘otamanda zina ya Yehova’ mwa kutolamo mbali pa misonkhano na mu ulaliki, kulingana na mwazilili zinthu pa umoyo wao.—Ŵelengani Salimo 148:12, 13.

 PHUNZILANI ZINYINJI

4. Yesu ni msogoleli wacikondi

Onani zakutisenga Yesu kuti ticite. Ŵelengani Mateyu 11:28-30, nokambilana konsho iyi:

• Kansi Yesu ni msogoleli wotyani? Ndipo ofuna kuti udindo wake tikouona tyani?

5. Akulu oonesha cisanzo cabwino mumpingo

1. Akulu oyesayesa kunkhala pa ushamwali wotang’a na Yehova, ndipo oyavya mabanja ŵao kucita cimozimozi

2. Akulu osamalila ŵanthu onse mumpingo

3. Akulu osogolela pa nchito yolalikila

4. Akulu ali na udindo wophunzisa mumpingo. Ndipo oyavya soti pa nchito ziyakine monga kuyelesa

 6. Tufunika kucita zinthu mokatizhyana na akulu

Baibo yutipasa cifukwa cabwino cocitila zinthu mokatizhyana na akulu. Ŵelengani Aheberi 13:17, nokambilana makonsho aŵa:

• Ndaŵa yanji Baibo yutilimbikisha kuti tufunika kugonjela osogolela mumpingo mofunishisha? Kansi mweo muona kuti kucita izi n’kofunika?

Ŵelengani Luka 16:10, nokambilana konsho iyi:

• Ndaŵa yanji tufunika kugonjela akulu nthawi zonse, olo pa zinthu zamene zuoneka kuti n’zosafunika kwenikweni?

 MFUNDO ZACIDULE

Yesu ndiye osogolela mpingo. Tugonjela akulu mofunishisha cifukwa nao ogonjela usogoleli wa Yesu. Akulu aŵa, otisisimula notionesha cisanzo cabwino.

Kuwelezhya mfundo zikulu-zikulu

• Kansi ni ŵani osogolela mpingo?

• Nanga akulu ocita nchito yanji mumpingo?

• Kansi Mboni ya Yehova iliyonse ili na nchito yanji?