MUTU 21
Kansi Uthenga Wabwino Ulalikiliwa Tyani?
Lombapano, Yehova aseŵenzeshe Ufumu wake kucosapo mavuto ŵasu onse. Uyu ni uthenga wabwino ngako ndipo tufunika kuuzhyako ayakine. Yesu enzofuna kuti ophunzila ŵake akouzhyako ayakine uthenga uyu! (Mateyu 28:19, 20) Kansi Mboni za Yehova zucitanji pomvwila lamulo ya Yesu?
1. Kansi lemba ya Mateyu 24:14 yukwanilishiwa tyani masiku ŵano?
Yesu elosela kuti: “Uthenga wabwino uyu wa Ufumu ukalalikiwe pacalo conse.” (Mateyu 24:14) Mboni za Yehova zucita nchito iyi mwacimwemwe. Tulalikila uthenga wabwino pacalo conse mu vilaŵilo vopitilila 1,000! Cifukwa cakuti nchito iyi ni ikulu, pofunika khama koma soti kuseŵenza mokatizhyana. Nchito iyi ingacitike lini paliye thandizo ya Yehova.
2. Kansi tukwanisha tyani kulalikila ŵanthu anyinji?
Tulalikila kulikonse kupezeka ŵanthu. Molingana na Akhristu oyambilila, “tulalikila ku ng’anda na ng’anda.” (Machitidwe 5:42) Njila iyi yutiyavya kulalikila ŵanthu mamiliyoni anyinji caka ciliconse. Pofwana kuti ŵanthu opezeka lini pa mang’anda nthawi zonse, tulalikila soti m’malo mupezeka ŵanthu anyinji. Tuseŵenzesha soti mpata ulionse kuti tiuzhye ŵanthu za Yehova na colinga cake.
3. Kansi ni ŵani ofunika kulalikila uthenga wabwino?
Akhristu onse ofunika kulalikila uthenga wabwino. Tuona nchito iyi kunkhala yofunika ngako. Tuyesayesa kulalikila ŵanthu kulingana na mwazilili zinthu pa umoyo wasu, cifukwa tuziŵa kuti iyi ni nchito yopulumusa ŵanthu. (Ŵelengani 1 Timoteyo 4:16.) Tulandila lini malipilo alionse pa nchito iyi, cifukwa Baibo yukamba kuti: “Mwelandila kwaulele, pasani kwaulele.” (Mateyu 10:7, 8) Ŵanthu ayakine okana kumvwa uthenga wasu. Koma tuleka lini kulalikila cifukwa kulalikila ni mbali ya kulambila kwasu, ndipo tukondwelesha mtima wa Yehova.
PHUNZILANI ZINYINJI
Onani mwamene Mboni za Yehova zulalikilila uthenga wabwino pacalo conse, ndipo onani soti mwakutiyavyila Yehova.
Nchito yolalikila yamene yucitika pacalo conse: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Tuyesayesa kulalikila ŵanthu onse
Mboni za Yehova zuyesayesa kulalikila uthenga wabwino ku ŵanthu onse. Onelelani VIDYO, nokambilana konsho iyi:
-
N’cinji cakucitishani cidwi poona kuyesayesa kwazucita Mboni za Yehova kuti zilalikile?
Ŵelengani Mateyu 22:39 na Aroma 10:13-15, nokambilana makonsho aŵa:
-
Kansi utumiki wasu uonesha tyani kuti tukonda ŵanthu ayakine?
-
Nanga Yehova akumvwa tyani akaona ŵanthu amene olalikila uthenga wabwino?—Onani vesi 15.
5. Nise anchito ayake a Mulungu
Zocitika zinyinji zuonesha kuti Yehova ndiye osogolela nchito yasu. Mwacisanzo, ku New Zealand, mkwasu wa zina yakuti Paul ekumana na munakazi muyakine peenzolalikila kung’anda na ng’anda siku iyakine mzuŵa. Pa siku yamene iyo m’mawa, munakazi uyu enze epemphela kwa Mulungu poseŵenzesha zina yake yakuti Yehova, ndipo esenga kuti munthu muyakine amuyendele. Mkwasu Paul ekamba kuti, ‘Maawazi atatu pavuli pakuti wapemphela, nefwika pang’anda pake.’
Ŵelengani 1 Akorinto 3:9, nokambilana konsho iyi:
-
Kansi zocitika zoteti, monga ni ici ca ku New Zealand, zuonesha tyani kuti Yehova niye osogolela nchito yolalikila?
Ŵelengani Machitidwe 1:8, nokambilana konsho iyi:
-
Ndaŵa yanji tufunikila thandizo ya Yehova kuti tikwanishe kulalikila?
Kansi muziŵa?
Wiki iliyonse, pa misonkhano ya mkati mwa wiki, tuphunzisiwa molalikilila. Ngati mwepezekapo kale pa misonkhano yasu, ni mfundo zotyani zemwephunzilako?
6. Tumvwila lamulo ya Mulungu yakuti tikolalikila
M’vyaka 100 voyambilila, osusha eyesa kulesha ophunzila a Yesu kulalikila. Akhristu oyambilila eteteza ufulu wao wolalikila “mwa kunkhazikisha mwalamulo . . . nchito yolalikila uthenga wabwino.” (Afilipi 1:7) Nazo Mboni za Yehova zucita cimozimozi masiku ŵano. a
Ŵelengani Machitidwe 5:27-42, nokambilana konsho iyi:
-
Ndawa yanji tileke lini kulalikila?—Onani mavesi 29, 38, na 39.
ŴANTHU AYAKINE ANGAKONSHE KUTI: “Ndaŵa yanji a Mboni za Yehova opita m’mang’anda ya ŵanthu kulalikila?”
-
Kansi mungaŵayankhe kuti tyani?
MFUNDO ZACIDULE
Yesu euzhya ophunzila ŵake kulalikila uthenga wabwino ku mitundu yonse. Masiku ŵano, Yehova oyavya ŵanthu ŵake kukwanilisha nchito iyi.
Kuwelezhya mfundo zikulu-zikulu
-
Kansi uthenga wabwino ulalikiliwa tyani pacalo conse?
-
Kansi utumiki wasu uonesha tyani kuti tukonda ŵanthu ayakine?
-
Muganiza kuti kulalikila kungatipase cimwemwe? Ndaŵa yanji?
FUFUZANI
Kansi Mboni za Yehova zukwanisha tyani kulalikila ŵanthu m’mizinda ikulu-ikulu?
Nchito Yapadela Yolalikila M’malo Mupezeka Ŵanthu Anyinji ku Paris (5:11)
Kansi a Mboni za Yehova acitanji kuti ayavye ŵanthu othaŵa kwao?
Mvwani zakufotokoza munthu muyakine zokhuza cimwemwe cakupeza cifukwa cocita utumiki wanthawi zonse
Phunzilani za milandu ya ku khoti yamene yacitisha kuti nchito yolalikila uthenga wabwino ipite pasogolo.
“Alaliki a Ufumu Opeleka Milandu Yao ku Khoti” (Ufumu wa Mulungu Ukulamulila!, Nkhani 13)
a Pofwana kuti Mulungu niye watilamula kuti tikolalikila, Mboni za Yehova zufunikila lini cilolezo ca munthu aliyense kuti zilalikile uthenga wabwino.
