MUTU 22

Zamungacite Kuti Mukouzhyako Ayakine Uthenga Wabwino

MVWISHILANI

Pamuphunzila cendi ca m’Baibo, mungaone kuti mufunika kuuzhyako ayakine zinthu zamuphunzila. Ndipo n’cendi kuti aliyense ofunika kuuzhyiwa uthenga wabwino! Koma payakine mungocita mantha kuuzhyako ayakine zinthu zamuphunzila. Tiyeni tikambilane zamungacite kuti mugonjese mantha aŵa, noyamba kuuzhyako ayakine uthenga wabwino wa m’Baibo.

1. Mungacitenji kuti mukouzhyako ŵanthu ŵamuziŵa zinthu zamuphunzila?

Ophunzila a Yesu ekamba kuti: “Tingaleke lini kulaŵila zinthu zeteona na kumvwa.” (Machitidwe 4:20) Enzokonda ngako zinthu zeciphunzila kwa Yesu, cakuti enzofuna kuuzhyako munthu aliyense. Kansi namwe mukumvwa tetyo? Ngati mukumvwa tetyo, pezani mipata yamungauzhyilemo abanja ŵanu na ayanu zinthu zamuphunzila mwaulemu.—Ŵelengani Akolose 4:6.

Njila ziyakine zamungayambilemo ulaliki

Pokamba na wabanja wanu, mungayambe kukambilana naye nkhani ya m’Baibo mwa kulaŵila kuti: “Pali zinthu ziyakine zocitisha cidwi zenephunzila wiki ino.”
Mungaŵelengeleko muyanu wamene olwala kapena wamene ali na nkhaŵa lemba yolimbikisha.
Ngati ayanu a kunchito akukonshani mweyenzele wikendi, mungaŵauzhyeko zemwephunzila m’Baibo olo ku misonkhano ya mpingo.
Mungaonesheko ayanu webusaiti ya jw.org.
Mungasenge ayakine kunkhala namwe pamuphunzila Baibo, olo kuŵaonesha mwaangasengele phunzilo ya Baibo pa jw.org.

2. Ndaŵa yanji kulalikila pamozi na mpingo ni colinga cabwino?

Ophunzila a Yesu enzolalikila lini uthenga wabwino ku ŵanthu tyala ŵenzoziŵa. Yesu “eŵatuma aŵili-aŵili kuti akalalikile m’mizinda.” (Luka 10:1) Kulalikila m’njila iyi kwepasa ŵanthu anyinji mwai wakumvwa uthenga wabwino. Ophunzila a Yesu epeza cimwemwe cikulu cifukwa colalikila pamozi. (Luka 10:17) Kansi namwe mungankhale na colinga coyamba kulalikila pamozi na mpingo?

PHUNZILANI ZINYINJI

Ganizilani mwamungagonjesele mantha nopeza cimwemwe camene cuwela cifukwa couzhyako ayakine uthenga wabwino.

3. Yehova akuyavyeni

Ayakine angacite mantha kuyamba kulalikila cifukwa coganizila mwaangaŵaonele ŵanthu ayakine.

Kansi namwe mukumvwa mantha kuuzhyako ayakine zamuphunzila? Ngati mucita mantha, ndaŵa yanji? Nanga ngati mucita lini mantha, ndaŵa yanji?

Onelelani VIDYO, nokambilana konsho yokonkhapo.

VIDYO: Nepemphela Kuti Yehova Aniyavye Kunkhala Wotang’a Mtima (4:05)

Kansi Mboni izi zacilumbwana zegonjesa tyani mantha?

Ŵelengani Yesaya 41:10, nokambilana konsho iyi:

Ngati mucita mantha kulalikila, ndaŵa yanji mufunika kupemphela?

Kansi muziŵa?

Pa nthawi iyakine, a Mboni za Yehova anyinji enzoganiza kuti angakwanishe lini kulalikila uthenga wabwino. Mwacisanzo, Sergey enzoganiza kuti angakwanishe lini kukamba na ŵanthu. Koma peciyamba kuphunzila Baibo, ekamba kuti: “Olo kuti nenze na mantha, neyamba kuuzhyako ayakine zenenzophunzila. Nedabwa kuti peneyamba kuuzhyako ayakine zinthu zenenzophunzila, nelimbikishiwa ngako. Ndipo cikhulupililo cangu pa zinthu zenenzophunzila cetang’a.”

4. Nkhalani aulemu

Polalikila uthenga wabwino, mufunika lini tyala kuganizila zamungalaŵile koma mufunika kuganizila soti mwamungazilaŵilile. Ŵelengani 2 Timoteyo 2:24 na 1 Petulo 3:15, nokambilana makonsho aŵa:

Kansi mungaseŵenzeshe tyani mavesi aŵa polalikila ayakine?
Payakine abanja ŵanu olo ayanu angafune lini kuti mukoŵauzhyako zinthu zamuphunzila. Kansi mungacitenji? Nanga ni zinthu zotyani zamusafunika kucita?
Ndaŵa yanji mufunika kuseŵenzesha makonsho mwaluso, m’malo mouzhya ayakine zakufunika kukhulupilila?

5. Kulalikila uthenga wabwino kuleta cimwemwe

Yehova epasa Yesu nchito yolalikila uthenga wabwino. Kansi Yesu enzoiona tyani nchito iyi? Ŵelengani Yohane 4:34, nokambilana makonsho aŵa:

Kulya cakulya cabwino kucilikiza moyo wasu, ndipo kutipasa cimwemwe. Ndaŵa yanji Yesu ekamba kuti kucita cifunilo ca Mulungu, monga kulalikila uthenga wabwino, kuli monga ni kulya cakulya?
Muganiza kuti mungapeze cimwemwe cotyani ngati mulalikila uthenga wabwino?

Zinthu ziyakine zamene zingakuyavyeni

Pa misonkhano ya mkati mwa wiki, onani maluso yamungaseŵenzeshe kuti muyambe kukambilana na munthu.
Konshani okuphunzisani Baibo zamungacite kuti muyambe kukambako nkhani za ophunzila pa misonkhano ya mkati mwa wiki. Kukambako nkhani za ophunzila kungakupaseni cidalilo cakuti mukouzhyako ayakine zamuphunzila.
Seŵenzeshani mbali zakuti “Ŵanthu Ayakine Okamba Kuti” olo “Ŵanthu Ayakine Angakonshe Kuti,” zamene zili m’buku ino, kuti muyeselele mwamungayavyile ŵanthu amene okana kuŵalalikila..

ŴANTHU AYAKINE ANGAKONSHE KUTI: “Papita masiku muoneka lini. Mwati mulipo?”