MUTU 23
Ubatizo ni Cosankha Cabwino Ngako
Yesu ephunzisa kuti Akhristu ofunika kubatizika. (Ŵelengani Mateyu 28:19, 20.) Koma kansi ubatizo ufunika kucitika tyani? Nanga munthu ofunika kucitanji kuti abatizike?
1. Kansi ubatizo ufunika kucitika tyani?
Mau akuti “kubatiza” ocokela ku mau a Cigiriki amene otanthauza “kumbizhya muŵili wonse” m’manzi. Yesu peenzobatizika, embizhyiwa muŵili wonse mum’mana wa Yorodano. Ndipo pavuli pake “evuuka m’manzi.” (Maliko 1:9, 10) Monga ni mwecicitila Yesu, Akhristu onse acendi ombizhyiwa muŵili wonse m’manzi pobatizika.
2. Kansi munthu oonesha cinji akabatizika?
Munthu akabatizika, oonesha kuti ezipeleka kwa Yehova Mulungu. Koma kansi munthu ozipeleka tyani? Akaliyobatizika, opeleka pemphelo ya payeka. M’pemphelo iyi, ouzhya Yehova kuti amutumikile mpaka kale-kale. Olonjeza kuti akolambila tyala Yehova noika cifunilo cake pasogolo mu umoyo wake. Osankha ‘kuzikana yeka nopitilizhya kukonkha’ zeciphunzisa Yesu na cisanzo cake. (Mateyu 16:24) Munthu akazipeleka nobatizika, onkhala pa ushamwali wapadela na Yehova na Akhristu ayake.
3. Kansi munthu ofunika kucitanji akaliyobatizika?
Kuti mubatizike, mufunika kuphunzila za Yehova notang’isha cikhulupililo canu. (Ŵelengani Aheberi 11:6.) Mukayamba kuziŵa zinyinji zokhuza Mulungu notang’isha cikhulupililo canu, muyambe kumukonda ngako Yehova. Mosakaikila, mufune kuuzhyako ayakine zamuphunzila nokonkha malamulo ŵake. (2 Timoteyo 4:2; 1 Yohane 5:3) Munthu akayamba “kuyenda mokatizhyana na zakufuna Yehova kuti amukondweleshe pa ciliconse,” angasankhe kupeleka moyo wake kwa Mulungu nobatizika.—Akolose 1:9, 10. a
PHUNZILANI ZINYINJI
Onani zatingaphunzile ku ubatizo wa Yesu, na zaangacite munthu kuti abatizike.
4. Zatingaphunzile ku ubatizo wa Yesu
Ŵelengani Mateyu 3:13-17 kuti muone zinyinji zokhuza ubatizo wa Yesu, nokambilana makonsho aŵa:
-
Kansi Yesu ebatizika ali lucece?
-
Kansi emubatiza momutila tyala manzi pa mutu?
Yesu eyamba nchito yapadela yecimupasa Mulungu pavuli pakuti wabatizika. Ŵelengani Luka 3:21-23 na Yohane 6:38, nokambilana konsho iyi:
-
Pavuli pakuti Yesu wabatizika, kansi ni nchito yotyani yeciika pasogolo mu umoyo wake?
5. Ubatizo ni colinga cabwino camungakwanilishe
Payakine mungacite mantha kuti muzipeleke nobatizika. Koma mungakwanishe kugonjesa mantha aŵa nokwanilisha colinga canu. Kuti muone ŵanthu amene ekwanisha kucita izi, onelelani VIDYO.
Ŵelengani Yohane 17:3 na Yakobo 1:5, nokambilana konsho iyi:
-
N’cinji cingayavye munthu kuti ayenelele ubatizo?
-
Tuzipeleka kwa Yehova mwa kumulonjeza kuti timutumikile mpaka kale-kale
-
Pa ubatizo wasu, tuonesha ŵanthu ayakine kuti tezipeleka kwa Mulungu
6. Mukabatizika, munkhala mbali ya banja ya Yehova
Tikabatizika, tunkhala mbali ya banja ya Yehova yamene ni yokatizhyana pacalo conse. Tonse tukhulupilila zinthu zolingana, ndipo tuyendela mfundo zolingana mosasamala kanthu kuti tucokela kuni olo tekulila kuni. Ŵelengani Salimo 25:14 na 1 Petulo 2:17, nokambilana konsho iyi:
-
Molingana na Malemba aŵa, kansi munthu opindula tyani akabatizika?
ŴANTHU AYAKINE OKAMBA KUTI: “N’ne wosakonzeka kubatizika.”
-
Ngati namwe mukumvwa tetyo, kansi muona mphela kuti ubatizo ni cosankha cabwino?
MFUNDO ZACIDULE
Yesu ephunzisa kuti Akhristu ofunika kubatizika. Kuti munthu abatizike, ofunika kutang’isha cikhulupililo cake mwa Yehova, kukonkha malamulo ŵake nozipeleka kuli yove.
Kuwelezhya mfundo zikulu-zikulu
-
Kansi ubatizo ufunika kucitika tyani? Ndaŵa yanji ubatizo ni wofunika?
-
Kansi munthu oonesha cinji akabatizika?
-
Kansi munthu ofunika kucita cinji kuti azipeleke nobatizika?
FUFUZANI
Onani njila yoyenelela na yosayenelela yobatizikilamo.
“Kansi Ubatizo ni Cinji?” (Nkhani yupezeka tyala pa webusaiti)
Onani zaangacite munthu kuti ayenelele ubatizo.
“Kukonda Yehova na Kumuyamikila Kungakusonkhezeleni Kuti Mubatizike” (Nsanja ya Mulonda, March 2020)
Onani zesonkhezela munalume muyakine kuti abatizike.
“Nenzofuna Kuti Nizionele Neka Kuti Zacendi N’zotyani” (Nsanja ya Olonda, February 1, 2013)
Onani cifukwa cake ubatizo ni cosankha cabwino ngako na zamungacite kuti mubatizike.
“Kansi Nufunika Kubatizika?” (Mayankho a Zimene Achinyamata Amafunsa, Buku Lachiwiri, mutu 37)
a Ngati munthu enze ebatizika ku cipembezo ciyakine, ofunika kubatizika soti. Ndaŵa yanji? Cifukwa ku cipembezo kweenze, enzophunzila lini cendi ca m’Baibo.—Onani Machitidwe 19:1-5 na Mutu 13.
