MUTU 24
Cendi Cokhuza Angelo
Yehova ofuna kuti tiziŵe banja yake yakululu. M’banja iyi, muli angelo amene oitiwa kuti “ŵana a Mulungu.” (Yobu 38:7) Kansi Baibo yukambanji zokhuza angelo? Kansi okhuza tyani umoyo wa ŵanthu? Ni angelo onse amene ali m’banja ya Mulungu?
1. Kansi angelo ni ŵani?
Yehova eyambila kulenga angelo akaliyolenga calo. Angelo ni mizimu yosaoneka ndipo onkhala kululu. (Aheberi 1:14) Angelo alipo mamiliyoni anyinji ndipo aliyense ali na minkhalidwe yosiyana na mngelo muyake. (Chivumbulutso 5:11) Ocita “zawakamba [Yehova], ndipo omvwila malamulo ŵake.” (Salimo 103:20) M’nthawi zakuvuli, nthawi ziyakine Yehova enzotuma angelo kuti akapeleke mauthenga, akayavye atumiki ŵake, noŵapulumusa. Masiku ŵano, angelo osogolela Akhristu ku ŵanthu amene ofuna kuphunzila za Mulungu.
2. Kansi Satana na viŵanda vake ni ŵani?
Angelo ayakine epondokela Yehova. Mngelo woyamba kupondoka oitiwa kuti “Maleŵania na Satana, wamene osoŵesha ŵanthu pacalo conse.” (Chivumbulutso 12:9) Satana enzofuna kunkhala na ulamulilo pa zolengewa ziyakine. Tetyo, ecitisha kuti Adamu na Eva koma soti angelo ayakine apondokele Yehova. Angelo amene enkhala kumbali ya Satana oitiwa kuti viŵanda. Yehova ecosa angelo opondoka kululu noŵaponya pansi, ndipo akuzoŵaononga.—Ŵelengani Chivumbulutso 12:9, 12.
3. Kansi Satana na viŵanda vake oyesa tyani kutipatusha kwa Mulungu?
Satana na viŵanda vake oyesa kupatusha ŵanthu kwa Mulungu poseŵenzesha zamizimu. Kucita zamizimu ni kuyesa kukambilana na viŵanda. Kucita izi ni koyofya ngako. Mwacisanzo, ayakine okonshela kuli okhulupilila nyenyezi, olosela za msogolo na ng’anga. Ayakine osakila cithandizo ca mankhwala camene cuphatikizapo zamizimu. Viŵanda vupangisha soti ŵanthu kukhulupilila kuti angakwanishe kukamba na akufwa. Koma Yehova oticenjeza kuti: “Musakonshele kuli olaŵila na mizimu na olosela za msogolo.” (Levitiko 19:31) Oticenjeza cifukwa ofuna kutiteteza kwa Satana na viŵanda vake. Satana na viŵanda vake ni adani a Mulungu ndipo ofuna kutiononga.
PHUNZILANI ZINYINJI
Phunzilani za zinthu zabwino zakucita angelo, kuipa kocita zamizimu na mwatingazitetezele kwa Satana na viŵanda vake.
4. Angelo oyavya ŵanthu kuphunzila za Yehova
Angelo a Mulungu olalikila lini mwacindunji ku ŵanthu. Koma osogolela atumiki a Mulungu ku ŵanthu amene ofuna kuphunzila za yove. Ŵelengani Chivumbulutso 14:6, 7, nokambilana makonsho aŵa:
-
Ndaŵa yanji tufunikila thandizo ya angelo pa nchito yolalikila?
-
Kansi mwalimbikishiwa poziŵa kuti angelo angakusogoleleni ku ŵanthu amene ofuna kuphunzila Baibo? Ndaŵa yanji?
5. Pewani zamizimu
Satana na viŵanda vake ni adani a Yehova ndipo ni adani ŵasu. Ŵelengani Luka 9:38-42, nokambilana konsho iyi:
-
Kansi viŵanda vucita cinji ku ŵanthu?
Tufunika lini kulola viŵanda kusogolela umoyo wasu. Ŵelengani Deuteronomo 18:10-12, nokambilana makonsho aŵa:
-
Kansi viŵanda vuyesa kulaŵila nase nosonkhezela umoyo wasu m’njila zotyani? Ni vocitika votyani va viŵanda vamuona kuti vucitika ngako kudela kwamunkhala?
-
Kansi muona kuti Yehova ocita bwino kutilesha kukhulupilila zamizimu? Ndaŵa yanji?
Onelelani VIDYO, nokambilana makonsho aŵa:
-
Kansi muona kuti cithumwa camene Palesa enzovwalika mwana wake cenzomuteteza cendi? Ndaŵa yanji?
-
Kansi Palesa enzofunika kucita cinji kuti aziteteze ku viŵanda?
Akhristu acendi ankhala opewa vocita va viŵanda nthawi zonse. Ŵelengani Machitidwe 19:19 na 1 Akorinto 10:21, nokambilana konsho iyi:
-
Ndaŵa yanji mufunika kuononga ciliconse cokatizhyana na zamizimu?
6. Mungapambane pa nkhondo yolimbana na Satana na viŵanda vake
Viŵanda vusogolelewa na Satana. Koma angelo okhulupilika osogolelewa na Mikayeli, mkulu wa angelo. Mikayeli ni zina iyakine ya Yesu. Kansi Mikayeli ali na mphamvu zinyinji tyani? Ŵelengani Chivumbulutso 12:7-9, nokambilana makonsho aŵa:
-
Kansi ni ŵani ali na mphamvu ngako, pakati pa Mikayeli na angelo ŵake, kapena Satana na viŵanda vake?
-
Kansi muona kuti Akhristu ofunika kuyopa Satana na viŵanda vake?
Mungapambane pa nkhondo yolimbana na Satana na viŵanda vake. Ŵelengani Yakobo 4:7, nokambilana konsho iyi:
-
N’cinji camufunika kucita kuti muziteteze kwa Satana na viŵanda vake?
ŴANTHU AYAKINE OKAMBA KUTI: “Kuchaya magemu olo kuonelela mafilimu a zamizimu kuliye vuto iliyonse. Ni masoŵela tyala.”
-
Ndaŵa yanji maganizo oteti ni aipa?
MFUNDO ZACIDULE
Angelo okhulupilika otiyavya. Satana na viŵanda vake ni adani a Yehova, ndipo oseŵenzesha zamizimu kuti apatushe ŵanthu kwa Mulungu.
Kuwelezhya mfundo zikulu-zikulu
-
Kansi angelo okhulupilika oyayva tyani ŵanthu kuphunzila za Yehova?
-
Kansi Satana na viŵanda vake ni ŵani?
-
Ndaŵa yanji mufunika kupewa zamizimu?
FUFUZANI
Onani umboni woonesha kuti Yesu niye Mikayeli, mkulu wa angelo.
“Kansi Mikayeli Mkulu wa Angelo ni Ŵani?” (Nkhani yupezeka tyala pa webusaiti)
Onani umboni uonesha kuti Maleŵania aliko cendi.
“Kansi Maleŵania Aliko Cendi?” (Nkhani yupezeka tyala pa webusaiti)
Onani mwecimasukila munakazi muyakine ku zamizimu.
Onani mwamene Satana oseŵenzeshela zamizimu pofuna kupatusha ŵanthu kwa Mulungu.
“Kuziŵa Zacendi pa Nkhani ya Masenga na Ufwiti” (Njila ya Kumoyo Wamuyaya, mbali 5)
