MUTU 25
Kansi Mulungu Ali Nase na Colinga Canji?
Baibo yufotokoza kuti umoyo wa ŵanthu ni ‘ufupi koma ni wozula na mavuto.’ (Yobu 14:1) Kansi Mulungu enzofuna kuti tinkhale na umoyo woteti? Ngati yai, kansi ali nase na colinga canji? Kansi colinga ici cikakwanilishiwe? Tiyeni tikambilane mayankho otonthoza a m’Baibo.
1. Kansi Yehova ofuna kuti tinkhale na umoyo wotyani?
Yehova ofuna kuti tinkhale na umoyo wabwino ngako. Pecilenga Adamu na Eva, eŵaika m’munda wokongola wa Edeni. Ndipo “Mulungu eŵadalisa noŵauzhya kuti: ‘Muvyalane, mupake, muzuzhye calo.’” (Genesis 1:28) Yehova enzofuna kuti Adamu na Eva ankhale na ŵana, apange calo conse kunkhala paladaiso, nosamalila vinyama. Colinga cake cenze cakuti ŵanthu onse ankhale na thanzi yangwilo nosangalala na moyo kosasila.
Olo kuti zinthu zesokonezeka, a Mulungu aliyocinje colinga cake. (Yesaya 46:10, 11) Colinga cake cikali cakuti ŵanthu omvwila akasangalale na moyo wosasila m’paladaiso.—Ŵelengani Chivumbulutso 21:3, 4.
2. Tingacitenji kuti tinkhale na umoyo watanthauzo olo pali lomba?
Yehova etilenga na mtima wofuna kumuziŵa nomulambila. (Ŵelengani Mateyu 5:3-6.) Ofuna kuti tinkhale naye pa ushamwali wotang’a, “tikoyenda m’njila zake zonse, kumukonda” nomutumikila “na mtima [wasu] wonse.” (Deuteronomo 10:12; Salimo 25:14) Ngati tucita izi, tingankhale na umoyo wacimwemwe olo kuti tukumana na mavuto. Ngati tulambila Yehova, umoyo wasu unkhala watanthauzo, cifukwa tucita zinthu mokatizhyana na cifunilo cake.
PHUNZILANI ZINYINJI
Phunzilani za cikondi cikulu cecionesha Yehova peenzokonza calo kuti ŵanthu ankhalemo. Onani soti zayuphunzisa Baibo zokhuza colinga ca moyo.
3. Yehova ofuna kuti ŵanthu ankhale na umoyo wabwino ngako
Onelelani VIDYO, nokambilana konsho iyi:
-
Ndaŵa yanji Mulungu elenga calo?
Ŵelengani Mlaliki 3:11, nokambilana konsho iyi:
-
Kansi pa lemba iyi mwaphunzilapo cinji ponena za colinga ca Yehova?
4. Colinga ca Yehova ciliyocinje
Ŵelengani Salimo 37:11, 29 na Yesaya 55:11, nokambilana konsho iyi:
-
Kansi tuziŵa tyani kuti colinga ca Yehova ciliyocinje?
Ng’anda yoonongeka ingakonzewe soti. Molingana na izi, Mulungu akakonze soti calo camene ŵanthu aciononga
5. Ngati tulambila Yehova, umoyo wasu unkhala watanthauzo
Kuziŵa colinga ca moyo kungatiletele cimwemwe. Onelelani VIDYO, nokambilana konsho iyi:
-
Kansi Terumi epindula tyani peciziŵa colinga ca moyo?
Ŵelengani Mlaliki 12:13, nokambilana konsho iyi:
-
Kansi tingaoneshe tyani kuti tumuyamikila Yehova pa zinthu zawaticitila?
ŴANTHU AYAKINE ANGAKONSHE KUTI: “Kansi moyo uli na colinga?”
-
Mweo mungayankhe kuti tyani?
MFUNDO ZACIDULE
Yehova ofuna kuti tikasangalale na moyo wangwilo kosasila pano pacalo. Ngati tumulambila na mtima wasu wonse, umoyo wasu unkhala watanthauzo olo pali lomba.
Kuwelezhya mfundo zikulu-zikulu
-
Kansi Yehova enzofuna kuti Adamu na Eva ankhale na umoyo wotyani?
-
Tuziŵa tyani kuti colinga ca Mulungu pa ŵanthu ciliyocinje?
-
Mungacitenji kuti munkhale na umoyo watanthauzo olo pali lomba?
FUFUZANI
Onani umboni wakuti munda wa Edeni wenzeko cendi.
“Kansi Munda wa Edeni Wenzeko Cendi?” (Nsanja ya Olonda, January 1, 2011)
Onani cifukwa cake tingankhale osimikizhya kuti calo cinkhalepo mpaka kale-kale.
“Kansi Calo Cikaonongewe?” (Nkhani yupezeka tyala pa webusaiti)
Onani zayuphunzisa Baibo zokhuza mwamungankhalile na umoyo watanthauzo.
“Kansi Colinga ca Moyo N’cinji?” (Nkhani yupezeka tyala pa webusaiti)
Munalume muyakine enzoganiza kuti ali na ciliconse pa umoyo wake. Koma pavuli pake ezindikila kuti pali zinthu ziyakine zenzosoŵekela. Kansi zecitika tyani?
a M’mutu wokonkhapo, mukaphunzile mwezesokonezekela zinthu.
