MUTU 26
Ndaŵa Yanji Pacalo Pali Mavuto?
“Ndaŵa yanji?” Iyi ni konsho yakukonsha ŵanthu anyinji ngati pacitika vinthu viipa. Nise osangalala kuti Baibo yuyankha konsho iyi!
1. Kansi Satana eyambisha tyani mavuto pacalo?
Satana Maleŵania epondokela Mulungu. Enzofuna kulamulila zolengewa ziyakine. Tetyo, esonkhezela Adamu na Eva kuti apondokele Mulungu. Ecita izi mwa kuuzhya Eva vinthu vawenye. (Genesis 3:1-5) Emucitisha kuganiza kuti Yehova enzomutana vinthu viyakine vabwino. Zecikamba zeonesha kuti ŵanthu angankhale mphela osangalala olo kuti omvwila lini Mulungu. Wenye woyamba wecitala Satana ni wakuti Eva angafwe lini. Niye cifukwa cake Baibo yukamba kuti Satana “ni wawenye koma soti wisi wa wenye.”—Yohane 8:44.
2. Kansi Adamu na Eva esankha kucita cinji?
Yehova epasa Adamu na Eva ciliconse cenzofuna. Eŵauzhya kuti akokulya votwala vonse venze m’munda wa Edeni, kupatulapo tyala va m’cimuti cimozi. (Genesis 2:15-17) Koma mwadala esankha kulya votwala va m’cimuti ceciŵalesha. Eva “ethyola cotwala ca m’cimuti na kulya.” Pavuli pake “naye Adamu ecilya.” (Genesis 3:6) Onse aliyomvwile Mulungu. Zenze zosavuta kuti Adamu na Eva acite zinthu zoyenela cifukwa enze angwilo. Koma cifukwa cakuti aliyomvwile Mulungu mwadala, ecimwa nokana ulamulilo wake. Cosankha ici ceŵaletela mavuto akulu.—Genesis 3:16-19.
3. Kansi zecicita Adamu na Eva zutikhuza tyani?
Adamu na Eva pecicimwa, etaya umoyo wangwilo ndipo mbadwa zao zonse zetolelako ucimo. Ponena za Adamu, Baibo yukamba kuti: “Ucimo weloŵa m’calo kupitila mwa munthu m’mozi, na imfwa kupitila mwa ucimo, ndipo imfwa yefalikila ku ŵanthu onse.”—Aroma 5:12.
Pali vifukwa vinyinji vucitisha kuti tikovutika. Nthawi ziyakine tukumana na mavuto cifukwa ca vosankha viipa vatingapange. Mavuto ayakine owela cifukwa ca vosankha viipa vakupanga ŵanthu ayakine. Ndipo nthawi ziyakine tuvutika cifukwa cakuti tapezeka pamalo olakwika panthawi yolakwika.—Ŵelengani Mlaliki 9:11.
PHUNZILANI ZINYINJI
Onani cifukwa cake ni Mulungu lini ocitisha mavuto yatukumana nayo. Onani soti mwakumvwila akaona kuti tuvutika.
4. Wamene ocitisha mavuto yatukumana nayo
Ŵanthu anyinji okhulupilila kuti Mulungu ndiye olamulila cino calo. Koma kansi izi n’zacendi? Onelelani VIDYO.
Ŵelengani Yakobo 1:13 na 1 Yohane 5:19, nokambilana konsho iyi:
-
Kansi Mulungu ndiye ocitisha mavuto?
5. Zawacita ulamulilo wa Satana
Ŵelengani Genesis 3:1-6, nokambilana makonsho aŵa:
-
Kansi ni wenye wotyani wecitala Satana?—Onani mavesi 4 na 5.
-
Ni mau otyani yecilaŵila Satana oonesha kuti Yehova otana ŵanthu ŵake vinthu vabwino?
-
Molingana na zecikamba Satana, kansi ŵanthu ofunika kulamuliliwa na Yehova kuti ankhale osangalala?
Ŵelengani Mlaliki 8:9, nokambilana konsho iyi:
-
N’cinji cacitika panthawi yonse yamene ŵanthu ankhala osalamuliliwa na Yehova?
-
Adamu na Eva enze angwilo ndipo enzonkhala m’paladaiso. Koma emvwila Satana ndipo epondokela Yehova
-
Kupondoka kwecitisha kuti pacalo pankhale ucimo, kuvutika na imfwa
-
Yehova akacosepo ucimo, kuvutika na imfwa. Ndipo ŵanthu akankhale soti angwilo m’paladaiso
6. Yehova okhuzika ngati tuvutika
Kansi Mulungu akumvwa tyani ngati tuvutika? Onani zecilemba Mfumu Davide na mtumwi Petulo. Ŵelengani Salimo 31:7 na 1 Petulo 5:7, nokambilana konsho iyi:
-
Kansi mukumvwa tyani poziŵa kuti Yehova akumvwa caipa ngati tuvutika?
7. Mulungu akacosepo mavuto onse yakukumana nayo ŵanthu
Ŵelengani Yesaya 65:17 na Chivumbulutso 21:3, 4, nokambilana konsho iyi:
-
Ndaŵa yanji n’cinthu cotonthoza kuziŵa kuti Yehova akacosepo mavuto onse yakukumana nayo ŵanthu?
Kansi muziŵa?
Satana pecitala wenye woyamba, eneneza Yehova. M’mau ayakine, tinganene kuti eipisha zina ya Yehova mwa kunena kuti ni wolamulila wankhanza. Yehova akayocosapo mavuto yonse yakukumana nayo ŵanthu, akatuŵishe zina yake. Akayocita izi, akaoneshe kuti ulamulilo wake ndiye woyenelela. Kutuŵishiwa kwa zina ya Yehova ni imozi mwa nkhani zofunika ngako m’cilengedwe.—Mateyu 6:9, 10.
ŴANTHU AYAKINE OKAMBA KUTI: “Ni cifunilo ca Mulungu kuti tikovutika.”
-
Kansi mungayankhe kuti tyani?
MFUNDO ZACIDULE
Satana Maleŵania, pamozi na Adamu na Eva, ndiye eyambisha mavuto pano pacalo. Yehova akumvwa caipa akaona ŵanthu ovutika, ndipo lombapano acosepo mavuto onse.
Kuwelezhya mfundo zikulu-zikulu
-
Kansi Satana Maleŵania etala wenye wotyani kwa Eva?
-
Kansi kupondoka kwa Adamu na Eva kwatikhuza tyani tonse?
-
Tuziŵa tyani kuti Yehova akumvwa caipa akaona kuti tuvutika?
FUFUZANI
Kansi ucimo n’cinji? Onani zayukamba Baibo.
Phunzilani zinyinji pa nkhani yeciyambisha Satana m’munda wa Edeni.
“Ndaŵa Yanji Mulungu Olola Kuti Ŵanthu Akovutika?” (Nsanja ya Olonda, January 1, 2014)
Pezani mayankho yotonthoza pa konsho yovuta ngako.
Onani zeciphunzila munthu muyakine pa mavuto yenzoona.
