MUTU 27
Kansi Imfwa ya Yesu Yutipindulisha Tyani?
Kupondoka kwa makolo ŵasu oyambilila Adamu na Eva, kwacitisha kuti tinkhale ocimwa, tikovutika na kufwa. a Koma tili na ciyembekezo. Yehova wapanga makonzedwe akuti atimasule ku ucimo na imfwa kupitila mwa Mwana wake, Yesu Khristu. Baibo yuphunzisa kuti kupitila mu imfwa yake, Yesu epeleka dipo. Dipo ni malipilo amene opelekewa kuti munthu muyakine amasuliwe. Dipo yecilipila Yesu ni moyo wake wangwilo monga munthu. (Ŵelengani Mateyu 20:28.) Yesu epeleka moyo wake mofunishisha. Izi zecitisha kuti tinkhale na ciyembekezo ca kuyonkhala na moyo wecitaya Adamu na Eva. Zecicita Yesu zeonesha kuti yove pamozi na Yehova otikonda ngako. Zati muphunzile m’mutu uno zikulishe ciyamikilo canu pa zecicita Yesu.
1. Kansi imfwa ya Yesu yutipindulisha tyani olo pali lomba?
Cifukwa cakuti nise ocimwa, tucita vinthu vinyinji vosakondwelesha Yehova. Koma tingankhale pa ushamwali wotang’a na Mulungu ngati talapa macimo ŵasu, kusenga Yehova kuti atikhululukile kupitila mwa Yesu Khristu, noyesayesa kupewa kuwelezhyapo macimo amozi na amozi. (1 Yohane 2:1) Baibo yukamba kuti: “Khristu efwila macimo kamozi tyala. Munthu wolungama efwila ŵanthu osalungama kuti akufwikisheni kwa Mulungu.”—1 Petulo 3:18.
2. Kansi imfwa ya Yesu ikatipindulishe tyani msogolo?
Yehova etuma Yesu kuti apeleke moyo wake wangwilo monga munthu “kuti aliyense wokhulupilila [Yesu] asaonongeke koma ankhale na moyo wosasila.” (Yohane 3:16) Cifukwa ca imfwa ya Yesu, Yehova akacosepo mavuto onse amene ewela cifukwa ca kupondoka kwa Adamu. Izi zutanthauza kuti ngati tukhulupilila imfwa ya Yesu, tingankhale na mwai wa kuyosangalala na moyo wosasila m’paladaiso pacalo!—Yesaya 65:21-23.
PHUNZILANI ZINYINJI
Onani cifukwa cake Yesu epeleka moyo wake na mwamungapindulile na imfwa yake.
3. Imfwa ya Yesu yetimasula ku ucimo na imfwa
Onelelani VIDYO, nokambilana konsho yokonkhapo.
-
Kansi Adamu etaya mwai wotyani pecipondokela Mulungu?
Ŵelengani Aroma 5:12, nokambilana konsho iyi:
-
Ni mavuto yotyani yamukumana nayo cifukwa ca ucimo wa Adamu?
Ŵelengani Yohane 3:16, nokambilana konsho iyi:
-
Ndaŵa yanji Yehova etuma Mwana wake kuwela pacalo?
-
Adamu enze munthu wangwilo koma aliyomvwile Mulungu. Cifukwa ca izi, ŵanthu enkhala ocimwa ndipo akufwa
-
Yesu enze munthu wangwilo koma emvwila Mulungu. Izi zecitisha kuti ŵanthu ankhale na mwai wonkhala na ciyembekezo conkhala na thanzi yangwilo koma soti moyo wosasila
4. Imfwa ya Yesu ingapindulishe ŵanthu onse
Onelelani VIDYO, nokambilana konsho yokonkhapo.
-
Kansi zingakwanishike tyani kuti imfwa ya munthu m’mozi ipindulishe ŵanthu onse?
Ŵelengani 1 Timoteyo 2:5, 6, nokambilana konsho iyi:
-
Adamu enze munthu wangwilo. Koma cifukwa cakuti ecimwa, ŵanthu onse ovyalika na ucimo ndipo akufwa. Naye Yesu enze munthu wangwilo. Tetyo, kansi dipo yecipeleka yenkhala tyani “yokwanila ndendende”?
5. Dipo ni mphaso yapadela yocokela kwa Yehova
Ashamwali a Yehova oona dipo kunkhala mphaso yao yapadela. Mwacisanzo, ŵelengani Agalatiya 2:20, nokambilana konsho iyi:
-
Kansi mtumwi Paulo eonesha tyani kuti enzoona dipo kunkhala mphaso yake yapadela?
Adamu pecicimwa, yove na mbadwa zake eyamba kufwa. Koma Yehova etuma Mwana wake kuti azafwile ŵanthu noŵapasa mwai wa kuyosangalala na moyo wosasila.
Pamuŵelenga mavesi aŵa, ganizilani mwecimvwila Yehova penzovutika Mwana wake. Ŵelengani Yohane 19:1-7, 16-18, nokambilana konsho iyi:
-
Kansi mukumvwa tyani mukaganizila zecikucitilani Yehova na Yesu?
ŴANTHU AYAKINE ANGAKONSHE KUTI: “Kansi zingakwanishike tyani kuti munthu m’mozi afwile ŵanthu onse?”
-
Mweo mungayankhe kuti tyani?
MFUNDO ZACIDULE
Imfwa ya Yesu yecitisha kuti Yehova akotikhululukila macimo ŵasu ndipo yetipasa mwai wakuti tikasangalale na moyo wosasila.
Kuwelezhya mfundo zikulu-zikulu
-
Ndaŵa yanji Yesu ecifwa?
-
Kansi imfwa ya Yesu yenkhala tyani dipo yokwanila ndendende?
-
Kansi imfwa ya Yesu ingakupindulisheni tyani?
FUFUZANI
Onani cifukwa cake moyo wa Yesu wangwilo monga munthu uitiwa kuti dipo.
“Kansi Imfwa ya Yesu Yenkhala Tyani Dipo ya Ŵanthu Anyinji?” (Nkhani yupezeka tyala pa webusaiti)
Onani zatufunikila kucita kuti timasuliwe ku ucimo na imfwa.
“Kansi Yesu Otipulumusa Tyani?” (Nkhani yupezeka tyala pa webusaiti)
Kansi Yehova angatikhululukile olo macimo akulu-akulu?
“Kuyankha Makonsho a m’Baibo” (Nsanja ya Olonda, May 1, 2013)
Onani mwamene kuphunzila za imfwa ya Khristu kweyavyila munalume muyakine kuti acinje umunthu wake.
a Mau akuti cimo otanthauza lini tyala kucita vinthu viipa. Koma otanthauza soti mnkhalidwe watilimo wetetolela ku makolo oyambilila.
