MUTU 28
Yamikilani Zinthu Zecikucitilani Yehova na Yesu
Kansi mukumvwa tyani ngati muyanu wakupasani mphaso yabwino ngako? Mosakaikila, munkhala osangalala ndipo mumuyamikila. Yehova na Yesu etipasa mphaso yamtengo wapatali, yamene ni dipo. Kansi tingaoneshe tyani kuti tuyamikila mphaso iyi?
1. Ni njila imozi yotyani yatingaoneshele kuti tuyamikila zeciticitila Mulungu na Khristu?
Baibo yukamba kuti aliyense “wokhulupilila [Yesu]” akankhale na moyo kosasila. (Yohane 3:16) Kansi tingaoneshe tyani kuti tukhulupilila Yesu? Tingaoneshe kuti tukhulupilila Yesu mwa zosankha na zocita zasu. (Yakobo 2:17) Ngati tuonesha cikhulupililo casu mwa zocita na zokamba, tutang’isha ushamwali wasu na Yesu na Ausuwake, Yehova.—Ŵelengani Yohane 14:21.
2. Ni cocitika capadela cotyani camene cutiyavya kuonesha kuyamikila pa zecicita Yehova na Yesu?
Yesu akaliyokufwa, euzhya ophunzila ŵake njila iyakine yaangaoneshele kuyamikila imfwa yake. Eŵauzhya kuti akocita mwambo wapadela wamene Baibo yuuita kuti “Cakulya ca M’cingulo ca Asikulu,” kapena kuti Cikumbuso ca Imfwa ya Khristu. (1 Akorinto 11:20) Yesu enzofuna kuti atumwi ŵake, kuyangizhyilapo Akhristu onse acendi, akokumbukila zeciticitila popeleka moyo wake. Tetyo, epeleka lamulo yakuti: “Mukocita izi ponikumbukila.” (Luka 22:19) Mukapezeka pa Cikumbuso, muonesha kuti muyamikila cikondi cikulu cecitionesha Yehova na Yesu.
PHUNZILANI ZINYINJI
Onani njila ziyakine zamungaoneshele kuti muyamikila cikondi ca Yehova na Yesu. Onani soti cifukwa cake tufunika kukumbukila imfwa ya Khristu.
3. Mwatingaoneshele kuti tuyamikila
Ganizilani kuti munthu muyakine wakupulumusani ku ngozi. Kansi mungaluŵe zawakucitilani? Kapena mungapeze njila zooneshela kuyamikila?
Tili na mwai wa kuyolandila moyo wosasila cifukwa ca cifundo ca Yehova. Ŵelengani 1 Yohane 4:8-10, nokambilana makonsho aŵa:
-
Ndaŵa yanji imfwa ya Yesu ni mphaso yapadela?
-
Kansi mukumvwa tyani mukaganizila zecikucitilani Yehova na Yesu?
Tingaoneshe tyani kuti tuyamikila zeciticitila Yehova na Yesu? Ŵelengani 2 Akorinto 5:15 na 1 Yohane 4:11; 5:3. Mukaŵelenga lemba iliyonse, kambilanani konsho iyi:
-
Kulingana na lemba iyi, kansi tingaoneshe tyani kuti tuyamikila?
4. Tolelani cisanzo ca Yesu
Njila iyakine yatingaoneshele kuyamikila ni mwa kutolela cisanzo ca Yesu. Ŵelengani 1 Petulo 2:21, nokambilana konsho iyi:
-
Kansi tingakonkhe maluwayo a Yesu mosamala m’njila zotyani?
Yesu enzokonda Mau a Mulungu, enzolalikila uthenga wabwino ndipo enzoyavya ŵanthu ayakine
5. Mukopezekapo pa mwambo wokumbukila imfwa ya Khristu
Kuti muone zecitika Yesu peciyambisha mwambo wa Cakulya ca M’cingulo ca Asikulu, ŵelengani Luka 22:14, 19, 20, nokambilana makonsho aŵa:
-
N’cinji cecitika pa mwambo wa Cakulya ca M’cingulo ca Asikulu?
-
Kansi mkate na vinyu vupanamila cinji?—Onani mavesi 19 na 20.
Yesu enzofuna kuti ophunzila ŵake akocita mwambo wokumbukila imfwa yake kamozi pa caka. Ici ndiye cifukwa cake Mboni za Yehova zukumana kamozi pa caka kuti zikumbukile imfwa ya Khristu. Kuti muone cifukwa cake mwambo uyu ni wofunika ngako, onelelani VIDYO, nokambilana konsho iyi:
-
N’cinji cucitika pa Cikumbuso?
Mkate na vinyu zupanamila vinthu viyakine. Mkate upanamila muŵili wangwilo wecipeleka Yesu. Vinyu upanamila milopa yake
ŴANTHU AYAKINE OKAMBA KUTI: “Kuti upulumuke, ufunika tyala kukhulupilila Yesu.”
-
Kansi mungaseŵenzeshe tyani lemba ya Yohane 3:16 na Yakobo 2:17 kuti muoneshe kuti pali ziyakine zofunika?
MFUNDO ZACIDULE
Tuonesha kuti tuyamikila zeciticitila Yesu mwa kumukhulupilila nopezeka pa mwambo wokumbukila imfwa yake.
Kuwelezhya mfundo zikulu-zikulu
-
Tingaoneshe tyani kuti tukhulupilila Yesu?
-
Kansi mweo mungaoneshe tyani kuti muyamikila zecikucitilani Yehova na Yesu?
-
Ndaŵa yanji tufunika kupezeka pa mwambo wokumbukila imfwa ya Khristu?
FUFUZANI
Kansi imfwa ya Khristu yutisonkhezela kucitanji?
Phunzilani zinyinji zokhuza cikhulupililo na mwatingacioneshele.
“Nkhalani na Cikhulupililo m’Malonjezo a Yehova” (Nsanja ya Mlonda, October 2016)
Ŵelengani nkhani yakuti “Nuona Kuti N’ne Mtuŵa Ndipo Nili na Umoyo Wopindulisha,” kuti muone mwewecinjila umoyo wa munakazi muyakine pecimvwisha tanthauzo ya imfwa ya Khristu.
“Baibo Yucinja Umoyo wa Ŵanthu” (Nsanja ya Olonda, August 1, 2011)
Onani cifukwa cake ni ŵanthu tyala atontho akulya viphiphiliso pa Cikumbuso.
“Ndaŵa Yanji Mboni za Yehova Zucita Mwambo Wokumbukila Imfwa ya Yesu Mosiyana na Vipembezo Viyakine?” (Nkhani yupezeka tyala pa webusaiti)
