MUTU 29

N’cinji Cucitika Tikafwa?

MVWISHILANI

Kansi pali munthu wamukonda wamene emwalila? Ngati munthu watukonda wamwalila, payakine tingazikonshe kuti: N’cinji cucitika tikafwa? Kansi pali ciyembekezo cakuti tikaŵaone soti okondeka ŵasu emwalila? M’mutu uno na wokonkhapo, tikambilane mayankho otonthoza a m’Baibo.

1. N’cinji cucitika tikafwa?

Yesu elinganizhya imfwa na tulo twakufwa nato. Ngati munthu ali m’tulo twakufwa nato, oziŵa lini zucitika. Kansi imfwa yulingana tyani na tulo twakufwa nato? Ngati munthu wamwalila, akumvwa lini voŵaŵa ndipo osungulumwa lini. Baibo yukamba kuti: “Akufwa oziŵa lini ciliconse.”—Ŵelengani Mlaliki 9:5.

2. Kansi kuziŵa zucitika munthu akafwa kutipindulisha tyani?

Ŵanthu anyinji oyopa imfwa, ndipo oyopa soti akufwa! Koma zayuphunzisa Baibo zokhuza imfwa zingakutonthozeni. Yesu ekamba kuti: “Cendi cikakumasuleni.” (Yohane 8:32) Vipembezo viyakine vuphunzisa kuti pali cinthu ciyakine camene cupitilizhya kunkhala na moyo ngati munthu wafwa. Koma Baibo yuphunzisa zosiyana na izi. Ngati munthu wafwa, ovutika lini. Ndipo pofwana kuti akufwa oziŵa lini ciliconse, angaticitile lini vinthu viipa. Tetyo, tufunika lini kulambila ŵanthu ecifwa, olo kucita vinthu voonesha kuti tufuna kuŵakondwelesha. Ndipo tufunika lini kuŵapemphelela.

Ŵanthu ayakine okamba kuti angakwanishe kulaŵila na ŵanthu ecifwa. Koma izo ni zosakwanishika, cifukwa akufwa oziŵa lini ciliconse. Ŵala amene oganiza kuti okwanisha kulaŵila na okondeka ŵao ecifwa, m’cenecene okambilana na viŵanda, vamene vuzipanga monga ni ŵanthu ecifwa. Tetyo, kuziŵa cendi cokhuza akufwa kutiteteza ku viŵanda. Yehova oticenjeza kuti tufunika lini kukambilana na ŵanthu ecifwa, cifukwa oziŵa kuti kulaŵizhyana na viŵanda kungationonge.—Ŵelengani Deuteronomo 18:10-12.

PHUNZILANI ZINYINJI

Phunzilani ziyakine zayuphunzisa Baibo zokhuza imfwa ndipo tang’ishani cikhulupililo canu mwa Mulungu wacikondi, wamene onzunza lini ŵanthu ecifwa ku mulilo.

3. Ziŵani zenezene zucitika ngati munthu wafwa

Pacalo conse, ŵanthu okhulupilila zinthu zosiyanasiyana zokhuza zucitika ngati munthu wafwa. Koma zikhulupililo zinyinji n’zawenye.

Kansi kudela kwamunkhala, ŵanthu anyinji okhulupilila zotyani zokhuza akufwa?

Kuti muone zayuphunzisa Baibo, onelelani VIDYO.

VIDYO: N’cinji Cucitika Munthu Akafwa?—Kambali kake (1:19)

Ŵelengani Mlaliki 3:20, nokambilana makonsho aŵa:

Kulingana na lemba iyi, n’cinji cucitika munthu akafwa?
Kansi pali ciyakine cupitilizhya kunkhala na moyo munthu akafwa?

Baibo yutiuzhya za imfwa ya Lazaro, wamene enze muyake wa Yesu. Pamuŵelenga Yohane 11:11-14, onani zecifotokoza Yesu zokhuza Lazaro peecifwa, ndipo kambilanani makonsho aŵa:

Kansi Yesu elinganizhya imfwa na cinji?
Kansi izi zuonesha kuti n’cinji cucitika munthu akafwa?
Kansi muona kuti pali cifukwa comvwika cokhulupilila zayufotokoza Baibo zokhuza imfwa?

4. Kuziŵa cendi cokhuza imfwa kutipindulisha

Kuziŵa cendi cokhuza imfwa kutiyavya kuti osati tikoyopa akufwa. Ŵelengani Mlaliki 9:10, nokambilana konsho iyi:

Kansi akufwa angationonge?

Cendi ca m’Baibo cutiteteza soti ku wenye wakuti tufunika kulambila akufwa olo kucita vinthu voonesha kuti tufuna kuŵakondwelesha. Ŵelengani Yesaya 8:19 na Chivumbulutso 4:11, nokambilana konsho iyi:

Muganiza kuti Yehova oŵaona tyani ŵanthu amene olambila akufwa olo kufuna thandizo yao?

Kuziŵa cendi cokhuza imfwa kutimasula ku miyambo yosakondwelesha Yehova

5. Kuziŵa cendi cokhuza imfwa kutitonthoza

Ŵanthu anyinji ophunzisiwa kuti akayomwalila, akapye cifukwa ca vinthu viipa veenzocita akali moyo. Koma tutonthozewa poziŵa kuti munthu akafwa onzunzika lini, kuyangizhyilapo ŵala amene enzocita vinthu viipa akali moyo. Ŵelengani Aroma 6:7, nokambilana konsho iyi:

Kulingana na zataŵelenga pa lemba iyi, Baibo yukamba kuti ngati munthu wafwa, omasuliwa ku ucimo. Tetyo, kansi muganiza kuti ŵanthu onse ecifwa onzunziwa cifukwa ca vinthu viipa venzocita akali moyo?

Tikamuziŵa bwino Yehova, tufwika pozindikila kuti angashoke lini ŵanthu ecifwa ku mulilo. Ŵelengani Deuteronomo 32:4 na 1 Yohane 4:8, nokambilana makonsho aŵa:

Kansi Mulungu, wamene ali na minkhalidwe yataŵelenga m’mavesi aŵa, angashoke ŵanthu ecifwa ku mulilo?
Kansi mwatonthozewa poziŵa zenezene zucitika ngati munthu wafwa? Ndaŵa yanji?

ŴANTHU AYAKINE OKAMBA KUTI: “Nuyopa nikaganizila zati zikanicitikile nikayokufwa.”