MUTU 30
Okondeka Ŵanu Akaukishiwe!
Tunkhala na cisoni cikulu ngako ngati munthu watukonda wamwalila. Niye cifukwa cake Baibo yukamba kuti imfwa ni mdani. (1 Akorinto 15:26) M’mutu 27, mwephunzila kuti Yehova akamugonjese mdani wamene uyu. Koma kansi n’cinji cati cikacitikile ŵanthu amene ecifwa kale? M’mutu uno, muphunzile za lonjezo iyakine yocitisha cidwi ya Yehova. Yehova walonjeza kuti akaukishe ŵanthu mabiliyoni kuti akasangalale na moyo kosasila. Koma kansi izi zingacitike cendi? Kansi ŵanthu ati akaukishiwe akankhale kululu olo pacalo?
1. Kansi Yehova walonjeza kuti acitenji kuli okondeka ŵasu amene emwalila?
Yehova ofunishisha kuukisha ŵanthu ecifwa. Munthu wokhulupilika Yobu enze na cidalilo cakuti Yehova akamuluŵe lini akayokufwa. Euzhya Mulungu kuti: “Mukaite ndipo neo nikayankhe [kucokela ku manda].”—Ŵelengani Yobu 14:13-15.
2. Kansi tuziŵa tyani kuti akufwa akauke cendi?
Yesu peenze pacalo, Mulungu emupasa mphamvu zoukisha ŵanthu. Yesu eukisha kamsimbi ka vyaka 12 na mwana munalume wa munakazi wamasiye. (Maliko 5:41, 42; Luka 7:12-15) Pavuli pake, Lazaro, wamene enze muyake wa Yesu ecifwa. Olo kuti Lazaro enze enkhala m’manda kwa masiku 4, Yesu emuukisha. Yesu epemphela kwa Mulungu ndipo pavuli pake ekamba kuti: “Lazaro, fuma!” Ndipo “munthu ula enze wakufwa efuma.” (Yohane 11:43, 44) Ganizilani cimwemwe cecinkhala naco ayake a Lazaro na abanja ŵake.
3. Kansi muyembekezela kuti n’cinji cati cikacitikile abanja ŵanu emwalila?
Baibo yulonjeza kuti: “Kukankhale kuuka.” (Machitidwe 24:15) Ŵanthu ŵeciukisha Yesu enze aliyolute kululu. (Yohane 3:13) Yesu eŵaukishila pano pacalo ndipo enze osangalala. N’cimozimozi na zati zicitike msogolo. Ŵanthu mabiliyoni ŵati akaukishe Yesu, akasangalale na moyo kosasila m’paladaiso pacalo. Yesu ekamba kuti “onse ali m’manda acikumbuso akaukishiwe.” Ŵanthu aŵa oyangizhyilapo ŵala amene mwina tingaŵaluŵe, koma Mulungu oŵakumbukila—Yohane 5:28, 29.
PHUNZILANI ZINYINJI
Onani umboni wa m’Baibo woonesha kuti akufwa akaukishiwe cendi. Onani soti mwamungapezele citonthozo nonkhala na ciyembekezo cifukwa coziŵa kuti akufwa akaukishiwe.
4. Zecicita Yesu zeonesha kuti ali na mphamvu zoukisha akufwa
Onani zecicita Yesu kuli muyake Lazaro. Ŵelengani Yohane 11:14, 38-44, nokambilana makonsho aŵa:
-
Kansi tuziŵa tyani kuti Lazaro enze ecifwa cendi?—Onani vesi 39.
-
Ngati kuti Lazaro enze eluta kululu, muganiza kuti sembe Yesu emuukishila soti pano pacalo?
5. Ŵanthu anyinji akaukishiwe!
Ŵelengani Salimo 37:29, nokambilana konsho iyi:
-
Kansi ŵanthu mabiliyoni ati akaukishiwe akankhale kuni?
Yesu akaukishe ŵanthu anyinji, osati tyala ŵala enzolambila Yehova. Ŵelengani Machitidwe 24:15, nokambilana konsho iyi:
-
Ni ŵani wamungakonde kuti akaukishiwe?
Ganizilani izi: Yesu angaukishe munthu emwalila mosavuta monga ni mwaingacitile kolo kuusha mwana wake wamene ali m’tulo
6. Ciukililo cingakutonthozeni nokupasani ciyembekezo
Nkhani ya m’Baibo ya kuukishiwa kwa mwana wa Yairo yatonthoza nolimbikisha ŵanthu anyinji amene ali na cisoni. Ŵelengani nkhani iyi yacendi pa Luka 8:40-42, 49-56.
Akaliyoukisha mwana munakazi wa Yairo, Yesu euzhya Yairo kuti: “Usayope, nkhala tyala na cikhulupililo.” (Onani vesi 50.) Kansi ciyembekezo ca ciukililo cingakuyavyeni tyani . . .
-
Ngati munthu wamukonda wamwalila?
-
Ngati moyo wanu uli pangozi?
Onelelani VIDYO, nokambilana konsho iyi:
-
Kansi makolo a Phelicity etonthozewa nolimbikishiwa tyani na ciyembekezo ca ciukililo?
ŴANTHU AYAKINE OKAMBA KUTI: “N’covuta kukhulupilila kuti ŵanthu akufwa angaukishiwe.”
-
Mweo muganiza tyani?
-
Ni lemba yotyani yamungaseŵenzeshe kuti muŵaoneshe kuti akufwa akaukishiwe cendi?
MFUNDO ZACIDULE
Baibo yulonjeza kuti ŵanthu mabiliyoni amene ecifwa akaukishiwe. Yehova ofuna kuti akufwa akankhale soti na moyo, ndipo wapasa Yesu mphamvu zakuti akaŵaukishe.
Kuwelezhya mfundo zikulu-zikulu
-
Tuziŵa tyani kuti Yehova na Yesu ofunishisha kuukisha akufwa?
-
Kansi ŵanthu mabiliyoni ati akaukishiwe akankhale kululu olo pacalo? Ndaŵa yanji mwayankha tetyo?
-
N’cinji cukusimikizhyilani kuti okondeka ŵanu emwalila akankhale soti na moyo?
FUFUZANI
Onani zamungacite kuti mulimbane na cisoni.
“Thandizo kwa Ofilwa” (Galamuka! Na. 3 2018)
Kansi n’cendi kuti mfundo za m’Baibo zingayavye munthu wamene ali na cisoni?
Kansi ŵana angapilile tyani imfwa ya munthu wakukonda?
Kansi ŵanthu onse ati akaukishiwe akalute kululu? Ni ŵani ati akalekoukishiwa?
“Kansi Mau Akuti Kuuka kwa Akufwa Otanthauzanji?” (Nkhani yupezeka tyala pa webusaiti)
