MUTU 31

Kansi Ufumu wa Mulungu n’Cinji?

MVWISHILANI

Nkhani ikulu yufotokozewa m’Baibo, ni yokhuza Ufumu wa Mulungu. Yehova akaseŵenzeshe Ufumu uyu kupanga calo kunkhala Paladaiso. Koma kansi Ufumu wa Mulungu n’cinji? Tuziŵa tyani kuti ulamulila pali lomba? N’cinji cawakwanilishako kale? Nanga ukacite cinji msogolo? Makonsho aŵa ayankhiwe m’mutu uno na mitu iŵili yokonkhapo.

1. Kansi Ufumu wa Mulungu n’cinji? Nanga Mfumu yake ni ŵani?

Ufumu ni boma yecinkhazikisha Mulungu. Mfumu yake ni Yesu Khristu, ndipo olamulila kufumila kululu. (Mateyu 4:17; Yohane 18:36) Ponena za Yesu, Baibo yukamba kuti: “Akalamulile monga . . . mfumu mpaka kale-kale.” (Luka 1:32, 33) Monga Mfumu ya Ufumu wa Mulungu, Yesu akalamulile calo conse.

2. Ni ŵani ati akalamulile na Yesu?

Yesu akalamulile lini yeka. Ŵanthu ocokela “m’fuko iliyonse, cilaŵilo ciliconse, mtundu uliwonse na calo ciliconse . . . akankhale mafumu olamulila calo.” (Chivumbulutso 5:9, 10) Ni angani ati akalamulile pamozi na Khristu? Kufumila pa nthawi yamene Yesu enze pacalo, ŵanthu mamiliyoni ankhala Akhristu. Koma ni a 144,000 tyala amene akuyolamulila na Yesu kululu. (Ŵelengani Chivumbulutso 14:1-4.) Akhristu ayakine onse akankhale nzika za Ufumu uyu pacalo.—Salimo 37:29.

3. Kansi Ufumu wa Mulungu upambana tyani maboma a ŵanthu?

Olamulila aumunthu angayese kucita zinthu zabwino. Koma aliye mphamvu zokwanisha kucita ciliconse cakufuna. M’kuluta kwa nthawi, oloŵewa m’malo na olamulila ayakine, amene payakine onkhala ozikonda ndipo ofuna lini kuyavya nzika zao. Koma Yesu, wamene ni Wolamulila wa Ufumu wa Mulungu, akaloŵewe lini m’malo na aliyense. Mulungu ‘wankhazikisha ufumu wamene ukaonongewe lini.’ (Danieli 2:44) Yesu akayoyamba kulamulila pacalo, akokondela lini munthu aliyense. Ni wacikondi, wacifundo koma soti wacilungamo. Ndipo akaphunzise ŵanthu kuti akocitilana zinthu m’njila imozimozi—mwacikondi, mwacifundo na mwacilungamo.—Ŵelengani Yesaya 11:9.

PHUNZILANI ZINYINJI

Onani cifukwa cake Ufumu wa Mulungu upambana maboma a ŵanthu.

4. Ufumu wa Mulungu ukalamulile calo conse

Yesu Khristu ali na mphamvu ngako kupambana wolamulila aliyense waumunthu. Ŵelengani Mateyu 28:18, nokambilana konsho iyi:

Kansi mphamvu zaali nazo Yesu zusiyana tyani na za olamulila aumunthu?

Maboma a ŵanthu ocinjacinja. Ndipo wolamulila aliyense olamulila calo cake. Koma nanga tyani ponena za Ufumu wa Mulungu? Ŵelengani Danieli 7:14, nokambilana makonsho aŵa:

Ndaŵa yanji n’cinthu colimbikisha kuziŵa kuti Ufumu wa Mulungu “ukaonongewe lini”?
Ndaŵa yanji n’cinthu colimbikisha kuziŵa kuti Ufumu uyu ukalamulile calo conse?

5. Maboma a ŵanthu ofunika kucosewapo

Ndaŵa yanji Ufumu wa Mulungu ufunika kucosapo maboma a ŵanthu? Onelelani VIDYO, nokambilana konsho yokonkhapo.

VIDYO: Kansi Ufumu wa Mulungu n’Cinji? —Kambali kake (1:41)

Kansi ulamulilo wa ŵanthu waleta mavuto ŵanji?

Ŵelengani Mlaliki 8:9, nokambilana makonsho aŵa:

Kansi muona kuti Ufumu wa Mulungu ufunika kuononga maboma a ŵanthu? Ndaŵa yanji?

6. Ufumu wa Mulungu uli na olamulila amene otimvwishisha

Yesu, wamene ni Mfumu yasu, enkhalapo monga munthu. Tetyo, “otimvwila cisoni pa zofooka zasu.” (Aheberi 4:15) Analume na anakazi okhulupilika okwanila 144,000, amene akuyolamulila na Yesu kululu, esankhiwa na Yehova “kucokela m’fuko iliyonse, cilaŵilo ciliconse, mtundu uliwonse na calo ciliconse.”—Chivumbulutso 5:9.

Kansi mwalimbikishiwa poziŵa kuti Yesu na olamulila ayake enkhalako monga ŵanthu? Ndaŵa yanji?

Yehova wasankha analume na anakazi amitundu yonse kuyolamulila na Yesu

7. Ufumu wa Mulungu uli na malamulo abwino ngako

Maboma opanga malamulo amene opindulisha noteteza nzika zao. Nao Ufumu wa Mulungu uli na malamulo amene nzika zake zufunika kuŵakonkha. Ŵelengani 1 Akorinto 6:9-11, nokambilana makonsho aŵa:

Muona kuti calo cingankhale tyani ngati aliyense okonkha malamulo a Mulungu? a
Muona kuti mpoyenela kuti Yehova akoyembekezela nzika za Ufumu kukonkha malamulo ŵake? Ndaŵa yanji?
N’cinji cuonesha kuti olo ŵanthu amene okonkha lini malamulo aŵa angacinje?—Onani vesi 11.