MUTU 34

Tingaoneshe Tyani Kuti Tukonda Yehova?

MVWISHILANI

Kucokela pemweyamba kuphunzila Baibo, kansi mukumvwa kuti lomba muli pafupi ngako na Mulungu? Kansi mungakonde kupitilizhya kutang’isha ushamwali wanu na yove? Ngati n’tetyo, kumbukilani kuti Yehova apitilizhye kukukondani nokusamalilani, ngati oona kuti mupitilizhya kukulisha cikondi canu pali yove. Kansi mungaoneshe tyani kuti mumukonda Yehova?

1. Kansi tingamuoneshe tyani Yehova kuti tumukonda?

Tuonesha kuti tukonda Yehova ngati tumumvwila. (Ŵelengani 1 Yohane 5:3.) Okakamizhya lini munthu aliyense kumumvwila. M’malomwake, opasa aliyense wa seo mwai wosankha kumumvwila kapena yai. Ndaŵa yanji? Yehova ofuna kuti ‘tikomumvwila kucokela pansi pa mtima.’ (Aroma 6:17) Izi zutanthauza kuti mufunika kumumvwila cifukwa comukonda, osati cifukwa cokakamizhyika. Mbali 3 na 4 za buku ino zepangiwa kuti zikuyavyeni kuonesha kuti mumukonda Yehova, mwa kucita zinthu zomukondwelesha nopewa vinthu vumukhumudwisha.

2. Ndaŵa yanji cingankhale covuta kuonesha kuti tumukonda Yehova?

“Masoka a munthu wolungama ni anyinji.” (Salimo 34:19) Tonse tuvutika cifukwa ca kusoŵa ungwilo kwatili nako. Ndipo nthawi ziyakine tingakumane na mavuto azacuma, kusoŵa cilungamo na mavuto ayakine. Tikakumana na mavuto, tingaone kuti n’covuta kucita zinthu zakufuna Yehova. Tingaone kuti njila yacidule ni kucita zinthu zolakwika. Koma ngati mupitilizhya kucita zakufuna Yehova mokhulupilika, muonesha kuti mukonda ngako Yehova kupambana ciliconse kapena aliyense. Ndipo muonesha kuti nimwe wokhulupilika. Mukacita izi, naye Yehova ankhale wokhulupilika kuli mweo, ndipo akusiyeni lini.—Ŵelengani Salimo 4:3.

PHUNZILANI ZINYINJI

Onani cifukwa cake Yehova okondwela ngati mumumvwila, ndipo onani zingakuyavyeni kuti mupitilizhye kumutumikila mokhulupilika.

3. Nkhani yamene yukukhuzani

M’buku ya Yobu, tuŵelenga kuti Satana eneneza Yobu, koma soti ŵanthu onse amene otumikila Yehova. Ŵelengani Yobu 1:1, 6–2:10, nokambilana makonsho aŵa:

Kansi Satana elaŵila kuti Yobu enzotumikila Yehova pa cifukwa canji?—Onani Yobu 1:9-11.
Kansi Satana okamba cinji zokhuza ŵanthu onse, kuyangizhyilapo mweo?—Onani Yobu 2:4.

Ŵelengani Yobu 27:5b, nokambilana konsho iyi:

Kansi Yobu eonesha tyani kuti enzokonda cendi Yehova?

Yobu eonesha kuti enzokonda Yehova mwa kupitilizhya kunkhala wokhulupilika

Nase tuonesha kuti tukonda Yehova ngati tupitilizhya kunkhala okhulupilika

4. Mukokondwelesha mtima wa Yehova

Ŵelengani Miyambo 27:11, nokambilana makonsho aŵa:

Kansi Yehova akumvwa tyani ngati mumumvwila nocita zinthu mwanzelu? Ndaŵa yanji?

5. Mungakwanishe kunkhala okhulupilika kwa Yehova

Cikondi casu pa Yehova cutisonkhezela kuuzhyako ayakine zokhuza yove. Kukhulupilika kwasu kwa Yehova kutilimbikisha kupitilizhya kucita nchito iyi olo pa nthawi yakuti takumana na mavuto. Onelelani VIDYO, nokambilana makonsho aŵa:

VIDYO: Tetezani Cikhulupililo Canu Olo Kuti Musushiwa (5:09)

Kansi nthawi ziyakine muona kuti n’covuta kuuzhyako ayakine zokhuza Yehova?
Mu vidyo iyi, n’cinji ceyavya a Grayson kusilizhya wowa?

Cunkhala cosavuta kunkhala okhulupilika kwa Yehova ngati tukonda zinthu zakukonda nozonda vinthu vakuzonda. Ŵelengani Salimo 97:10, nokambilana makonsho aŵa:

Kulingana na zinthu zamwaphunzila, ni zinthu zotyani zakukonda Yehova? Nanga ni vinthu votyani vakuzonda?
Mungacitenji kuti mukokonda zinthu zabwino, nozonda vinthu viipa?

6. Tupindula ngati tumvwila Yehova

Kumvwila Yehova kutipindulisha nthawi zonse. Ŵelengani Yesaya 48:17, 18, nokambilana makonsho aŵa:

Kansi muona kuti n’cendi kuti Yehova oziŵa bwino zinthu zatufunikila? Ndaŵa yanji?
Kansi mwapindula tyani cifukwa cophunzila Baibo noziŵa Mulungu wacendi, Yehova?

ŴANTHU AYAKINE OKAMBA KUTI: “Vocita vangu vumukhuza lini Mulungu.”