MUTU 36
Citani Vinthu Vonse Moona Mtima
Aliyense ofuna kunkhala pa ushamwali na ŵanthu oona mtima. Naye Yehova ofuna kuti ashamwali ŵake akonkhala oona mtima. Koma kunkhala oona mtima m’calo cino n’kosapepuka, cifukwa ŵanthu anyinji ni osaona mtima. Kansi tupindula tyani ngati tucita vinthu vonse moona mtima?
1. Kansi cifukwa cikulu conkhalila oona mtima ni cotyani?
Ngati tucita zinthu moona mtima na ŵanthu ayakine, tuonesha kuti tukonda Yehova nomulemekeza. Ganizilani izi: Yehova oziŵa ciliconse catuganiza nocita. (Aheberi 4:13) Oona ngati tacita zinthu moona mtima, ndipo oyamikila ngako. Mau ŵake okamba kuti: “Yehova ozonda aliyense wocita zacinyengo, koma okonda ŵanthu owongoka mtima.”—Miyambo 3:32.
2. Ni njila zotyani zatingaoneshele kuona mtima pa umoyo wa siku na siku?
Yehova ofuna kuti ‘tikouzhyana zacendi zeka-zeka.’ (Zekariya 8:16, 17) Kansi izi zutanthauzanji? Zutanthauza kuti kaya tulaŵila na abanja ŵasu, anyanchito ayasu, akwasu na azilongosi acikhristu, kapena akulu-akulu a boma, tufunika lini kutala wenye. Ŵanthu oona mtima oiŵa lini, kapena kucitila cinyengo ŵanthu ayakine. (Ŵelengani Miyambo 24:28 na Aefeso 4:28.) Ndipo opeleka misonkho yonse. (Aroma 13:5-7) M’njila izi na njila ziyakine, tuonesha kuti “tucita vinthu vonse moona mtima.”—Aheberi 13:18.
3. Kansi tupindula tyani ngati tucita zinthu moona mtima?
Ngati tuziŵika kuti nise ŵanthu oona mtima, ŵanthu ayakine otidalila. Tucitisha kuti mumpingo munkhale mtendele. Ndipo tunkhala na cikumbumtima cituŵa. Kuyangizhyila apo, ngati tucita vinthu vonse moona mtima, ‘tuwamisha ciphunziso ca Mpulumusi wasu, Mulungu’ ndipo izi zingacitishe kuti ŵanthu ayakine ayambe kutumikila Yehova.—Tito 2:10.
PHUNZILANI ZINYINJI
Onani mwamene kuona mtima kwasu kukhuzila Yehova, na mwatupindulila ngati tucita zinthu moona mtima. Onani soti mwamungacitile vinthu moona mtima pa vocitika vosiyanasiyana va pa umoyo.
4. Yehova okondwela ngati tucita zinthu moona mtima
Ŵelengani Salimo 44:21 na Malaki 3:16, nokambilana makonsho aŵa:
-
Muganiza kuti ndaŵa yanji n’cinthu lini canzelu kuganiza kuti ŵanthu ayakine angaziŵe lini ngati tatala wenye?
-
Muona kuti Yehova akumvwa tyani ngati tacita zinthu moona mtima, olo pa nthawi yakuti kucita izi n’kovuta?
Ngati ŵana ocita zinthu moona mtima, okondwelesha makolo ŵao. Ngati nase tucita zinthu moona mtima, tukondwelesha Yehova
5. Mukocita vinthu moona mtima nthawi zonse
Ŵanthu anyinji oganiza kuti n’zosakwanishika kucita zinthu moona mtima nthawi zonse. Koma onani cifukwa cake tufunika kucita zinthu moona mtima nthawi zonse. Onelelani VIDYO.
Ŵelengani Aheberi 13:18, nokambilana mwatingacitile zinthu moona mtima . . .
-
m’banja.
-
ku nchito kapena ku sukulu.
-
m’zocitika ziyakine.
6. Tupindula ngati tucita zinthu moona mtima nthawi zonse
Nthawi ziyakine tingaone kuti kucita zinthu moona mtima kungatiletele mavuto. Koma pavuli pake, tuzindikila kuti tacita zinthu zoyenela. Ŵelengani Salimo 34:12-16, nokambilana konsho iyi:
-
Kansi kucita zinthu moona mtima nthawi zonse kutipindulisha tyani?
-
Ngati mulume na mkazi wake ocitilana zinthu moona mtima nthawi zonse, onkhala na banja yotang’a
-
Ngati anyanchito ocita zinthu moona mtima, oŵalemba nchito oŵadalila
-
Ŵanthu amene ocita zinthu moona mtima, olemekezewa na akulu-akulu a boma
ŴANTHU AYAKINE OKAMBA KUTI: “Wenye uyakine ni utontho ngako cakuti ungaziŵike lini.”
-
Ndaŵa yanji mukhulupilila kuti Yehova ozonda wenye uliwonse?
MFUNDO ZACIDULE
Yehova ofuna kuti ashamwali ŵake akonkhala oona mtima, m’zokamba na zocita zao.
Kuwelezhya mfundo zikulu-zikulu
-
Tingaoneshe tyani kuti nise oona mtima?
-
Ndaŵa yanji n’cinthu lini canzelu kuganiza kuti ŵanthu ayakine angaziŵe lini ngati tatala wenye?
-
Ndaŵa yanji mufuna kucita zinthu zonse moona mtima?
FUFUZANI
Kansi makolo angaphunzise tyani ŵana ŵao kunkhala oona mtima?
Kansi tupindula tyani ngati tusunga malonjezo ŵasu?
Onani ngati tufunika mphela kupeleka misonkho olo kuti yoseŵenzeshewa lini bwino.
“Kansi Mufunika Kupeleka Misonkho?” (Nsanja ya Olonda, September 1, 2011)
N’cinji cesonkhezela munalume muyakine wamene enzocita lini zinthu moona mtima kucinja noyamba kucita zinthu moona mtima?
“Nephunzila Kuti Yehova ni Wacifundo Koma Soti Wokhululukila” (Nsanja ya Olonda, May 1, 2015)
