MUTU 37
Zayulaŵila Baibo pa Nkhani ya Nchito na Ndalama
Kansi mwenkhalapo na nkhaŵa yokhuza nchito olo ndalama? Nthawi ziyakine cingankhale covuta kusamalila zosoŵa zasu, nolambila Yehova pa nthawi imozi. Koma m’Baibo muli malangizo amene angatiyavye.
1. Kansi Baibo yulaŵilanji pa nkhani ya nchito?
Mulungu ofuna kuti tikosangalala na nchito. Baibo yukamba kuti “kwa munthu, paliye cabwino kupambana . . . kusangalasa mtima wake cifukwa cakuti waseŵenza mwakhama.” (Mlaliki 2:24) Yehova oseŵenza mwakhama. Ngati tutolela cisanzo cake mwa kuseŵenza mwakhama, tumukondwelesha ndipo tunkhala acimwemwe.
Nchito ni yofunika. Koma tufunika lini kuilola kunkhala yofunika ngako kupambana kulambila kwasu Yehova. (Yohane 6:27) Yehova otilonjeza kuti tikaika zofuna zake pasogolo, atisamalile.
2. Kansi ndalama tufunika kuziona tyani?
N’cendi kuti Baibo yukamba kuti ‘ndalama zuteteza.’ Koma yucenjeza soti kuti ndalama zingatipase lini cimwemwe. (Mlaliki 7:12) Ndiye cifukwa cake yutilimbikisha kuti tufunika lini kukonda ndalama, koma kunkhala “okhutila na zinthu zatili nazo.” (Ŵelengani Aheberi 13:5.) Ngati nise okhutila na zinthu zatili nazo, tupewa kunkhala na nkhaŵa zamene zuwela cifukwa cofuna kunkhala na ndalama zinyinji. Tupewa nkhongole zosafunika. (Miyambo 22:7) Ndipo tupewa soti mavuto amene owela cifukwa coseŵenzesha njila zolakwika kuti tipeze ndalama zinyinji pa nthawi itontho. Njila izi zingayangizhyilepo kuchaya njuga.
3. Kansi tingaseŵenzeshe tyani ndalama kuti tiyavye ayakine?
Yehova ni Mulungu wawanzi, ndipo tutolela cisanzo cake ngati nise “awanzi koma soti okonzeka kupasako ayakine.” (1 Timoteyo 6:18) Tingaseŵenzeshe ndalama zasu pocilikiza mpingo noyavya ayakine amene ofunikila thandizo, makamaka olambila ayasu. Cakuona Yehova kuti n’cofunika ngako, ni colinga casu copasila ayakine, osati kupaka kwa vinthu vatuŵapasa. Ngati tupasa ayakine mocokela pansi pa mtima, tunkhala acimwemwe ndipo tukondwelesha Yehova.—Ŵelengani Machitidwe 20:35.
PHUNZILANI ZINYINJI
Onani mwamungapindulile ngati muika nchito pamalo oyenela nonkhala okhutila.
4. Lemekezani Yehova kupitila m’kaseŵenzedwe kanu ka nchito
Ushamwali wasu na Yehova ufunika kutisonkhezela kuona nchito moyenela. Onelelani VIDYO, nokambilana makonsho aŵa:
-
M’vidyo iyi, n’cinji cakucitishani cidwi ponena za nkhalidwe ya Jason ku nchito kwao?
-
Kansi ecitanji kuti aike nchito pamalo oyenela?
Ŵelengani Akolose 3:23, 24, nokambilana konsho iyi:
-
Ndaŵa yanji kaonedwe kasu ka nchito ni nkhani yofunika ngako?
Nchito ni yofunika. Koma tufunika lini kuilola kunkhala yofunika ngako kupambana kulambila kwasu Yehova
5. Tupindula ngati nise okhutila
Ŵanthu anyinji oyesayesa kupeza ndalama zinyinji. Koma Baibo yutilimbikisha kunkhala na maganizo osiyana. Ŵelengani 1 Timoteyo 6:6-8, nokambilana konsho iyi:
-
Kansi Baibo yutilimbikisha kucita cinji?
Olo kuti tili na zinthu zitontho, tingankhale mphela osangalala. Onelelani VIDYO, nokambilana konsho yokonkhapo.
-
Olo kuti mabanja aŵa ali na zinthu zitontho, n’cinji cuŵapangisha kunkhala osangalala?
Koma tyani ngati tili kale na ndalama zinyinji lomba tufunilapo ziyakine? Yesu efotokoza fanizo yoonesha ngozi yunkhalapo ngati tucita izi. Ŵelengani Luka 12:15-21, nokambilana konsho iyi:
-
Kansi mwaphunzilapo cinji pa fanizo ya Yesu?—Onani vesi 15.
Ŵelengani nolinganizhya Miyambo 10:22 na 1 Timoteyo 6:10, nokambilana makonsho aŵa:
-
Kansi muona kuti n’cinji cofunika ngako pakati pa kunkhala pa ushamwali na Yehova na kunkhala na ndalama zinyinji? Ndaŵa yanji?
-
Kansi ŵanthu amene ofunishisha kulemela okumana na mavuto otyani?
6. Yehova akusamalileni
Ngati tukumana na mavuto ku nchito kapena ngati tili na ndalama zitontho, zingatiyavye kuona ngati tudalila Yehova olo yai. Onelelani VIDYO kuti muone mwatingalimbanilane na mavuto aŵa. Pavuli pake, kambilanani makonsho okonkhapo.
-
M’vidyo iyi, kansi mkwasu uyu ekumana na mavuto otyani?
-
Kansi ecitanji kuti alimbane na mavuto aŵa?
Ŵelengani Mateyu 6:25-34, nokambilana konsho iyi:
-
Kansi Yehova walonjeza kuti acitenji kuli ŵala amene oika cifunilo cake pasogolo?
ŴANTHU AYAKINE OKAMBA KUTI: “Nufunika kuseŵenza mwamphamvu kuti nisamalile banja yangu. Ningakwanishe lini kupezeka pa misonkhano wiki iliyonse.”
-
Ni lemba yanji yukusimikizhyilani kuti kuika zofuna za Yehova pasogolo ni cosankha cabwino ngako catingapange?
MFUNDO ZACIDULE
Nchito na ndalama n’zofunika, koma zufunika lini kutikangisha kutumikila Yehova.
Kuwelezhya mfundo zikulu-zikulu
-
N’cinji cingatiyavye kuti tikoona nchito m’njila yoyenela?
-
Kansi tupindula tyani cifukwa conkhala okhutila?
-
Mungaoneshe tyani kuti mudalila lonjezo ya Yehova yakuti asamalile atumiki ŵake?
FUFUZANI
Onani ngati Baibo yukamba kuti ndalama ni ziipa.
“Kansi Ndalama Niye Zuleta Mavuto Onse?” (Nkhani yupezeka tyala pa webusaiti)
Onani mwatingaseŵenzeshele ndalama zasu kuti tikondweleshe Mulungu.
“Kansi Baibo Yulaŵilanji pa Nkhani Yopasa?” (Nkhani yupezeka tyala pa webusaiti)
Kansi kuchaya njuga kuliye vuto iliyonse?
“Zayulaŵila Baibo pa Nkhani Yochaya Njuga” (Galamukani!, March 2015)
Onani zelimbikisha munthu wamene enzokonda kuchaya njuga noiŵila ŵanthu kucinja umoyo wake.
“Nenzokonda Ngako Mpikishano wa Mahosi” (Nsanja ya Olonda, November 1, 2011)
