MUTU 38
Yamikilani Mphaso ya Moyo
Pali vinthu vinyinji vatukwanisha kucita nosangalala navo cifukwa cakuti tili moyo. Olo kuti tukumana na mavuto, tingankhale mphela osangalala pa umoyo wasu. Kansi tingaoneshe tyani kuti tuyamikila mphaso ya moyo? Nanga ni cifukwa cikulu cotyani cooneshela kuyamikila?
1. Ndaŵa yanji tufunika kuyamikila mphaso ya moyo?
Tufunika kuyamikila moyo cifukwa ni mphaso yofumila kwa Ausuwasu acikondi, Yehova. Yove niye “mwineco wa moyo,” cifukwa niye elenga zamoyo zonse. (Salimo 36:9) “Opasa ŵanthu onse moyo, m’mphuye na vinthu vonse.” (Machitidwe 17:25, 28) Yehova otipasa zinthu zatufunikila kuti tinkhale na moyo. Koma kuyangizhyila apo, otipasa zinthu zamene zucitisha kuti tisangalale na umoyo.—Ŵelengani Machitidwe 14:17.
2. Tingamuoneshe tyani Yehova kuti tuyamikila mphaso ya moyo?
Moyo wa munthu ukangoyamba m’mala, Yehova oyamba kuusamalila nthawi yamene iyo. M’pemphelo, Davide euzhya Yehova kuti: “Menso ŵanu eniona penenze m’mala.” (Salimo 139:16) Yehova oona kuti moyo wa munthu ni wamtengo wapatali. (Ŵelengani Mateyu 10:29-31.) Okhumudwa ngati munthu wapaya muyake, olo kuzipaya mwadala. a (Ekisodo 20:13) Yehova okhumudwa soti ngati tuika moyo wasu na wa ŵanthu ayakine pangozi. Ngati tusamalila moyo wasu na wa ŵanthu ayakine, tuonesha kuti tulemekeza mphaso ya moyo.
PHUNZILANI ZINYINJI
Onani njila ziyakine zatingaoneshele kuti tuyamikila mphaso ya moyo.
3. Mukosamalila thanzi yanu
Akhristu ozipeleka oseŵenzesha moyo wao potumikila Yehova. Pofwana kuti Akhristu opeleka miŵili yao monga nsembe yopatulika kwa Mulungu, ofunika kusamalila miŵili yao. Ŵelengani Aroma 12:1, 2, nokambilana makonsho aŵa:
-
N’cinji cufunika kukulimbikishani kusamalila thanzi yanu?
-
Ni njila ziyakine zotyani zamungacitilemo izi?
4. Yesayesani kupewa ngozi
Baibo yutilimbikisha kupewa kucita vinthu vamene vingaike moyo wasu pangozi. Onelelani VIDYO kuti muone zinthu ziyakine zamungacite kuti mupewe ngozi.
Ŵelengani Miyambo 22:3, nokambilana zamungacite kuti mweo pamozi na ŵanthu ayakine mupewe ngozi . . .
-
pa ng’anda.
-
poseŵenza.
-
pocita masoŵela olimbisha muŵili.
-
poyendesha motoka, kapena ngati mwakwela motoka.
5. Mukolemekeza moyo wa mwana akaliyovyalika
Mwandakatulo, Davide ekamba kuti Yehova oona ciliconse cucitikila mwana wamene ali m’mala. Ŵelengani Salimo 139:13-17, nokambilana konsho iyi:
-
Kansi Yehova oona kuti moyo wa mwana uyamba nthawi yanji, akavyalika olo akali m’mala?
Malamulo amene Yehova epasa mtundu wa Aisiraeli enzoteteza azimai apakati na ŵana ali m’mala. Ŵelengani Ekisodo 21:22, 23, nokambilana makonsho aŵa:
-
Kansi Yehova enzomuona tyani munthu wamene wapaya mwana ali m’mala mwangozi?
-
Muganiza kuti angamvwe tyani ngati munthu wapaya mwana ali m’mala mwadala? b
-
Kansi muyaona tyani maganizo a Mulungu pa nkhani iyi?
Olo kuti munakazi olemekeza moyo, nthawi ziyakine angakakamizhyiwe kuti acose vumo. Ŵelengani Yesaya 41:10, nokambilana makonsho aŵa:
-
Ngati munakazi okakamizhyiwa kuti acose vumo, ni kwa ŵani kwakufunika kusenga thandizo? Ndaŵa yanji?
ŴANTHU AYAKINE OKAMBA KUTI: “Munakazi ali na ufulu wosankha kutaya vumo olo yai, cifukwa ili pa muŵili wake.”
-
N’cinji cukusimikizhyilani kuti Yehova oona moyo wa mwana ali m’mala na wa amai ŵake kunkhala wamtengo wapatali?
MFUNZO ZACIDULE
Baibo yutilimbikisha kuti tufunika kukonda, kulemekeza noteteza mphaso ya moyo. Izi zuyangizhyilapo moyo wasu na wa ŵanthu ayakine.
Kuwelezhya mfundo zikulu-zikulu
-
Ndaŵa yanji Yehova oona kuti moyo wa munthu ni wamtengo wapatali?
-
Kansi Yehova akumvwa tyani ngati munthu wapaya muyake mwadala?
-
Ndaŵa yanji muyamikila mphaso ya moyo?
FUFUZANI
Tingaoneshe tyani kuti tumuyamikila Yehova cifukwa ca mphaso ya moyo?
Pezani yankho ya konsho yakuti, Kansi Mulungu angakhululukile munakazi wamene etayapo vumo?
“Kansi Baibo Yulaŵilanji pa Nkhani Yotaya Vumo?” (Nkhani yupezeka tyala pa webusaiti)
Phunzilani mwamene kuona moyo monga ni mwakuuonela Mulungu kungakhuzile zosankha zasu pa nkhani ya zosangulusha.
“Kansi Mufunika Kucita Masoŵela Oika Moyo Wanu Pangozi?” (Galamukani!, October 8, 2000)
Onani mwamene Baibo ingayavyile munthu wamene ali na maganizo ofuna kuzipaya.
a Yehova osamala za ŵala amene ni ovutika maganizo. (Salimo 34:18) Omvwisha vinthu vamene vuŵapangisha kunkhala na maganizo ofuna kuzipaya, ndipo ofuna kuŵayavya. Kuti muone mwakuŵayavyila, ŵelengani nkhani yakuti “Nufuna Kuzipaya—Kansi Baibo Inganiyavye Ngati Nili na Maganizo Ofuna Kuzipaya?” yamene ili pa mbali yakuti Fufuzani m’mutu uno.
b Ŵanthu amene etayapo vumo ofunika lini kuziimba mlandu mopitilila malile, cifukwa Yehova angaŵakhululukile. Kuti muziŵe zinyinji, ŵelengani nkhani yakuti “Kansi Baibo Yulaŵilanji pa Nkhani Yotaya Vumo?” yamene ili pa mbali yakuti Fufuzani, m’mutu uno.
