MUTU 39
Kansi Mulungu Oyaona Tyani Milopa?
Milopa ni yofunika ngako. Paliye angankhale na moyo ngati aliye milopa. Pofwana kuti Mulungu niye etilenga, ali na ufulu wotiuzhya moseŵenzeshela milopa. Kansi Mulungu watipasa malamulo ŵanji pa nkhani ya milopa? Kansi yofunika kulyewa olo kuikiwa m’muŵili? N’cinji cingakuyavyeni kupanga zosankha mwanzelu pa nkhani iyi?
1. Kansi Yehova oyaona tyani milopa?
Yehova euzhya atumiki ŵake m’nthawi zakale kuti: “Moyo wa nyama iliyonse ni milopa yake.” (Levitiko 17:14) Yehova oona kuti milopa yopanamila moyo. Pofwana kuti moyo ni mphaso yamtengo wapatali yofumila kwa Mulungu, nayo milopa ni yamtengo wapatali, kapena kuti yopatulika.
2. Kansi Mulungu olesha kuseŵenzesha milopa m’njila zotyani?
Mpingo wacikhristu ukaliyonkhazikishiwa, Yehova elamula atumiki ŵake akale kupewa kulya milopa. (Ŵelengani Genesis 9:4 na Levitiko 17:10.) Pavuli pakuti mpingo wacikhristu wankhazikishiwa, Yehova eiwelezhya soti lamulo iyi. Bungwe yolamulila yelangiza Akhristu ‘kupitilizhya . . . kupewa milopa.’—Ŵelengani Machitidwe 15:28, 29.
Kansi tingapewe tyani milopa? Ngati adokota akuuzhyani kuti muleke kumwa walwa, kansi mungapitilizhye? Kansi mungozilasa nyeleti ya walwa kapena kulya vakulya vamene vili na walwa? Mungacite lini izo. N’cimozimozi na lamulo ya Mulungu yamene yutiuzhya kuti tufunika kupewa milopa. Izi zutanthauza kuti tufunika lini kumwa milopa olo kulya nyama yosakhesa, kapena kulya cakulya ciliconse camene caikiwako milopa.
Nanga tyani pa nkhani yoseŵenzesha milopa monga mankhwala? Njila ziyakine zakuseŵenzeshela milopa monga mankhwala, zusemphana na malamulo a Mulungu. Izi zuyangizhyilapo kuikiwa milopa, kapena vigao vake vikulu-vikulu, vamene ni maselo asweta, maselo atuŵa, maselo oyavya milopa kukatana, na manzi ya m’milopa. Koma njila ziyakine zakuseŵenzeshela milopa monga mankhwala, zusemphana lini na malamulo a Mulungu. Mwacisanzo, nthawi ziyakine oseŵenzesha tuvigao tutontho-tutontho twa cigao cimozi ca milopa. Nthawi ziyakine angaseŵenzeshe milopa ya wamene ula munthu olwala. Aliyense ofunika kuzipangila cosankha pa nkhani izi. a—Agalatiya 6:5.
PHUNZILANI ZINYINJI
Onani cithandizo ca mankhwala cofuna kuseŵenzesha milopa camungasankhe.
3. Pangani zosankha zokondwelesha Yehova pa nkhani ya cithandizo ca mankhwala
Popanga zosankha zokhuza cithandizo ca mankhwala, kansi mungaoneshe tyani kuti muona milopa monga ni mwakuyaonela Mulungu? Onelelani VIDYO, nokambilana za kufunika kocita zinthu zafotokozewa pansi apa.
-
Pemphelani kwa Mulungu kuti akupaseni nzelu.—Yakobo 1:5.
-
Fufuzani mfundo za m’Baibo noona mwamungaziseŵenzeshele.—Miyambo 13:16.
-
Fufuzani njila zakuseŵenzeshela milopa monga cithandizo ca mankhwala kudela kwamunkhala.
-
Onani njila zamuona kuti n’zosaloleka kuli mweo.
-
Pangani cosankha camene cikusiyeni na cikumbumtima cituŵa.—Machitidwe 24:16. b
-
Ziŵani kuti paliye aliyense wamene angakupangileni cosankha pa nkhani zokhuza cikumbumtima, kaya ankhale mulume kapena mkazi wanu, mkulu, kapena wokuphunzisani Baibo.—Aroma 14:12.
-
Lembani cosankha canu.
4. Mboni za Yehova zufunishisha kupeza cithandizo ca mankhwala coyenelela
N’zokwanishika kukonkha malamulo a Mulungu pa nkhani yokhuza milopa, nopeza cithandizo ca mankhwala cosakhuzana na milopa. Onelelani VIDYO.
Ŵelengani Tito 3:2, nokambilana konsho iyi:
-
Ndaŵa yanji tufunika kunkhala aulemu koma soti odekha ngati tulaŵila na madokota?
|
Zosaloleka kwa Mkhristu |
Zaangasankhe Mkhristu |
|---|---|
|
A. Manzi ya m’milopa |
Tuvigao twa manzi ya m’milopa |
|
B. Maselo atuŵa |
Tuvigao twa m’maselo atuŵa |
|
C. Maselo oyavya milopa kukatana |
Tuvigao twa m’maselo oyavya milopa kukatana |
|
D. Maselo asweta |
Tuvigao twa m’maselo asweta |
5. Ngati cithandizo ca mankhwala culoŵeshamo tuvigao tutontho-tutontho twa milopa
Milopa yopangiwa na vigao 4 vikulu-vikulu—maselo asweta, maselo atuŵa, maselo oyavya milopa kukatana, na manzi ya m’milopa. Cigao ciliconse cili na tuvigao tutontho-tutontho. c Tuvigao tuyakine opangilako mankhwala yamene yopolesha matenda olo kucitisha kuti milopa ileke kucoka.
Pa nkhani ya tuvigao tutontho-tutontho twa milopa, Mkhristu aliyense ofunika kuzipangila yeka cosankha, mokatizhyana na cikumbumtima cake cophunzisiwa bwino. Ayakine angasankhe kukana cithandizo ca mankhwala camene cuyangizhyilapo tuvigao tutontho-tutontho twa milopa. Pamene ayakine cikumbumtima cao cingaŵalole kulandila cithandizo cotetyo.
Popanga zosankha pa nkhani iyi, mungacite bwino kuganizila konsho iyi:
-
Kansi ningaŵafotokozele tyani madokota cifukwa canukanila olo kuvomela kulandila cithandizo ca mankhwala camene cuyangizhyilapo tuvigao tutontho-tutontho twa milopa?
ŴANTHU AYAKINE ANGAKONSHE KUTI: “Mukanilanji kuikiwa milopa?”
-
Mungayankhe kuti tyani?
MFUNDO ZACIDULE
Yehova ofuna kuti tikoona milopa kunkhala yopatulika.
Kuwelezhya mfundo zikulu-zikulu
-
Ndaŵa yanji Yehova oona kuti milopa ni yopatulika?
-
Tuziŵa tyani kuti lamulo ya Mulungu yopewa milopa yukhuza soti kuikiwa milopa?
-
Mungapange tyani zosankha mwanzelu pa nkhani ya cithandizo ca mankhwala cokhuzana na kuseŵenzesha milopa?
FUFUZANI
Ni zinthu zotyani zamufunika kuganizila mukaliyopanga cosankha cakuti kaya mulandile cithandizo ca mankhwala cofuna kuseŵenzesha milopa yanu kapena yai?
“Makonsho Ofumila Kuli Oŵelenga” (Nsanja ya Olonda, October 15, 2000)
Ni zinthu zotyani zamufunika kuganizila mukaliyopanga cosankha cakuti kaya mulandile cithandizo ca mankhwala amene ali na tuvigao tutontho-tutontho twa milopa kapena yai?
“Makonsho Ofumila Kuli Oŵelenga” (Nsanja ya Olonda, June 15, 2004)
N’cinji cesimikizhyila dokota muyakine kuti maganizo a Yehova pa nkhani ya milopa ni oyenelela?
“Neyamba Kuona Milopa Monga ni Mwakuyaonela Mulungu” (Galamukani!, December 8, 2003)
Onani mwamene akulu amene otumikila m’Makomiti Olaŵizhyana na Azacipatala oyavyila akwasu na azilongosi.
b Onani mfundo 5 yakuti “Ngati Cithandizo ca Mankhwala Culoŵeshamo Tuvigao Tutontho-tutontho twa Milopa”; Zakosilizhyila 3, “Cithandizo ca Mankhwala Cofuna Kuseŵenzesha Milopa; na Utumiki wa Ufumu wa November 2006, pa mapeji 3-6.”
c Madokota ayakine oona kuti vigao 4 vikulu-vikulu va milopa n’cimozimozi na tuvigao tutontho-tutontho. Tetyo, mungafunike kuŵafotokozela madokota za cosankha canu cakuti mufuna lini kuikiwa milopa kapena vigao vake vikulu-vikulu, monga maselo asweta, maselo atuŵa, maselo oyavya milopa kukatana, kapena manzi ya m’milopa.
