MUTU 40
Tingacitenji Kuti Tinkhale Atuŵa m’Menso mwa Mulungu?
Ganizilani kuti amama acikondi okonzekelesha mwana wao kuti alute ku sukulu. Omusambika nomuvwalika vovwala vituŵa. Izi zingayavye kuti mwana akooneka waukhondo, na kuti ŵanthu akoona kuti makolo ŵake omusamalila. Molingana na izi, Ausuwasu acikondi, Yehova, ofuna kuti tikonkhala atuŵa—mwamuŵili na mwaminkhalidwe. Ngati tucita izi, tuzipindulisha seka, ndipo tupeleka ulemelelo kwa Yehova.
1. Tingacitenji kuti tikonkhala aukhondo?
Yehova otiuzhya kuti: “Munkhale atuŵa.” (1 Petulo 1:16) Kuti tinkhale atuŵa, tufunika kunkhala na minkhalidwe iweme ndipo tufunika kunkhala aukhondo. Kuti tinkhale aukhondo, tufunika kusamba nthawi zonse, kuwasha vovwala vasu, kuyelesa pa ng’anda nosunga katundu wasu wonse mwaukhondo. Tufunika soti kusunga Ng’anda yasu ya Ufumu mwaukhondo. Ngati tunkhala aukhondo, tupeleka ulemelelo kwa Yehova.—2 Akorinto 6:3, 4.
2. Ni vinthu votyani vatufunika kupewa kuti tinkhale atuŵa?
Baibo yukamba kuti tufunika ‘kuzituŵisha nopewa ciliconse coipisha muŵili na mzimu.’ (2 Akorinto 7:1) Izi zutanthauza kuti tufunika kupewa ciliconse camene cingaipishe muŵili wasu na maganizo ŵasu. Kuyangizhyila apo, tufunika kuganizila zinthu zokondwelesha Yehova. Tetyo, tufunika kuyesayesa kupewa maganizo aipa. (Salimo 104:34) Tufunika soti kuyesayesa kupewa kulaŵila mau aipa.—Ŵelengani Akolose 3:8.
N’cinji ciyakine cingacitishe kuti tisankhale atuŵa mwamaganizo na mwamuŵili? Pali vinthu viyakine vamene vingaononge muŵili wasu. Tetyo, tufunika kupewa kupepa fwaka, camba, olo kuseŵenzesha mankhwala osokoneza tomfwe kapena kuseŵenzesha mankhwala m’njila yosayenelela. Ngati tupewa ivi vinthu, tunkhala athanzi ndipo tuonesha kuti tulemekeza mphaso ya moyo. Tunkhala soti atuŵa mwamuŵili mwa kupewa kusoŵelesha viwalo vofisika na kuonelela vithunzithunzi voonesha cinthaku. (Salimo 119:37; Aefeso 5:5) Payakine cingankhale covuta kupewa minkhalidwe iyi, koma Yehova angatiyavye.—Ŵelengani Yesaya 41:13.
PHUNZILANI ZINYINJI
Onani cifukwa cake tulemekeza Yehova ngati nise aukhondo. Onani soti zatingacite kuti tileke minkhalidwe iipa.
3. Tulemekeza Yehova ngati nise aukhondo
Tikaŵelenga malamulo amene Yehova epasa Aisiraeli pa nkhani ya ukhondo, tuzindikila kuti yove oona kuti ukhondo ni wofunika ngako kwa atumiki ŵake. Ŵelengani Ekisodo 19:10 na 30:17-19, nokambilana makonsho aŵa:
-
Kansi mavesi aŵa oonesha kuti Yehova oiona tyani nkhani ya ukhondo?
-
N’cinji camufunika kucita kuti mukonkhala aukhondo nthawi zonse?
Kunkhala aukhondo kufuna nthawi na khama. Koma tingakwanishe kunkhala aukhondo, kaya nise olemela olo osauka. Onelelani VIDYO, nokambilana konsho yokonkhapo.
-
Kansi kusunga zinthu zasu mwaukhondo kulemekeza tyani nchito yasu yolalikila?
4. Pewani minkhalidwe iipa
Yehova angatiyavye kuti tileke nkhalidwe iliyonse iipa
Ngati munthu opepa fwaka olo kuseŵenzesha mankhwala osokoneza tomfwe, cunkhala covuta kuti aleke. Koma kansi angacitenji kuti aleke? Ganizilani za mavuto yakupeza munthu ngati opepa fwaka olo kuseŵenzesha mankhwala osokoneza tomfwe. Ŵelengani Mateyu 22:37-39, nokambilana mwamene kupepa fwaka olo kuseŵenzesha mankhwala osokoneza tomfwe kukhuzila . . .
-
ushamwali wasu na Yehova.
-
umoyo wa banja na ushamwali wasu na ŵanthu ayakine.
Onani zaangacite munthu kuti aleke nkhalidwe iipa. a Onelelani VIDYO.
Ŵelengani Afilipi 4:13, nokambilana konsho iyi:
-
Kansi kupemphela, kuphunzila Baibo na kupezeka pa misonkhano nthawi zonse kungayavye tyani munthu kuleka nkhalidwe iipa?
5. Pewani maganizo aipa na minkhalidwe iipa
Ŵelengani Akolose 3:5, nokambilana makonsho aŵa:
-
Kansi tuziŵa tyani kuti kuonelela vithunzithunzi voonesha cinthaku, kutumizhyilana mameseji, mapikica na mavidyo a zaciwelewele, koma soti kusoŵelesha viwalo vofisika, ni vinthu vonyansa m’menso mwa Yehova?
-
Kansi muona kuti mpoyenela kuti Yehova akotiyembekezela kunkhala atuŵa mwaminkhalidwe? Ndaŵa yanji?
Onani zamungacite kuti mulimbane na maganizo aipa. Onelelani VIDYO.
Yesu efotokoza fanizo yoonesha kuti tufunika kucitapo kanthu kuti tipitilizhye kunkhala atuŵa mwaminkhalidwe. Ŵelengani Mateyu 5:29, 30, nokambilana konsho iyi:
-
Apa Yesu enzotanthauza lini kuti tufunika kuziononga seka. Koma enzotanthauza kuti tufunika kucitapo kanthu. Kansi munthu ofunika kucitanji kuti apewe maganizo aipa? b
Ngati muyesayesa kugonjesa maganizo aipa, Yehova oyamikila ngako khama yanu. Ŵelengani Salimo 103:13, 14, nokambilana konsho iyi:
-
Ngati muyesayesa kugonjesa nkhalidwe iipa, kansi lemba iyi ingakulimbikisheni tyani kuti musaleke?
Musataye Mtima!
Nthawi ziyakine, mungaganize kuti mungakwanishe lini kuleka nkhalidwe iipa. Koma ganizilani izi: Ngati munthu wamene ocita mpikishano woutuka wakhukhumudwa nopona, zutanthauza lini kuti waluza mpikishano, kapena kuti ofunika kuyambila soti poyambilila. Molingana na izi, ngati mwawelezhyapo nkhalidwe iipa, zutanthauza lini kuti mwakangiwa kugonjesa nkhalidwe yamene iyo. Ndipo zutanthauza lini kuti khama yanu yapita patyala. Mukawelezhyapo kucita nkhalidwe iipa, musataye mtima! Na thandizo ya Yehova, mungakwanishe kugonjesa nkhalidwe iliyonse iipa.
ŴANTHU AYAKINE OKAMBA KUTI: “Neyoŵelela. Ningaleke lini.”
-
Ni lemba yanji yamungaseŵenzeshe kuti muyavye munthu woteti kuona kuti Yehova angamuyavye kuleka nkhalidwe iipa?
MFUNDO ZACIDULE
Yehova okondwela ngati nise aukhondo, tupewa kuganizila vinthu viipa, na minkhalidwe iipa.
Kuwelezhya mfundo zikulu-zikulu
-
Ndaŵa yanji kunkhala atuŵa n’kofunika ngako?
-
Mungacitenji kuti mukonkhala aukhondo nthawi zonse?
-
Mungacitenji kuti mukopewa maganizo aipa na minkhalidwe iipa?
FUFUZANI
Ni zinthu zotyani zamungacite kuti mukonkhala aukhondo olo kuti nimwe osauka?
Onani zamungacite kuti muleke kupepa fwaka.
“Zamungacite Kuti Muleke Kupepa Fwaka” (Galamukani!, May 2010)
Onani mavuto yamungakumane nayo ngati muonelela vithunzithunzi voonesha cinthaku.
Onani zeyavya munalume muyakine kuti aleke kuonelela vithunzithunzi voonesha cinthaku.
“Nevutika Ngako Kuti Nicinje Nkhalidwe Yangu” (Nsanja ya Olonda, Na. 4 2016)
a Magazini yakuti “Zamungacite Kuti Muleke Kupepa Fwaka,” yamene ili pa mbali yakuti Fufuzani m’mutu uno, yufotokoza zaangacite munthu kuti aleke kupepa fwaka.
b Kuti muone zaangacite munthu kuti agonjese nkhalidwe iipa yosoŵelesha viwalo vofisika, onani nkhani yakuti “Ningacitenji Kuti Nileke Kusoŵelesha Viwalo Vofisika?” m’buku ya m’Chichewa yakuti Mayankho a Zimene Achinyamata Amafunsa, Buku Loyamba, mutu 25.
