MUTU 41
Zayulaŵila Baibo pa Nkhani Yolalana
Ŵanthu anyinji omasuka lini kukambilana nkhani zolalana. Koma Baibo yukamba nkhani zokhuza kulalana mosapita m’mbali, koma mwaulemu. Zayulaŵila zutipindulisha. Izi n’zomvwika cifukwa Baibo yecokela kwa Yehova, wamene ni Nyamalenga wasu. Ndipo oziŵa bwino zinthu zingatipindulishe. Otiuzhya zatufunika kucita kuti timukondweleshe na kuti tikasangalale na moyo kosasila.
1. Kansi maganizo a Yehova ni otyani pa nkhani yolalana?
Kulalana ni mphaso yocokela kwa Yehova. Ni mphaso yamene Yehova epasa ŵanthu okwatilana kuti akosangalala nayo. Kulalana kucitisha lini tyala ŵanthu okwatilana kuvyala ŵana, koma kuŵacitisha soti kunkhala osangalala m’banja. Ndiye cifukwa cake Mau a Mulungu okamba kuti: “Usangalale na munakazi wa pa ulumbwana wako.” (Miyambo 5:18, 19) Yehova ofuna kuti Akhristu okwatilana akonkhala okhulupilika, kuti akopewa kucita cigololo.—Ŵelengani Aheberi 13:4.
2. Kansi dama n’cinji?
Baibo yukamba kuti “adama . . . akaloŵe lini mu Ufumu wa Mulungu.” (1 Akorinto 6:9, 10) Ŵanthu amene elemba Baibo m’Cigiriki, eseŵenzesha mau acigiriki akuti por·neiʹa ponena za dama. Por·neiʹa yuyangizhyilapo (1) kulalana a kwa ŵanthu akaliyokwatilana, (2) kulalana kwa analume kapena anakazi ŵeka-ŵeka, na (3) kulalana na nyama. Ngati ‘tuthaŵa dama,’ tukondwelesha Yehova ndipo tuziteteza.—1 Atesalonika 4:3.
PHUNZILANI ZINYINJI
Onani zamungacite kuti mupewe dama na mapindu yamungapeze cifukwa copewa dama.
3. Thaŵani dama
Munthu wokhulupilika Yosefe ethaŵa munakazi muyakine peenzomunyengelela kuti alale naye. Ŵelengani Genesis 39:1-12, nokambilana makonsho aŵa:
-
N’cinji celimbikisha Yosefe kuthaŵa?—Onani vesi 9.
-
Muona kuti Yosefe epanga cosankha coyenela? Ndaŵa yanji?
Kansi acilumbwana angatolele tyani cisanzo ca Yosefe nothaŵa dama masiku ŵano? Onelelani VIDYO.
Yehova ofuna kuti tonse tikothaŵa dama. Ŵelengani 1 Akorinto 6:18, nokambilana makonsho aŵa:
-
Ni zocitika zotyani zingapangishe munthu kucita ciwelewele?
-
Mungacitenji kuti muthaŵe dama?
4. Mungakwanishe kulimbana na mayeselo
N’cinji cingapangishe kuti cinkhale covuta kuthaŵa dama? Onelelani VIDYO, nokambilana konsho yokonkhapo.
-
Kansi mkwasu wataona m’vidyo iyi ecitanji pecizindikila kuti vinthu viyakine veenzoganiza nocita, vingamupangishe kunkhala wosakhulupilika kuli mkazi wake?
Olo Akhristu okhulupilika nthawi ziyakine olimbana na maganizo aipa. N’cinji cingakuyavyeni kupewa kuganizila zaciwelewele? Ŵelengani Afilipi 4:8, nokambilana makonsho aŵa:
-
Ni zinthu zotyani zatufunika kuganizila?
-
Kansi kuŵelenga Baibo na kunkhala otangwanika mu utumiki wa Yehova kungatiyavye tyani kupewa mayeselo amene angatiloŵeshe m’cimo?
5. Malamulo a Yehova otipindulisha
Yehova oziŵa bwino zinthu zingatipindulishe. Otiuzhya zatingacite kuti tipewe ciwelewele na mapindu yatingapeze. Ŵelengani Miyambo 7:7-27 olo onelelani VIDYO, nokambilana makonsho okonkhapo.
-
Kansi wacilumbwana uyu eziloŵesha tyani m’mayeselo?—Onani Miyambo 7:8, 9.
-
Molingana na Miyambo 7:23, 26, ŵanthu amene ocita ciwelewele okumana na mavuto anyinji. Kansi tingapewe mavuto otyani ngati tupewa ciwelewele?
-
Kansi kupewa ciwelewele kungatiyavye tyani kuti tikasangalale na moyo kosasila?
Ŵanthu ayakine oganiza kuti zayulaŵila Baibo pa nkhani yokhuza kulalana kwa analume kapena anakazi ŵeka-ŵeka, zuonesha kuti Mulungu aliye cikondi. Koma Yehova ni Mulungu wacikondi, ndipo ofuna kuti aliyense akasangalale na moyo kosasila. Kuti tikasangalale na moyo uyu, tufunika kukonkha malamulo ŵake. Ŵelengani 1 Akorinto 6:9-11, nokambilana konsho iyi:
-
Kansi Mulungu oona kuti kulalana kwa analume kapena anakazi ŵeka-ŵeka, ndiye tyala minkhalidwe iipa?
Kuti tikondweleshe Mulungu, tufunika kucinja umoyo wasu. Koma kucita izi kufuna khama. Ŵelengani Salimo 19:8, 11, nokambilana makonsho aŵa:
-
Kansi muona kuti n’zokwanishika kukonkha malamulo a Yehova? Ngati muona tetyo, ndaŵa yanji? Nanga ngati muona lini tetyo, ndaŵa yanji?
Yehova wayavya ŵanthu anyinji kuyamba kukonkha malamulo ŵake. Namwe angakuyavyeni
ŴANTHU AYAKINE OKAMBA KUTI: “Ungalalane na munthu aliyense malinga ngati mukondana.”
-
Mungayankhe kuti tyani?
MFUNDO ZACIDULE
Kulalana ni mphaso yamene Yehova epasa ŵanthu okwatilana kuti akosangalala nayo.
Kuwelezhya mfundo zikulu-zikulu
-
Kansi mau akuti dama otanthauzanji?
-
N’cinji cingatiyavye kupewa dama?
-
Tupindula tyani ngati tukonkha malamulo a Yehova?
FUFUZANI
Onani cifukwa cake Mulungu ofuna kuti munalume na munakazi amene onkhala pamozi akonkhala okwatilana mwalamulo.
Onani cifukwa cake ciphunziso ca m’Baibo cakuti kulalana kwa analume kapena anakazi ŵeka-ŵeka n’kolakwika, cutanthauza lini kuti tufunika kuzonda ŵanthu amene ocita nkhalidwe iyi.
Onani mwatupindulila ngati tukonkha malamulo a Mulungu pa nkhani yolalana.
“Kansi Kulalana Mkamwa, n’Kulalana Cendi?” (Nkhani yupezeka tyala pa webusaiti)
M’nkhani yakuti “Enilandila Mwaulemu Ngako,” onani zesonkhezela munalume muyakine wamene enze na nkhalidwe yolalana na analume ayake kucinja umoyo wake noyamba kukondwelesha Mulungu.
“Baibo Yucinja Umoyo wa Ŵanthu” (Nsanja ya Olonda, April 1, 2011)
a Kulalana kosaloleka kuyangizhyilapo kulalana kwa ŵanthu osakwatilana, kulalana mkamwa, kulalana kumatako na kusoŵelesha viwalo vofisika va munthu asali mulume kapena mkazi wako.
