MUTU 42
Zayulaŵila Baibo pa Nkhani ya Umbeta na Ukwati
M’madela ayakine, ŵanthu okhulupilila kuti munthu angankhale lini wosangalala ngati ali lini pa banja. Koma, ni ŵanthu lini onse amene ali pa banja, amene ni osangalala. Ndipo ni ŵanthu lini onse amene ni mbeta, amene ni osasangalala. Mfundo yacendi ni yakuti, Baibo yukamba kuti umbeta na ukwati, zonse ni mphaso zabwino zofumila kwa Yehova.
1. Kansi umbeta uli na ubwino wanji?
Baibo yukamba kuti: ‘Wala waloŵa m’banja wacita bwino, koma wala aliyoloŵe m’banja wacita bwino ngako.’ (Ŵelengani 1 Akorinto 7:32, 33, 38.) Kansi munthu wamene ali lini pa banja ‘angacite bwino ngako’ m’njila zotyani? Akhristu amene ni mbeta, aliye udindo wosamalila muyao wa m’cikwati. Tetyo, onkhala na ufulu wocita zinyinji. Mwacisanzo, ayakine okwanisha kuyangizhyila utumiki wao, monga kuyotumikila kumadela kwamene kufunika ofalisa anyinji olalikila uthenga wabwino. Kuyangizhyila apo, onkhala na nthawi ikulu yocita zinthu zotang’isha ushamwali wao na Yehova.
2. Kansi ŵanthu okwatilana mwalamulo opeza mapindu otyani?
Molingana na umbeta, nao ukwati uli na mapindu ŵake. Baibo yukamba kuti “aŵili opambana m’mozi.” (Mlaliki 4:9) Akhristu acendi opindula ngako na makonzedwe a ukwati cifukwa okonkha mfundo za m’Baibo. Ŵala amene okwatilana mwalamulo olonjeza kuti akokondana nolemekezana. Izi zupangisha kuti akozimvwa kuti ni otetezeka, kupambana ŵala amene onkhala tyala pamozi koma ni osakwatilana mwalamulo. Ndipo ngati makolo ni okwatilana mwalamulo, ŵana ŵao onkhala otetezeka.
3. Kansi Yehova ouona tyani ukwati?
Yehova pecimangisha cikwati coyamba, ekamba kuti: “Munalume akasiye ausuwake na amai ŵake, noziphatika kuli mkazi wake.” (Genesis 2:24) Yehova ofuna kuti okwatilana akokondana nonkhala pamozi kwa umoyo wao wonse. Olola ŵanthu okwatilana kusuzulana tyala ngati m’mozi wacita cigololo. Ngati pacitika cigololo, Yehova opasa ufulu ula wolakwiliwa kusuzula muyake wa m’cikwati kapena yai. a (Mateyu 19:9) Yehova olola lini Akhristu kukwatila cipali.—1 Timoteyo 3:2.
PHUNZILANI ZINYINJI
Onani zamungacite kuti munkhale osangalala nokondwelesha Yehova, kaya muli pa banja kapena yai.
4. Useŵenzesheni bwino umbeta wanu
Yesu enzoona kuti umbeta ni mphaso. (Mateyu 19:11, 12) Ŵelengani Mateyu 4:23, nokambilana konsho iyi:
-
Kansi Yesu eseŵenzesha tyani umbeta wake potumikila Yehova noyavya ayakine?
Akhristu amene ni mbeta angasangalale na umbeta wao ngati otolela cisanzo ca Yesu. Onelelani VIDYO, nokambilana konsho yokonkhapo.
-
Kansi Akhristu angaseŵenzeshe tyani umbeta wao m’njila yopindulisha?
Kansi muziŵa?
Baibo yufotokoza lini vyaka vaangakwatililemo munthu. Koma, yufotokoza kuti acilumbwana ofunika kuyembekezela mpaka ‘apitilile pakati pa ulumbwana,’ cifukwa pa nthawi iyi onkhala na cilakolako camphamvu colalana, zamene zingapangishe kuti cinkhale covuta kupanga zosankha mwanzelu.—1 Akorinto 7:36.
5. Sankhani mwanzelu munthu wolungulana naye
Kusankha munthu wolungulana naye ni cimozi mwa zosankha zikulu-zikulu zamungapange pa umoyo wanu. Ŵelengani Mateyu 19:4-6, 9, nokambilana konsho iyi:
-
Ndaŵa yanji Mkhristu ofunika lini kuutukila cikwati?
Baibo ingakuyavyeni kuziŵa munthu woyenelela kulungulana naye. Ofunika kunkhala munthu wokonda Yehova. b Ŵelengani 1 Akorinto 7:39 na 2 Akorinto 6:14, nokambilana makonsho aŵa:
-
Ndaŵa yanji tufunika kukwatilana na Mkhristu muyasu?
-
Muganiza kuti Yehova angamvwe tyani ngati takwatilana na munthu asali Mkhristu?
Ngati nyama ziŵili zamene ni zosiyana ngako zamangiwa pamozi, zonse zuvutika. Molingana na izi, ngati Mkhristu wakwatilana na munthu wosakhulupilila, okumana na mavuto anyinji
6. Mukoona ukwati monga ni mwakuuonela Yehova
M’nthawi ya Aisiraeli, analume ayakine enzosuzula azikazi ŵao pa vifukwa vadyela. Ŵelengani Malaki 2:13, 14, 16, nokambilana konsho iyi:
-
Ndaŵa yanji Yehova okalipa ngati ŵanthu okwatilana osuzulana pa vifukwa visali va m’Malemba?
Cigololo na kusuzulana zuvutisha ula wosalakwa, pamozi na ŵana
Onelelani VIDYO, nokambilana konsho yokonkhapo.
-
Ngati muli pa banja na munthu wosakhulupilila, mungacitenji kuti munkhale mphela wosangalala?
7. Konkhani malamulo a Yehova okhuza ukwati
Munthu angafunike kucita khama kuti akokonkha malamulo a Yehova pa nkhani ya ukwati. c Koma Yehova odalisa ŵala amene oyesayesa kukonkha malamulo ŵake. Onelelani VIDYO.
Ŵelengani Aheberi 13:4, nokambilana makonsho aŵa:
-
Muona kuti n’zokwanishika kukonkha malamulo a Mulungu okhuza ukwati? Ngati muona tetyo, ndaŵa yanji? Nanga ngati muona lini tetyo, ndaŵa yanji?
Yehova oyembekezela kuti Akhristu akolembesha ku boma ngati akwatilana kapena ngati asuzulana. Izi zili tetyo cifukwa m’vyalo vinyinji, boma yufuna kuti vocitika viŵili ivi vikolembeshewa. Ŵelengani Tito 3:1, nokambilana konsho iyi:
-
Ngati muli pa banja, kansi ukwati wanu ni wovomelezhyeka na boma?
ŴANTHU AYAKINE ANGAKONSHE KUTI: “Kansi pali vuto ngati munalume na munakazi onkhala pamozi olo kuti ni osakwatilana?”
-
Mungayankhe kuti tyani?
MFUNZO ZACIDULE
Umbeta na ukwati, zonse ni mphaso zofumila kwa Yehova. Ŵanthu onse—kaya ali pa banja kapena yai—angankhale acimwemwe malinga ngati ocita zinthu mokatizhyana na cifunilo ca Yehova.
Kuwelezhya mfundo zikulu-zikulu
-
Kansi munthu angacitenji kuti aseŵenzeshe umbeta wake m’njila yopindulisha?
-
Ndaŵa yanji Baibo yukamba kuti tufunika kukwatilana tyala na Mkhristu muyasu?
-
Baibo yukamba kuti ŵanthu angasuzulane pa cifukwa tyala cimozi. Kansi ni cifukwa cotyani?
FUFUZANI
Kansi mau akuti kukwatila “tyala mwa Asikulu” otanthauzanji?
“Makonsho Ofumila Kuli Oŵelenga” (Nsanja ya Olonda, July 1, 2004)
Onelelani mavidyo aŵili afupi-afupi amene angakuyavyeni kupanga zosankha mwanzelu pa nkhani ya citomelo na ukwati.
Onani cifukwa cake mkwasu muyakine oona kuti zinthu zawamupasa Yehova ni zamtengo wapatali ngako kupambana ciliconse.
Ni vinthu viyakine votyani vakufunika kuganizila munthu ngati ofuna kupatukana olo kusuzulana na mulume kapena mkazi wake?
“Lemekezani Cawamanga Mulungu Pamozi” (Nsanja ya Olonda, December 2018)
a Onani Zakosilizhyila 4 pa nkhani yokhuza kupatukana ngati paliyocitike cigololo.
b M’madela ayakine, makolo ndiye osankhila mwana wao munthu wokwatilana naye. Ngati umu ndiye mwazilili na kudela kwanu, makolo acikondi ofunika lini kulolesha tyala pa ndalama kapena banja yakucokelako uyo munthu. Koma ofunika kuona ngati okonda Yehova kapena yai.
c Ngati munkhala na munalume kapena munakazi, koma nimwe osakwatilana mwalamulo, mungasankhe kukwatilana naye mwalamulo kapena kumusiya.
