MUTU 43
Kansi Akhristu Ofunika Kuiona Tyani Nkhani ya Kumwa Walwa?
Pacalo conse, ŵanthu ali na maganizo osiyanasiyana pa nkhani ya kumwa walwa. Ayakine okonda kumwa walwa ngati otandala na ayao. Pamene ayakine oyesa lini olo patontho kumwa walwa. Koma pali ayakine amene akumwa walwa mopitilila malile mpaka kukolwa nao. Kansi Baibo yukambapo cinji pa nkhani ya kumwa walwa?
1. Kansi kumwa walwa n’kulakwa?
Baibo yulesha lini kumwa walwa. Pa mphaso zinyinji zawatipasa Mulungu, Baibo yuyangizhyilapo walwa. Ndipo yukamba kuti “walwa ukondwelesha mtima wa munthu.” (Salimo 104:14, 15) Analume na anakazi ayakine okhulupilika amene otomolewa m’Baibo, enzomwako walwa.—1 Timoteyo 5:23.
2. Kansi Baibo yupeleka malangizo otyani kuli ŵala amene osankha kumwa walwa?
Yehova olesha ucakolwa na kumwa walwa mopitilila malile. (Agalatiya 5:21) Mau ŵake okamba kuti: “Usankhale pakati pa ŵanthu akumwa walwa mopitilila malile.” (Miyambo 23:20) Tetyo, ngati tasankha kumwa—kaya ni pagulu ya ŵanthu kapena kwaseka—tufunika lini kumwa walwa mopitilila malile, cakuti ufwike potilwalisha, kutikangisha kuganiza luweme, kapena kutikangisha kulamulila kalaŵilidwe kasu na zocita zasu. Ngati tukangiwa kuzilamulila, cingankhale bwino kulekelatu kumwa walwa.
3. Kansi tingalemekeze tyani zosankha za ŵanthu ayakine pa nkhani ya kumwa walwa?
Munthu aliyense ofunika kuzipangila yeka cosankha pa nkhani ya kumwa walwa. Tufunika lini kuweluza munthu wamene wasankha kumwa walwa pamlingo woyenelela. Ndipo ngati munthu ofuna lini kumwa walwa, tufunika lini kumukakamizhya. (Aroma 14:10) Tingacite bwino kusankha kusamwa walwa ngati tuona kuti ŵanthu ayakine angakhumudwe. (Ŵelengani Aroma 14:21.) Tufunika lini ‘kuzifunila zopindulisha seo seka, koma zopindulisha soti ŵanthu ayakine.’—Ŵelengani 1 Akorinto 10:23, 24.
PHUNZILANI ZINYINJI
Ganizilani mfundo za m’Baibo zamene zingakuyavyeni kupanga cosankha cakuti mukokumwa walwa kapena yai, na mlingo wa walwa wamungamwe. Onani soti zamungacite ngati muvutika kulamulila kamwedwe kanu.
4. Pangani cosankha cakuti mukokumwa walwa kapena yai
Kansi Yesu enzoiona tyani nkhani ya kumwa walwa? Kuti mupeze yankho, onani cozizwisa cake coyamba. Ŵelengani Yohane 2:1-11, nokambilana makonsho aŵa:
-
Kansi cozizwisa cecicita Yesu cuonesha kuti enzoiona tyani nkhani ya kumwa walwa? Nanga ŵanthu akumwa walwa, enzoŵaona tyani?
-
Pofwana kuti Yesu enzolesha lini ŵanthu kumwa walwa, kansi Mkhristu ofunika kumuona tyani munthu wamene wasankha kumwa walwa?
Koma olo kuti Mkhristu ali na ufulu wa kumwa walwa, pali nthawi ziyakine pamene cingankhale lini cinthu canzelu kumwa. Ŵelengani Miyambo 22:3, noona mwamene zocitika izi zingakuyavyileni kupanga cosankha cakuti mumwe olo yai:
-
Muyendesha motoka, kapena museŵenza na mashini.
-
Muli na pakati.
-
Adokota akuuzhyani kuti muleke kumwa walwa.
-
Muvutika kulamulila kamwedwe kanu.
-
M’calo canu muli lamulo yolesha kumwa walwa.
-
Muli na munthu wamene eleka kumwa walwa cifukwa enzovutika kuzilamulila.
Kansi mufunika kuikapo walwa pa phwando ya ukwati kapena pa maceza ayakine? Kuti muone zingakuyavyeni kupanga cosankha pa nkhani iyi, onelelani VIDYO.
Ŵelengani Aroma 13:13 na 1 Akorinto 10:31, 32. Mukaŵelenga lemba iliyonse, kambilanani konsho iyi:
-
Kansi kuseŵenzesha mfundo ya pa lemba iyi kungakuyavyeni tyani kupanga cosankha cokondwelesha Yehova?
Mkhristu aliyense ofunika kuzipangila cosankha pa nkhani ya kumwa walwa. Olo kuti nthawi ziyakine angamwe, pa zocitika ziyakine angasankhe kusamwa
5. Ziikileni mlingo
Ngati mwasankha kuti mukokumwa walwa, mukokumbukila mfundo iyi: N’cendi kuti Yehova olesha lini kumwa walwa, koma olesha kumwa mopitilila malile. Ndaŵa yanji? Ŵelengani Hoseya 4:11, 18, nokambilana konsho iyi:
-
N’cinji cingacitike ngati munthu wamwa walwa mopitilila malile?
N’cinji cingatiyavye kuti tipewe kumwa walwa mopitilila malile? Tufunika kunkhala ozicepesa nozindikila zofooka zasu. Ŵelengani Miyambo 11:2, nokambilana konsho iyi:
-
Ndaŵa yanji n’cinthu canzelu kuziikila malile pa nkhani ya kumwa walwa?
6. Zinthu zamene zingayavye munthu kuleka kumwa walwa mopitilila malile
Onani zethandiza munthu muyakine kuleka kumwa walwa mopitilila malile. Onelelani VIDYO, nokambilana makonsho aŵa:
-
M’vidyo yataonelela, kansi Dmitry enzocita tyani akakolwa?
-
Kansi ekwanisha kuleka kumwa walwa pa nthawi yamene iyo?
-
Zekwanishika tyani kuti aleke kumwa walwa mopitilila malile?
Ŵelengani 1 Akorinto 6:10, 11, nokambilana makonsho aŵa:
-
Kansi Baibo yulaŵilanji pa nkhani ya kumwa walwa mopitilila malile?
-
N’cinji cuonesha kuti munthu wamene akumwa walwa mopitilila malile angacinje?
Ŵelengani Mateyu 5:30, nokambilana konsho iyi:
-
Yesu peciseŵenzesha fanizo yonena za kutenda kwanja, etanthauza kuti pali vinthu viyakine vatufunika kuleka kuti tikondweleshe Yehova. Mungacitenji kuti muleke kumwa walwa mopitilila malile? a
Ŵelengani 1 Akorinto 15:33, nokambilana konsho iyi:
-
Kansi ŵanthu ŵamutandala nao angasonkhezele tyani zosankha zanu pa nkhani ya kumwa walwa?
ŴANTHU AYAKINE ANGAKONSHE KUTI: “Kansi kumwa walwa n’kulakwa?”
-
Mungayankhe kuti tyani?
MFUNDO ZACIDULE
Yehova etipasa walwa kuti tikosangalala nao. Koma olesha ucakolwa na kumwa mopitilila malile.
Kuwelezhya mfundo zikulu-zikulu
-
Kansi Baibo yukambapo cinji pa nkhani ya kumwa walwa?
-
Kansi ŵanthu amene akumwa walwa mopitilila malile okumana na mavuto otyani?
-
Tingaoneshe tyani kuti tulemekeza zosankha za ayakine pa nkhani ya kumwa walwa?
FUFUZANI
Kansi acilumbwana angapange tyani zosankha mwanzelu pa nkhani ya kumwa walwa?
Onani zamungacite kuti mugonjese vuto ya kumwa walwa mopitilila malile.
“Nkhalani na Maganizo Oyenela pa Nkhani ya Kumwa Walwa” (Nsanja ya Olonda, January 1, 2010)
Kansi Akhristu ofunika kucitako mwambo wogundanisha makapu?
“Makonsho Ofumila Kuli Oŵelenga” (Nsanja ya Olonda, February 15, 2007)
M’nkhani yakuti “Nenze Cakolwa,” onani zethandiza munthu muyakine kuleka kumwa walwa mopitilila malile.
“Baibo Yucinja Umoyo wa Ŵanthu” (Nsanja ya Olonda, May 1, 2012)
a Ŵanthu amene akumwa walwa mopitilila malile, angafunikile thandizo yapadela kuti aleke. Madokota anyinji okamba kuti ŵala amene enze na vuto ya kumwa walwa mopitilila malile lomba eleka, ofunika lini kuyesa olo patontho kuyamba soti kumwa.
