MUTU 44
Kansi ni Vikondwelelo Vonse Vakukondwela Navo Mulungu?
Yehova ofuna kuti tikosangalala na umoyo nokondwelako nthawi ziyakine. Koma kansi ni vikondwelelo vonse vakukondwela navo? Tingaoneshe tyani kuti tukonda Yehova pa nkhani iyi?
1. Ndaŵa yanji Yehova okondwela lini na vikondwelelo viyakine?
Payakine mungadabwe kuziŵa kuti vikondwelelo vinyinji ni vosazikiwa m’Malemba ndipo veyambila kucikunja. Vikondwelelo viyakine ni vokatizhyana na kulambila kwawenye. Viyakine ni vokatizhyana na zamizimu. Pali soti vikondwelelo viyakine vamene ni vozikiwa pa cikhulupililo cakuti pali cinthu ciyakine camene cupitilizhya kunkhala na moyo munthu akafwa. Ŵanthu ayakine ocita vikondwelelo cifukwa cokhulupilila kuti angapeze mwai wa zinthu ziyakine. (Yesaya 65:11) Koma Yehova ocenjeza atumiki ŵake kuti: “Lekanani nao . . . ndipo musakhuze cinthu conyansa.”—2 Akorinto 6:17. a
2. Kansi Yehova oviona tyani vikondwelelo vamene vulemekeza ngako ŵanthu?
Yehova oticenjeza kuti tufunika lini kukhulupilila “munthu aliyense wocokela ku lito.” (Ŵelengani Yeremiya 17:5.) Ŵanthu ayakine ocita vikondwelelo volemekeza olamulila kapena masoja. Ŵanthu ayakine ocita vikondwelelo volemekeza vizindikilo va calo kapena ufulu wa calo. (1 Yohane 5:21) Ndipo pa vikondwelelo viyakine, ŵanthu olemekeza magulu andale kapena magulu amene ofuna kucinja vinthu. Kansi Yehova angamvwe tyani ngati tupasa ngako ulemu ŵanthu amene ocilikiza maganizo osemphana na cifunilo cake?
3. Ni vocitika votyani vamene vingapangishe kuti cikondwelelo cinkhale cosavomelezhyeka?
Baibo yulesha “kumwa walwa mopitilila malile, maphwando acongo, [na] kumwa kwa mpikishano.” (1 Petulo 4:3) Pa vikondwelelo viyakine, ŵanthu ocita zaciwelewele. Kuti Yehova apitilizhye kutikonda, tufunika kupewa vocitika voteti.
PHUNZILANI ZINYINJI
Onani zamungacite kuti mukondweleshe Yehova mwa kupanga zosankha mwanzelu pa nkhani ya maholide na vikondwelelo.
4. Pewani vikondwelelo vosalemekeza Yehova
Ŵelengani Aefeso 5:10, nokambilana makonsho aŵa:
-
Kansi tufunika kusimikizhyila cinji tikaliyopanga cosankha cakuti ticiteko cikondwelelo ca pa holide?
-
Ni maholide otyani amene ni owanda kudela kwamunkhala?
-
Muona kuti Yehova okondwela nao maholide amene ao?
Mwacisanzo, kansi mweganizilako mwamene Mulungu oonela vikondwelelo va masiku ovyalika? Baibo yutomola lini mtumiki wa Yehova aliyense wamene ecitako cikondwelelo ca siku yovyalika. Koma yukamba tyala za ŵanthu aŵili amene ecitako vikondwelelo va masiku ovyalika. Ndipo aŵa ŵanthu enzotumikila lini Yehova. Ŵelengani Genesis 40:20-22 na Mateyu 14:6-10. Pavuli pake, kambilanani makonsho aŵa:
-
N’cinji cecitika pa vikondwelelo viŵili ivi?
-
Molingana na Malemba aŵa, muganiza kuti Yehova oviona tyani vikondwelelo va masiku ovyalika?
Koma payakine mungakonshe mphela kuti, ‘Kansi Yehova zumukhuza ngati napezekapo pa cikondwelelo ca siku yovyalika, kapena pa vikondwelelo viyakine vosakatizhyana na Malemba?’ Ŵelengani Ekisodo 32:1-8. Pavuli pake, onelelani VIDYO, nokambilana makonsho aŵa:
-
Ndaŵa yanji tufunika kusimikizhyila kuti zinthu zovomelezhyeka kwa Yehova n’zotyani?
-
Nanga tingacite tyani zamene izi?
Mwatingaziŵile ngati cikondwelelo n’cosavomelezhyeka kwa Mulungu
-
Kansi n’cozikiwa pa viphunziso vawenye? Fufuzani kuti muziŵe kweceyambila cikondwelelo camene ico.
-
Kansi culemekeza ngako ŵanthu, magulu ya ŵanthu, kapena vizindikilo va calo? Tufunika kulemekeza ngako Yehova kupambana aliyense, ndipo tufunika kumudalila kuti ndiye ati acosepo mavuto pacalo.
-
Kansi zucitika pa cikondwelelo ici n’zosemphana na mfundo za m’Baibo? Tufunika kunkhala na nkhalidwe ituŵa.
5. Yavyani ayakine kulemekeza zamukhulupilila
Nthawi ziyakine cingankhale covuta kukana ngati ŵanthu ayakine otikakamizhya kuti ticiteko cikondwelelo cosalemekeza Yehova. Fotokozani zosankha zanu moleza mtima koma soti mosamala. Kuti muone cisanzo cimozi coonesha mwamungacitile izi, onelelani VIDYO.
Ŵelengani Mateyu 7:12, nokambilana makonsho aŵa:
-
Molingana na lemba iyi, kansi mufunika kuŵalesha abanja ŵanu osakhulupilila ngati ofuna kucita cikondwelelo ca pa holide?
-
Mungaŵasimikizhyile tyani abanja ŵanu kuti muŵakonda noŵalemekeza, olo kuti mucitako lini nao cikondwelelo?
6. Yehova ofuna kuti tikonkhala osangalala
Yehova ofuna kuti tikonkhalako na nthawi yosangalala na abanja ŵasu na ayasu. Ŵelengani Mlaliki 8:15, nokambilana konsho iyi:
-
Kansi lemba iyi yuonesha tyani kuti Yehova ofuna kuti tikosangalala?
Yehova ofuna kuti atumiki ŵake akonkhalako na nthawi yosangalala pamozi. Onelelani VIDYO kuti muone umboni wa izi pa misonkhano yasu ya vyalo vosiyanasiyana.
Ŵelengani Agalatiya 6:10, nokambilana makonsho aŵa:
-
Kansi tufunika kucitocita cikondwelelo ca pa holide kuti ‘ticitile ayakine zabwino’?
-
N’cinji cingakupaseni cimwemwe ngaco-ngaco—kupasa munthu cinthu cifukwa cakuti ni siku ya holide, kapena kupasa mocokela pansi pa mtima pa nthawi iyakine iliyonse?
-
Nthawi ziyakine mabanja a Mboni onkhalako na nthawi yocita kacikondwelelo pamozi na ŵana ŵao noŵapasako mphaso. Ngati muli na ŵana, ni zinthu zotyani zapadela zamungaŵacitile?
ŴANTHU AYAKINE OKAMBA KUTI: “Ziliye kanthu na mweyeyambila holide. Cofunika n’cakuti wankhalako na nthawi yosangalala pamozi na banja kapena ayako.”
-
Mungayankhe kuti tyani?
MFUNDO ZACIDULE
Yehova ofuna kuti tikonkhala na nthawi yosangalala na abanja ŵasu na ayasu. Koma ofuna soti kuti tikopewa vikondwelelo vosamulemekeza.
Kuwelezhya mfundo zikulu-zikulu
-
Ni makonsho yotyani yatingazikonshe kuti tiziŵe kaya cikondwelelo n’covomelezhyeka kwa Yehova kapena yai?
-
Tingayavye tyani abanja ŵasu na ayasu kuti amvwishe zosankha zasu pa nkhani ya maholide?
-
Tuziŵa tyani kuti Yehova ofuna kuti tikonkhalako na nthawi yosangalala?
FUFUZANI
Onani vikondwelelo vamene Akhristu ocitako lini.
“Ndaŵa Yanji a Mboni za Yehova Ocitako Lini Vikondwelelo pa Maholide?” (Nkhani yupezeka tyala pa webusaiti)
Onani vifukwa 4 vamene vutipangisha kukhulupilila kuti Mulungu ovomelezhya lini vikondwelelo va masiku ovyalika.
“Ndaŵa Yanji a Mboni za Yehova Okondwelela Lini Masiku Ovyalika?” (Nkhani yupezeka tyala pa webusaiti)
Onani mwamene ŵana okonda Yehova angacitile zinthu zokondwelesha Yehova pa nthawi ya vikondwelelo.
Akhristu mamiliyoni ocitako lini cikondwelelo ca Khrisimasi. Kansi akumvwa tyani na cosankha cecipanga?
“Epeza Cinthu Cabwino Ngako” (Nsanja ya Olonda, December 1, 2012)
a Onani Zakosilizhyila 5 kuti muone zamungacite ngati ŵanthu ayakine ocita cikondwelelo ca pa holide.
