Yesu ephunzisa kuti ophunzila ŵake ofunika lini kunkhala “mbali ya cino calo.” (Yohane 15:19) Izi zutanthauza kuti ofunika kupewa kutolamo mbali m’nkhondo na m’ndale za cino calo. Koma nthawi ziyakine cingankhale covuta kuti tipewe kutolamo mbali m’zandale. Ŵanthu ayakine angatiseke kapena kutinena. Tingacitenji kuti tikopewa kutolamo mbali m’zandale nopitilizhya kunkhala okhulupilika kwa Yehova?

1. Kansi Akhristu acendi oyaona tyani maboma a ŵanthu?

Akhristu olemekeza boma. Okonkha mau a Yesu akuti “pelekani za Kaisara kwa Kaisara”—kutanthauza kuti omvwila malamulo a m’calo, monga lamulo yonena za kupeleka misonkho. (Maliko 12:17) Baibo yukamba kuti maboma a ŵanthu alipo cifukwa Yehova waŵalola kuti ankhalepo. (Aroma 13:1) Tetyo, tuziŵa kuti maboma a ŵanthu ali na ulamulilo utontho polinganizhya na ulamulilo wa Mulungu. Tuziŵa kuti ni Ufumu wa Mulungu tyala wati ukacosepo mavuto ya ŵanthu pacalo.

2. Tingaoneshe tyani kuti tutolamo lini mbali m’zandale?

Molingana na Yesu, tuloŵelela lini m’nkhani zandale. Nthawi iyakine ŵanthu peciona zozizwisa zeenzocita Yesu, efuna kumuika pa ufumu. Koma Yesu ekana. (Yohane 6:15) Ndaŵa yanji ekana? Cifukwa ekamba kuti ‘Ufumu wake wenze lini mbali ya cino calo.’ (Yohane 18:36) Monga ophunzila a Yesu, tuonesha kuti tutolamo lini mbali m’ndale za cino calo m’njila zosiyanasiyana. Mwacisanzo, tuluta lini kunkhondo. (Ŵelengani Mika 4:3.) Tulemekeza vizindikilo va calo, monga fulagi, koma tuvilambila lini. (1 Yohane 5:21) Ndipo tunkhala lini kumbali ya cipani ciliconse candale kapena kusushana na munthu aliyense wandale. M’njila izi na m’njila ziyakine, tuonesha kuti nise okhulupilika na mtima wonse ku boma ya Mulungu.

 PHUNZILANI ZINYINJI

3. Akhristu acendi otolamo lini mbali m’ndale

Yesu na ophunzila ŵake ni cisanzo cabwino kuli seo. Ŵelengani Aroma 13:1, 5-7 na 1 Petulo 2:13, 14. Pavuli pake, onelelani VIDYO, nokambilana makonsho aŵa:

• Ndaŵa yanji tufunika kulemekeza olamulila a boma?

• Ni njila ziyakine zotyani zatingaoneshele kuti tugonjela olamulila a boma?

Ngati kuli nkhondo, vyalo viyakine vukamba kuti vingatolemo lini mbali, koma vucilikiza cimozi mwa vyalo vamene vili pa nkhondo. Kansi mau akuti kusatolamo mbali otanthauza cinji kwenekwene? Ŵelengani Yohane 17:16. Pavuli pake, onelelani VIDYO nokambilana konsho iyi:

• Kansi kusatolamo mbali m’ndale kutanthauzanji?

Nanga tyani ngati olamulila a boma otiuzhya kucita vinthu vosemphana na malamulo a Mulungu? Ŵelengani Machitidwe 5:28, 29. Pavuli pake, onelelani VIDYO nokambilana makonsho aŵa:

• Ngati malamulo ya ŵanthu yasemphana na malamulo ya Mulungu, kansi tufunika kukonkha malamulo ya ŵani?

• Kansi mungaganizileko zocitika zilizonse pamene Mkhristu angakane kumvwila malamulo ya boma?

 4. Pewani kutolamo mbali m’zandale m’maganizo na m’zocita

Ŵelengani 1 Yohane 5:21. Pavuli pake, onelelani VIDYO nokambilana makonsho aŵa:

• M’vidyo iyi, ndaŵa yanji Ayenge ekana kujoina cipani candale olo kutolamo mbali m’zocitika za m’calo, monga kucitila saliyuti fulagi?

• Muganiza kuti epanga cosankha canzelu?

Ni zocitika ziyakine zotyani zamene zingakuikeni pa ciyeso cakuti mutolemo mbali m’zandale? Onelelani VIDYO, nokambilana makonsho aŵa:

• Tingapewe tyani kuloŵelela m’ndale ngati tuonelela masoŵela amene ocitika pakati pa vyalo?

• Kansi tingapewe tyani kutolamo mbali m’ndale, olo pa nthawi yakuti zosankha za anyandale zatikhuza mwacindunji?

• Kansi zatikumvwa pa nyuzi na ŵanthu ŵatutandala nao zingakhuze tyani cosankha casu cosafuna kutolamo mbali m’zandale?

 MFUNDO ZACIDULE

Akhristu oyesayesa kupewa kutolamo mbali m’zandale m’maganizo, m’mau na m’zocita.

Kuwelezhya mfundo zikulu-zikulu

• Kansi tufunika kuyaona tyani maboma a ŵanthu?

• Ndaŵa yanji tutolamo lini mbali m’ndale?

• Ni zocitika zotyani zamene zingatiike pa ciyeso cakuti titolemo mbali m’zandale?