MUTU 46
Ndaŵa Yanji Tufunika Kuzipeleka kwa Mulungu Nobatizika?
Tuzipeleka kwa Yehova kupitila m’pemphelo. M’pemphelo iyi, tumulonjeza kuti tikolambila tyala yove noika cifunilo cake pasogolo mu umoyo wasu. (Salimo 40:8) Pavuli pake, tubatizika. Tikabatizika, tuonesha ayakine kuti tezipeleka kwa Mulungu. Kuzipeleka kwa Yehova ni cosankha cikulu ngako catupanga pa umoyo wasu. Kansi n’cinji cingatisonkhezele kupanga cosankha cikulu teti, camene cingacinje umoyo wasu?
1. N’cinji cusonkhezela munthu kuti azipeleke kwa Mulungu?
Tuzipeleka kwa Yehova cifukwa comukonda. (1 Yohane 4:10, 19) Baibo yutilimbikisha kuti: “Ukokonda Yehova Mulungu wako na mtima wako wonse, moyo wako wonse, maganizo ŵako onse na mphamvu zako zonse.” (Maliko 12:30) Tuonesha kuti tukonda Mulungu m’zokamba na m’zocita zasu. Ngati munalume na munakazi akondana, ofwika pokwatilana. Molingana na izi, cikondi casu pa Yehova cikakula, cutisonkhezela kuzipeleka kuli yove nobatizika.
2. Kansi Yehova walonjeza madaliso otyani ku Mboni zake zobatizika?
Mukabatizika, munkhale mbali ya banja ya Yehova, yamene ni yacimwemwe. Muone cikondi ca Yehova m’njila zinyinji. Ndipo ushamwali wanu na yove ukule ngako kupambana mwaulili apa. (Ŵelengani Malaki 3:16-18.) Yehova ankhale Ausuwanu. Kuyangizhyila apo, munkhale mbali ya akwasu na azilongosi pacalo conse, amene okonda Yehova nokukondani. (Ŵelengani Maliko 10:29, 30.) Koma pali zinthu ziyakine zamufunika kucita mukaliyobatizika. Mufunika kuphunzila za Yehova, kumukonda, nokhulupilila Mwana wake. Posilizhyila, mufunika kuzipeleka kwa Yehova. Mukacita zinthu izi nobatizika, munkhale pa njila ya ku moyo wosasila. Mau a Mulungu okamba kuti: ‘Ubatizo . . . ukupulumusani.’—1 Petulo 3:21.
PHUNZILANI ZINYINJI
Onani cifukwa cake mufunika kuzipeleka kwa Yehova nobatizika.
3. Tonse tufunika kusankha wati tikotumikila
M’nthawi ya Aisiraeli, ŵanthu ayakine enzoganiza kuti angalambile Yehova na mulungu wawenye, Baala, pa nthawi imozi. Koma Yehova etuma mneneli wake Eliya kuti akaongolele maganizo ŵao olakwika. Ŵelengani 1 Mafumu 18:21, nokambilana konsho iyi:
-
Kansi Aisiraeli enzofunika kupanga cosankha cotyani?
Molingana na Aisiraeli, nase tufunika kusankha wati tikotumikila. Ŵelengani Luka 16:13, nokambilana makonsho aŵa:
-
Ndaŵa yanji zingakwanishike lini kulambila Yehova na munthu muyakine kapena cinthu ciyakine pa nthawi imozi?
-
Tingamuoneshe tyani Yehova kuti tasankha kulambila yove yeka?
4. Sinkhasinkhani pa cikondi caali naco Yehova pali mweo
Yehova watipasa mphaso zinyinji zabwino. Kansi n’cinji catingamuwezhyele? Onelelani VIDYO.
Ni njila ziyakine zotyani zawakuoneshelani cikondi Yehova? Ŵelengani Salimo 104:14, 15 na 1 Yohane 4:9, 10, nokambilana makonsho aŵa:
-
Ni mphaso zotyani zawakupasani Yehova zamuyamikila ngako?
-
Kansi mphaso izi zukupangishani kumuona tyani?
Tikalandila mphaso yatukonda ngako, tufuna kuonesha kuti tuyamikila munthu etipasa. Ŵelengani Deuteronomo 16:17, nokambilana konsho iyi:
-
Mukaganizila zinthu zonse zawakucitilani Yehova, musonkhezelewa kumucitila cinji?
5. Tupeza madaliso anyinji tikazipeleka kwa Mulungu
Ŵanthu anyinji oganiza kuti kuchuka, kunkhala na nchito yapalulu kapena kunkhala na ndalama zinyinji kungaŵapase cimwemwe. Kansi n’cendi kuti izi zinthu zingapase munthu cimwemwe? Onelelani VIDYO, nokambilana makonsho aŵa:
-
Olo kuti uyu munthu enzokonda kuchaya bola, ndaŵa yanji eleka?
-
Esankha kuzipeleka kwa Yehova, osati ku bola. Muganiza kuti epanga cosankha coyenela? Ndaŵa yanji?
Mtumwi Paulo akaliyonkhala Mkhristu, enzofuna kunkhala munthu wochuka. Ephunzisiwa cilamulo caciyuda na mphunzisi wochuka. Koma vonse ivi evisiya kuti ankhale Mkhristu. Kansi Paulo eziimbapo mlandu pa cosankha cecipanga? Ŵelengani Afilipi 3:8, nokambilana makonsho aŵa:
-
Ndaŵa yanji Paulo ekamba kuti vinthu veenzocita akaliyonkhala Mkhristu, venze “culu ca vinyanswa”?
-
Nanga epeza madaliso otyani?
-
Kansi kutumikila Yehova mungakulinganizhye na cinthu ciliconse camungankhale naco pa umoyo wanu?
Paulo pecinkhala Mkhristu, epeza madaliso anyinji ngako kupambana vinthu vecisiya
ŴANTHU AYAKINE OKAMBA KUTI: “Zingakwanishike lini kuti munthu atumikile Mulungu na umoyo wake wonse.”
-
Muona kuti ndaŵa yanji kuzipeleka kwa Mulungu n’cinthu coyenela?
MFUNDO ZACIDULE
Cikondi cutisonkhezela kuzipeleka kwa Yehova nobatizika.
Kuwelezhya mfundo zikulu-zikulu
-
Ndaŵa yanji tufunika kukonda Yehova na mtima wasu wonse nolambila yove yeka?
-
Kansi Yehova walonjeza madaliso otyani ku Mboni zake zobatizika?
-
Kansi mungakonde kuzipeleka kwa Yehova?
FUFUZANI
Onani cifukwa cake munthu wamene enzokonda zoimbaimba na munthu wamene enzokonda masoŵela, esankha kuzipeleka kwa Yehova.
Zakukonsha Acilumbwana—Kansi Nicite Cinji pa Umoyo Wangu?—Kulolesha Kuvuli (6:54)
Onani vifukwa viyakine vutipangisha kuzipeleka kwa Mulungu.
“Ndaŵa Yanji Tufunika Kuzipeleka kwa Yehova?” (Nsanja ya Olonda, January 15, 2010)
M’vidyo iyi ya nyimbo, onani cimwemwe cakunkhala naco ŵala amene ozipeleka kwa Yehova.
M’nkhani yakuti “Kwa Vyaka Vinyinji Nenzozikonsha Kuti, ‘Kansi Colinga ca Moyo n’Cinji?’” onani zesonkhezela munakazi muyakine kuganizila soti zinthu zenzoona kuti n’zofunika ngako pa umoyo wake.
“Baibo Yucinja Umoyo wa Ŵanthu” (Nsanja ya Olonda, November 1, 2012)
