MUTU 51
Mukolaŵila Mau Okondwelesha Yehova
Yehova pecitilenga, etipasa mphaso yapadela yokwanisha kulaŵila. Kansi zatulaŵila zumukhuza? Eee, zumukhuza! (Ŵelengani Yakobo 1:26.) Tetyo, kansi tingaseŵenzeshe tyani mphaso iyi m’njila yokondwelesha Yehova?
1. Kansi tufunika kuiseŵenzesha tyani mphaso yolaŵila?
Baibo yutiuzhya kuti tufunika ‘kupitilizhya kutonthozana nolimbikishana.’ (1 Atesolonika 5:11) Kansi mungaganizileko za ŵanthu ayakine amene ofunika cilimbikiso? Mungaŵalimbikishe tyani? Asimikizhyileni kuti muŵakonda ndipo ayamikileni pa zinthu zakucita bwino. Mungaganizileko za lemba yamungaseŵenzeshe kuti muŵalimbikishe. Kumbukilani soti kuti ŵanthu ayakine angalimbikishiwe na zokamba zanu. Tetyo, mukoyesayesa kulaŵila mofasa koma soti mwacikondi nthawi zonse.—Miyambo 15:1.
2. Ni kalaŵilidwe kotyani katufunika kupewa?
Baibo yukamba kuti: “Mau aliwonse owola asacoke pakamwa panu.” (Ŵelengani Aefeso 4:29.) Izi zutanthauza kuti tufunika lini kulaŵila mau aipa, olo kuseŵenzesha mau onyoza amene angakhumudwishe ayakine. Tufunika soti kupewa tonzhyo.—Ŵelengani Miyambo 16:28.
3. N’cinji cingatiyavye kulaŵila mau olimbikisha ayakine?
Kanyinji-kanyinji, zatulaŵila zuonesha zinthu zili m’maganizo mwasu. (Luka 6:45) Tetyo, tufunika kuyesayesa kuganizila zinthu zolungama, zituŵa, zacikondi na zoyamikilika. (Afilipi 4:8) Kuti tikoganizila pa zinthu zabwino, tufunika kupewa zosangulusha ziipa na ayasu a minkhalidwe iipa. (Miyambo 13:20) Cinthu ciyakine cingatiyavye ni kuganizila mwamene mau yatufuna kulaŵila yangakhuzile ŵanthu ayakine. Baibo yukamba kuti: “Pali munthu wamene olaŵila mosaganizila na mau olasa monga ni cipula, koma lilime ya ŵanthu anzelu yupolesha.”—Miyambo 12:18.
PHUNZILANI ZINYINJI
Onani zamungacite kuti mukolaŵila m’njila yokondwelesha Yehova nolimbikisha ayakine.
4. Lamulilani kalaŵilidwe kanu
Nthawi ziyakine, tonse tulaŵila vinthu vamene pavuli pake tuziimba navo mlandu. (Yakobo 3:2) Ŵelengani Agalatiya 5:22, 23, nokambilana makonsho aŵa:
-
Pa minkhalidwe iyi, ni yotyani yamungakonde kusenga Mulungu kuti akuyavyeni kunkhala nayo kuti mukokwanisha kulamulila kalaŵilidwe kanu? Kansi minkhalidwe iyi ingakuyavyeni tyani?
Ŵelengani 1 Akorinto 15:33, nokambilana konsho iyi:
-
Kansi zosangulusha zamukonda na ŵanthu ŵamusankha kunkhala ayanu zingakhuze tyani kalaŵilidwe kanu?
N’cinji cingakhuze kalaŵilidwe kanu?
Ŵelengani Mlaliki 3:1, 7, nokambilana konsho iyi:
-
Ni pa nthawi yotyani pamene cingankhale cinthu canzelu kunkhala celele olo kuyembekezela nthawi yoyenela yolaŵila?
5. Mukolaŵila zinthu zabwino zokhuza ŵanthu ayakine
Kansi tingapewe tyani kulaŵila mau okhumudwisha ŵanthu ayakine? Onelelani VIDYO, nokambilana makonsho okonkhapo.
-
Mu vidyo iyi, ndaŵa yanji mkwasu uyu enzofunika kucinja pa vinthu venzokambila ŵanthu ayakine?
-
N’cinji cemuyavya kuti acinje?
Ŵelengani Mlaliki 7:16, nokambilana konsho iyi:
-
Ngati taikiwa pa ciyeso cakuti tikambe viipa vokhuza munthu muyakine, kansi tufunika kukumbukila cinji?
Ŵelengani Mlaliki 7:21, 22, nokambilana konsho iyi:
-
Kansi lemba iyi ingakuyavyeni tyani kupewa kukalipa ngati mwamvwa kuti munthu muyakine ekukambilani vinthu viipa?
6. Mukolaŵila mwacikondi na ŵanthu a m’banja mwanu
Yehova ofuna kuti tikolaŵila mwacikondi na ŵanthu a m’banja mwasu. Onelelani VIDYO, nokambilana konsho yokonkhapo.
-
N’cinji cingakuyavyeni kuti mukolaŵila mwacikondi na ŵanthu a m’banja mwanu?
Ŵelengani Aefeso 4:31, 32, nokambilana konsho iyi:
-
Mungacite tyani kuti mukolaŵila mau olimbikisha ŵanthu a m’banja mwanu?
Yehova elaŵila mau oyamikila Mwana wake, Yesu. Ŵelengani Mateyu 17:5, nokambilana konsho iyi:
-
Kansi mungatolele tyani cisanzo ca Yehova polaŵila na ŵanthu a m’banja mwanu?
Sakilani mipata yoyamikilila ŵanthu ayakine
ŴANTHU AYAKINE OKAMBA KUTI: “Nulaŵila canaganiza. Kaya munthu akhumudwe olo yai, niliye nazo kanthu.”
-
Kansi namwe muona tetyo? Ngati muona tetyo, ndaŵa yanji? Nanga ngati muona lini tetyo, ndaŵa yanji?
MFUNDO ZACIDULE
Zatulaŵila zingalimbikishe ŵanthu ayakine kapena kuŵakhumudwisha. Tufunika kuganizila mosamala pa zinthu zatulaŵila, nthawi yatingazilaŵililemo na mwatingazilaŵilile.
Kuwelezhya mfundo zikulu-zikulu
-
Kansi mungalaŵile tyani zinthu zolimbikisha ayakine?
-
Ni kalaŵilidwe kotyani kamufunika kupewa?
-
N’cinji cingatiyavye kuti tikolaŵila mwacikondi koma soti molimbikisha nthawi zonse?
FUFUZANI
N’cinji cingatiyavye kulaŵila m’njila yolimbikisha ayakine?
Onani zamungacite kuti mukopewa kuseŵenzesha mau aipa.
“Kansi Kutukwana n’Kuipa Cendi?” (Nkhani yupezeka tyala pa webusiti)
Onani zamungacite kuti mupewe tonzhyo.
Onani mwamene Yehova eyavyila munalume muyakine kuleka kuseŵenzesha mau aipa.
“Neyamba Kuganizila Mosamala za Moyo Wangu” (Nsanja ya Olonda, August 1, 2013)
