MUTU 48
Sankhani Ayanu Mwanzelu
Ayasu apamtima otiyavya kunkhala osangalala, ndipo otilimbikisha tikakumana na mavuto. Koma Baibo yuticenjeza kuti ni munthu lini aliyense angankhale muyasu wabwino. Kansi n’cinji cingatiyavye kusankha ayasu abwino? Tiyeni tikambilane makonsho aŵa.
1. Kansi ŵanthu ŵamusankha kunkhala ayanu angakhuze tyani minkhalidwe yanu?
Kanyinji-kanyinji, tutolela minkhalidwe ya ŵanthu ŵatutandala nao. Ŵanthu ŵatutandala nao angapangishe kuti tinkhale na minkhalidwe iweme kapena iipa—kaya tutandala nao mwacindunji olo kupitila pa intaneti. Baibo yukamba kuti, “munthu woyenda na ŵanthu anzelu ankhale wanzelu, koma wocita zinthu na ŵanthu opusa [kapena kuti ŵala osakonda Yehova] apeze mavuto.” (Miyambo 13:20) Ayasu amene okonda nolambila Yehova angatiyavye kunkhala naye pa ushamwali wotang’a, nopanga zosankha mwanzelu. Koma ngati tukondana na ŵanthu amene otumikila lini Yehova, angacitishe kuti nase tileke kumutumikila. Ndiye cifukwa cake Baibo yutilimbikisha kusankha ayasu mwanzelu! Ngati tukondana na ŵanthu amene okonda Mulungu, tonse tupindula. ‘Tutonthozana nolimbikishana.’—1 Atesalonika 5:11.
2. Kansi ŵanthu ŵamusankha kunkhala ayanu angakhuze tyani ushamwali wanu na Yehova?
Yehova osankha ayake mosamala. “Okonda ŵanthu owongoka mtima.” (Miyambo 3:32) Kansi Yehova akumvwa tyani ngati tukatizhyana na ŵanthu amene omukonda lini? Okhumudwa ngako! (Ŵelengani Yakobo 4:4.) Koma Yehova okondwela ngati tupewa kukatizhyana na ŵanthu aipa. Ndipo angatisankhe kunkhala ashamwali ŵake ngati tuvwendela pafupi na yove nokondana na ŵala omukonda.—Salimo 15:1-4.
PHUNZILANI ZINYINJI
Onani cifukwa cake tufunika kusankha ayasu mwanzelu. Tione soti zatingacite kuti tipeze ayasu amene angatiyavye kukulisha minkhalidwe iweme.
3. Pewani kukatizhyana na ŵanthu aipa
Ŵanthu aipa ni ŵala amene okonda lini Mulungu na mfundo zake. Onelelani VIDYO, nokambilana konsho yokonkhapo.
-
Kansi tingayambe tyani kukatizhyana na ŵanthu aipa mosaziŵa?
Ŵelengani 1 Akorinto 15:33, nokambilana makonsho aŵa:
-
Kansi mweo muona kuti ŵanthu aipa ni otyani? Ndaŵa yanji?
Ŵelengani Salimo 119:63, nokambilana konsho iyi:
-
Mungaziŵe tyani kuti uyu munthu angankhale muyanu wabwino?
Apo imozi yowola, ingawoleshe ayakine. Kansi kukatizhyana na munthu olo m’mozi muipa, kungakhuze tyani minkhalidwe yanu?
4. Olo ŵanthu amene tusiyana nao vyaka na cinkhalidwe angankhale ayasu abwino
Baibo yufotokoza za ushamwali wa analume aŵili aciisiraeli, Davide na Yonatani. Yonatani enze mkulu ngako pali Davide, ndipo enze mwana wa mfumu; koma aŵa ŵanthu enze pa ushamwali wotang’a. Ŵelengani 1 Samueli 18:1, nokambilana konsho iyi:
-
Ndaŵa yanji tufunika lini kusankha tyala ŵala ŵatulingana nao msinkhu kapena cinkhalidwe kunkhala ayasu?
Ŵelengani Aroma 1:11, 12, nokambilana konsho iyi:
-
Kansi ayasu amene okonda Yehova angatilimbikishe tyani?
M’vidyo iyi, onani mwamene mkwasu wacilumbwana epezela ayake ku malo osayembekezeleka. Onelelani VIDYO, nokambilana makonsho okonkhapo.
-
M’vidyo iyi, ndaŵa yanji makolo ŵa Akil enze na nkhaŵa kuti mwana wao angapeze ayake olakwika ku sukulu?
-
N’cinji cepangisha kuti ayambe kukondana nao?
-
Nanga ecitanji kuti alimbane na vuto ya kusungulumwa?
5. Mwatingapezele ayasu abwino
Onani zamungacite kuti mupeze ayanu abwino, na mwamungakulishile minkhalidwe yabwino, yamene yangacitishe kuti ayanu akukondeni. Onelelani VIDYO.
Ŵelengani Miyambo 18:24 na 27:17, nokambilana makonsho aŵa:
-
Kansi ŵanthu amene ali pa ushamwali wenewene oyavyana tyani?
-
Kansi muli na ayanu abwino ŵamuyavyana nao? Ngati muliye, mungacitenji kuti muŵapeze?
Ŵelengani Afilipi 2:4, nokambilana konsho iyi:
-
Kuti mupeze ayanu abwino, namwe mufunika kunkhala na minkhalidwe yabwino, yamene yangacitishe kuti ŵanthu ayakine akukondeni. Lomba mungacite tyani kuti mukulishe minkhalidwe yabwino?
Kuti munkhale na ayanu abwino, namwe mufunika kunkhala na minkhalidwe yamene yangapangishe kuti nao ayanu akukondeni
ŴANTHU AYAKINE OKAMBA KUTI: “Cili bwino kunkhala na muyako aliyense kupambana kunkhala weka.”
-
Mungayankhe kuti tyani?
MFUNDO ZACIDULE
Ngati tusankha ayasu mwanzelu, tukondwelesha Yehova ndipo tupindula.
Kuwelezhya mfundo zikulu-zikulu
-
Ndaŵa yanji Yehova ofuna kuti tikosankha ayasu mwanzelu?
-
Ni ŵanthu otyani ŵatufunika kupewa kukatizhyana nao?
-
Mungacite tyani kuti munkhale pa ushamwali wotang’a na ŵanthu a minkhalidwe yabwino?
FUFUZANI
Onani mwaangatiyavyile ayasu tikakumana na mavuto.
“Tang’ishani Ushamwali Pakati Panu Masilizhyilo Akaliyofwika” (Nsanja ya Mlonda, November 2019)
Ganizilani zamungacite kuti mupeze ayanu abwino.
Kansi mufunika kuziŵa cinji pa nkhani yopeza ayanu pa intaneti?
M’nkhani yakuti “Nenzofunishisha Kupeza Atata,” onani cifukwa cake munalume muyakine ecinja ashamwali ŵake.
“Baibo Yucinja Umoyo wa Ŵanthu” (Nsanja ya Olonda, April 1, 2012)
