MUTU 49
Mungacite Tyani Kuti Banja Yanu Inkhale Yacimwemwe?—Mbali Yoyamba
Pa siku ya ukwati, okwatilana onkhala acimwemwe. Ndipo onkhala na ciyembekezo cakuti cimwemwe ici cipitilile mpaka kale-kale. Izi n’zokwanishika. Akhristu amene ankhala m’cikwati kwa nthawi itali ndipo ankhala oseŵenzesha mfundo za m’Baibo, oziŵa kuti n’zokwanishika kunkhala na banja yacimwemwe.
1. Kansi Baibo yupeleka malangizo otyani kuli analume okwatila?
Yehova epasa munalume udindo wonkhala mutu wa banja. (Ŵelengani Aefeso 5:23.) Yehova oyembekezela kuti munalume akopanga zosankha zopindulisha banja. Baibo yulangiza analume kuti: “Pitilizhyani kukonda akazi ŵanu.” (Aefeso 5:25) Kansi izi zutanthauzanji? Zutanthauza kuti munalume ofunika kucita zinthu mwacikondi na mkazi wake, kaya ali kwaŵeka kapena pa gulu ya ŵanthu. Ofunika kumuteteza noyesayesa kumupezela zinthu zakufunikila. (1 Timoteyo 5:8) Ndipo cofunika ngako n’cakuti, ofunika kumusamalila pa zinthu zauzimu. (Mateyu 4:4) Mwacisanzo, angapemphele naye noŵelenga Baibo pamozi. Ngati munalume osamalila mkazi wake mwacikondi, otang’isha ushamwali wake na Yehova.—Ŵelengani 1 Petulo 3:7.
2. Kansi Baibo yupeleka malangizo otyani kuli anakazi okwatiliwa?
Mau a Mulungu okamba kuti munakazi “ofunika kulemekeza ngako mulume wake.” (Aefeso 5:33) Kansi angacite tyani zamene izi? Angacite izi mwa kuganizila minkhalidwe yabwino ya mulume wake, na khama yakucita posamalila banja yonse. Angaoneshe soti kuti omulemekeza mwa kucilikiza zosankha zake, kukamba naye mwaulemu nokamba zabwino zokhuza mulume wake, olo kuti ni wosakhulupilila.
3. Kansi ŵanthu okwatilana angacitenji kuti atang’ishe cikwati cao?
Ponena za ŵanthu okwatilana, Baibo yukamba kuti: “Aŵili onkhala muŵili umozi.” (Mateyu 19:5) Izi zutanthauza kuti ofunika lini kulola ciliconse kusokoneza cikondi cao. Angacite izi mwa kupeza nthawi yotandala pamozi, nouzhyana zakumkosi moona mtima na mwacikondi. Ofunika lini kulola cinthu ciliconse kapena munthu aliyense kunkhala zofunika ngako kupambana muyao wa m’cikwati, kupatulapo tyala Yehova. Ofunika kusamala kuti asayambe kukopana na ŵanthu ayakine.
PHUNZILANI ZINYINJI
Onani mfundo za m’Baibo zamene zingatang’ishe cikwati canu.
4. Analume okwatila, mukokonda nosamalila akazi ŵanu
Baibo yukamba kuti ‘analume ofunika kukonda akazi ŵao monga ni mwakuzikondela ŵeka.’ (Aefeso 5:28, 29) Kansi izi zutanthauzanji? Onelelani VIDYO, nokambilana konsho yokonkhapo.
-
Ni njila ziyakine zotyani zaangaoneshele munalume kuti okonda mkazi wake?
Ŵelengani Akolose 3:12, nokambilana konsho iyi:
-
Kansi munalume angaoneshe tyani minkhalidwe iyi m’banja?
5. Anakazi okwatiliwa, mukokonda nolemekeza alume ŵanu
Baibo yulimbikisha munakazi wokwatiliwa kulemekeza mulume wake, kaya otumikila Yehova kapena yai. Ŵelengani 1 Petulo 3:1, 2, nokambilana makonsho aŵa:
-
Ngati alume ŵanu otumikila lini Yehova, mosakaikila mufunishisha kuti ayambe kumutumikila. Muganiza kuti njila yabwino ingankhale yotyani—kuŵalalikila nthawi zonse, kapena kuŵaonesha minkhalidwe iweme na ulemu? Ndaŵa yanji?
Munalume na mkazi wake angapangile pamozi zosankha mwanzelu. Koma nthawi ziyakine, munakazi angakatizhyane lini na zosankha za mulume wake. Ngati zankhala tetyo, angacite bwino kufotokoza maganizo ŵake modekha na mwaulemu. Koma ofunika kuzindikila kuti Yehova epasa mulume wake udindo wopanga zosankha za banja. Ofunika kuyesayesa kucilikiza zosankha za mulume wake. Kucita izi kupangisha kuti m’banja munkhale cimwemwe. Ŵelengani 1 Petulo 3:3-5, nokambilana konsho iyi:
-
Kansi Yehova akumvwa tyani ngati munakazi olemekeza mulume wake?
6. Mungakwanishe kugonjesa mavuto mu ukwati
Paliye cikwati cangwilo. Tetyo, okwatilana ofunika kuseŵenzela pamozi kuti agonjese mavuto. Onelelani VIDYO, nokambilana makonsho okonkhapo.
-
M’vidyo iyi, n’cinji ceonesha kuti cikondi ca banja iyi cenze ceyamba kucepa?
-
Kansi ecitanji kuti atang’ishe cikwati cao?
Ŵelengani 1 Akorinto 10:24 na Akolose 3:13. Mukaŵelenga lemba iliyonse, kambilanani konsho iyi:
-
Kansi kuseŵenzesha malangizo aŵa kungatang’ishe tyani cikwati?
Baibo yukamba kuti tufunika kulemekezana. Kulemekeza munthu kutanthauza kumucitila zinthu mwacikondi nomuonesha ulemu. Ŵelengani Aroma 12:10, nokambilana makonsho aŵa:
-
Kansi ŵanthu okwatilana ofunika kuyembekezela muyao wa m’cikwati kuyambila ni yove kuonesha ulemu? Ngati muona tetyo, ndaŵa yanji? Nanga ngati muona lini tetyo, ndaŵa yanji?
ŴANTHU AYAKINE OKAMBA KUTI: “Neo na alume ŵangu, kapena akazi ŵangu, tukondana lini monga ni mwetenzokondelana kale.”
-
Mungaŵafotokozele tyani kuti Baibo ingaŵayavye?
MFUNDO ZACIDULE
Munalume na mkazi wake angankhale acimwemwe ngati okondana, olemekezana noseŵenzesha mfundo za m’Baibo.
Kuwelezhya mfundo zikulu-zikulu
-
Kansi munalume wokwatila angacitenji kuti banja inkhale yosangalala?
-
Nanga munakazi wokwatiliwa angacitenji kuti banja inkhale yosangalala?
-
Ngati muli pa banja, ni mfundo zotyani za m’Baibo zingatang’ishe cikwati canu?
FUFUZANI
Onani zamungacite kuti munkhale na banja yacimwemwe.
Banja Yanu Ingaŵe Yotemwa (kabuku)
Onelelani vidyo yamene yuonesha madaliso amene owela ngati museŵenzesha mfundo za m’Baibo m’cikwati.
Onani tanthauzo ya kugonjela umutu wa munalume.
“Anakazi, Ndaŵa Yanji Mufunika Kugonjela Munalume Monga Mutu?” (Nsanja ya Olonda, May 15, 2010)
Onani mwamene mfundo za m’Baibo zingayavyile banja kunkhala yotang’a.
