Aliyense ali na zokonda zake pa nkhani ya kavwalidwe na kaonekedwe. Ngati tingakonkhe mfundo za m’Baibo, aliyense angasankhe kuvwala vakukonda, koma nokondwelesha mphela Yehova. Tiyeni tikambilane ziyakine mwa mfundo izi.

1. Ni mfundo zotyani zufunika kutisogolela popanga zosankha pa nkhani ya kavwalidwe na kaonekedwe?

Tufunika kusankha “vovwala voyenela, novwala mwaulemu koma soti mwanzelu.” Ndipo nthawi zonse tufunika kuoneka bwino kuti tioneshe kuti ‘tulemekeza Mulungu.’ (1 Timoteyo 2:9, 10) Tiyeni tikambilane mfundo zokwanila 4: (1) Tufunika kuvwala “vovwala voyenela.” Monga ni mwamuonela pa misonkhano ya mpingo, a Mboni za Yehova ovwala mosiyanasiyana. Koma kavwalidwe kao na kakonzedwe kao ka sisi, koonesha kuti olemekeza Mulungu wakulambila. (2) Tufunika kuvwala “mwaulemu.” Izi zutanthauza kuti tufunika lini kuvwala vovwala vousha cilakolako colalana, kapena kuvwala na colinga cofuna kuzioneshela. (3) Tufunika soti kuvwala “mwanzelu.” Izi zutanthauza kuti tufunika lini kutolela mafashoni olo masitayelo yaliyonse yawela. (4) Nthawi zonse kaonekedwe kasu kofunika kuonesha kuti ‘tulemekeza Mulungu.’ Izi zupangisha ayakine kuona kuti tulambila Mulungu wacendi.—1 Akorinto 10:31.

2. Kansi kaonekedwe kasu kangakhuze tyani okhulupilila ayasu?

Olo kuti tili na ufulu wovwala ciliconse catingakonde, tufunika kuganizila mwazingakhuzile ayakine. Tuyesayesa kupewa kukhumudwisha ŵanthu ayakine. M’malomwake, tufuna ‘kukondwelesha ayasu pa zinthu zabwino zoŵalimbikisha.’—Ŵelengani Aroma 15:1, 2.

3. Kansi kaonekedwe kasu kangayavye tyani ŵanthu kufuna kuphunzila za Yehova?

N’cendi kuti tuyesayesa kuvwala vovwala vooneka bwino pa nthawi iliyonse. Koma tufunika kuoneka bwino ngako makamaka ngati tili pa misonkhano ya mpingo na mu utumiki. Tufuna lini kuti maonekedwe ŵasu akopangisha ŵanthu kukana kumvwa uthenga wabwino. M’malomwake, tufuna kuti maonekedwe ŵasu apangishe ayakine kufuna kuphunzila za Yehova ‘nowamisha ciphunziso ca Mpulumusi wasu.’—Tito 2:10.

 PHUNZILANI ZINYINJI

4. Ngati tuoneka bwino, tulemekeza Yehova

Kansi cifukwa cikulu catufunikila kuoneka bwino n’cotyani? Ŵelengani Salimo 47:2, nokambilana makonsho aŵa:

• Kansi kukumbukila mfundo yakuti tupanamilako Yehova kufunika kukhuza tyani kavwalidwe kasu?

• Muona kuti n’cinthu cofunika kuoneka bwino ngati tili pa misonkhano na mu utumiki? Ngati muona tetyo, ndaŵa yanji? Nanga ngati muona lini tetyo, ndaŵa yanji?

 5. Mwatingapangile zosankha mwanzelu pa nkhani ya kavwalidwe na kaonekedwe

Onelelani VIDYO.

Kaya vovwala vasu vinkhale vodula kapena vochipa, vufunika kunkhala vituŵa koma soti voyenelelana na zatucita pa nthawi yamene iyo. Ŵelengani 1 Akorinto 10:24 na 1 Timoteyo 2:9, 10. Pavuli pake, kambilanani cifukwa cake tufunika kupewa kuvwala vovwala . . .

• vosawasha kapena vakuvwala ŵanthu a minkhalidwe iipa.

• vofyantha, voonesha mkati olo vousha cilakolako colalana.

Olo kuti Akhristu okonkha lini Cilamulo ca Mose, angaphunzile maganizo a Yehova kucokela ku Cilamulo ici. Ŵelengani Deuteronomo 22:5, nokambilana konsho iyi:

• Ndaŵa yanji tufunika kupewa kuvwala vovwala voonesha analume monga ni anakazi, kapena anakazi monga ni analume?

Ŵelengani 1 Akorinto 10:32, 33 na 1 Yohane 2:15, 16, nokambilana makonsho aŵa:

• Ndaŵa yanji tufunika kunkhala osamala kuti maonekedwe ŵasu asakhumudwishe ŵanthu ayakine kudela kwatunkhala kapena mumpingo?

• Ni kavwalidwe kotyani kamene ni kowanda kudela kwamunkhala?

• Kansi muona kuti kavwalidwe ako ni kosayenelela kwa Mkhristu? Ngati muona tetyo, ndaŵa yanji? Nanga ngati muona lini tetyo, ndaŵa yanji?

MFUNDO ZACIDULE

Ngati tupanga zosankha mwanzelu pa nkhani ya kavwalidwe na kaonekedwe, tuonesha kuti tulemekeza Yehova na ŵanthu ayakine.

Kuwelezhya mfundo zikulu-zikulu

• Ndaŵa yanji kavwalidwe na kaonekedwe kasu ni nkhani yofunika ngako kwa Yehova?

• Ni mfundo zotyani zamene zingatisogolele popanga zosankha pa nkhani ya kaonekedwe kasu?

• Kansi maonekedwe ŵasu angayavye tyani ŵanthu ayakine kufuna kuphunzila za Yehova?