Yesu ndiye Mutu wa mpingo wacikhristu. (Aefeso 5:23) Yesu, monga Mfumu kululu, oseŵenzesha “kapolo wokhulupilika na wanzelu” posogolela ophunzila ŵake pano pacalo. (Ŵelengani Mateyu 24:45.) Yesu Khristu ndiye esankha “kapolo” uyu ndipo emupasa ufulu wopanga zosankha ziyakine. Koma kapolo uyu ofunika mphela kumvwila Khristu notumikila akwake a Khristu. Kansi kapolo uyu ni ŵani? Nanga otisamalila tyani?

1. Kansi “kapolo wokhulupilika na wanzelu” ni ŵani?

Nthawi zonse Yehova wankhala oseŵenzesha munalume kapena kagulu ka analume kusogolela ŵanthu ŵake. (Malaki 2:7; Aheberi 1:1) Pavuli pakuti Yesu wafwa, atumwi na akulu ku Yerusalemu ndiye eyamba kusogolela mpingo wacikhristu. (Machitidwe 15:2) Pokonkha dongosolo iyi, masiku ŵano pali soti kagulu ka akulu amene opeleka cakulya cauzimu noyanganila nchito yolalikila pacalo. Kagulu aka koitiwa kuti Bungwe Yolamulila ya Mboni za Yehova. Bungwe Yolamulila ndiye “kapolo wokhulupilika na wanzelu” weciika Yesu. (Mateyu 24:45a) Onse amene ali m’Bungwe Yolamulila ni Akhristu ozozewa, ndipo ali na ciyembekezo ca kuyolamulila pamozi na Khristu kululu, akasilizhya umoyo wao pano pacalo.

2. Ni cakulya cauzimu cotyani cakupeleka kapolo wokhulupilika?

Yesu ekamba kuti kapolo wokhulupilika akankhale na udindo “wopasa [Akhristu ayake] cakulya pa nthawi yoyenela.” (Mateyu 24:45b) Monga mwamene cakulya cutipasila mphamvu notiyavya kunkhala na thanzi yabwino, naco cakulya cauzimu, kapena kuti malangizo opezeka m’Mau a Mulungu, cutipasa mphamvu kuti tipilizhye kutumikila Yehova mokhulupilika nocita nchito yecitipasa Yesu. (1 Timoteyo 4:6) Cakulya ici cupelekewa kupitila m’misonkhano ya mpingo, misonkhano yadela na misonkhano yacigao. Cakulya cauzimu cupelekewa soti kupitila m’zofalisa zofotokoza Baibo na mavidyo amene otiyavya kumvwisha cifunilo ca Mulungu notang’isha ushamwali wasu na yove.

 PHUNZILANI ZINYINJI

3. Ŵanthu a Yehova ofunika kunkhala olinganizhyiwa bwino

Bungwe Yolamulila yukonkha malangizo a Yesu poyanganila nchito ya Mboni za Yehova. Izi ndiye zenzocitika na mumpingo wa Akhristu oyambilila. Onelelani VIDYO.

Ŵelengani 1 Akorinto 14:33, 40, nokambilana konsho iyi:

• Kansi lemba iyi yuonesha tyani kuti Yehova ofuna kuti Mboni zake zinkhale gulu yolinganizhyiwa bwino?

4. Kapolo wokhulupilika oyanganila nchito yolalikila

Kulalikila ni nchito yofunika ngako yeenzocita Akhristu oyambilila. Ŵelengani Machitidwe 8:14, 25, nokambilana makonsho aŵa:

• Kansi ni ŵani enzoyanganila nchito yolalikila yeenzocita Akhristu oyambilila?

• Kansi Petulo na Yohane ecita tyani pecipasiwa malangizo na atumwi ayao?

Kulalikila ni nchito yofunika ngako yamene yuyanganiliwa na Bungwe Yolamulila. Onelelani VIDYO.

 Yesu eonesha kuti nchito yolalikila ni yofunika ngako. Ŵelengani Maliko 13:10, nokambilana makonsho aŵa:

• Ndaŵa yanji Bungwe Yolamulila yuona kuti nchito yolalikila ni yofunika ngako?

• Ndaŵa yanji pofunika “kapolo wokhulupilika na wanzelu” kuti nchito iyi icitike bwino pacalo conse?

5. Kapolo wokhulupilika opeleka malangizo

Bungwe Yolamulila yupeleka malangizo pacalo conse. Kansi oziŵa tyani malangizo ofunika kupelekewa? Onani mweyenzocitila bungwe yolamulila m’nthawi ya Akhristu oyambilila. Ŵelengani Machitidwe 15:1, 2, nokambilana makonsho aŵa:

• Kansi Akhristu oyambilila enze esiyana maganizo pa nkhani yotyani?

• Kansi Paulo, Baranaba, na ayakine eluta kuni kuti nkhani iyi isamaliliwe?

Ŵelengani Machitidwe 15:12-18, 23-29, nokambilana konsho iyi:

• Ikaliyopanga cosankha, kansi bungwe yolamulila ya Akhristu oyambilila yecita cinji kuti iziŵe maganizo a Mulungu pa nkhani iyi?—Onani mavesi 12, 15, na 28.

Ŵelengani Machitidwe 15:30, 31 na 16:4, 5, nokambilana konsho iyi:

• Kansi Akhristu oyambilila eyalandila tyani malangizo yecokela ku bungwe yolamulila?

• Kansi Yehova eŵadalisa tyani cifukwa cokonkha malangizo aŵa?

Ŵelengani 2 Timoteyo 3:16 na Yakobo 1:5, nokambilana konsho iyi:

• Kansi Bungwe Yolamulila masiku ŵano yudalila cisogozo ca ŵani popanga zosankha?

MFUNDO ZACIDULE

Bungwe Yolamulila ndiye “kapolo wokhulupilika na wanzelu” wamene eikiwa na Khristu. Yupeleka malangizo na cakulya cauzimu ku Akhristu pacalo conse.

Kuwelezhya mfundo zikulu-zikulu

• Ni ŵani eika “kapolo wokhulupilika na wanzelu”?

• Kansi Bungwe Yolamulila yutisamalila tyani?

• Kansi mukhulupilila kuti Bungwe Yolamulila ndiye “kapolo wokhulupilika na wanzelu”?