MUTU 55
Cilikizani Mpingo Wanu
Pacalo conse, pali ŵanthu mamiliyoni amene otumikila Yehova mosangalala m’mipingo yosiyanasiyana. Oyamikila malangizo yakulandila ndipo ocilikiza mpingo m’njila zinyinji. Kansi muona kuti izi ndiye zucitika mumpingo mwanu?
1. Ni njila ziyakine zotyani zamungaseŵenzeshele nthawi yanu na mphamvu zanu kuti mucilikize mpingo?
Tonse pali zatingacite kuti ticilikize mpingo. Mwacisanzo, ngati mumpingo mwanu muli acikulile olo olemala, mungaŵayavye kuti akopezeka pa misonkhano. Mungaŵayavye soti m’njila ziyakine, monga kuŵagulilako zinthu zofunikila olo kuŵathandizako nchito za pang’anda. (Ŵelengani Yakobo 1:27.) Tingazipeleke soti kuti tithandizeko kuyelesa nosamalila Ng’anda ya Ufumu. Paliye angatikakamizhye kucita izi zinthu. Kukonda Mulungu na akwasu ndiye kutilimbikisha ‘kuzipeleka mofunishisha.’—Salimo 110:3.
Mboni zobatizika zingacilikize mpingo m’njila ziyakine zoyangizhyilika. Akwasu amene okwanilisha ziyeneleso za m’Malemba angatumikile monga atumiki oyavya, ndipo m’kupita kwa nthawi angaikiwe kunkhala akulu. Akwasu na azilongosi onse ali na mwai wocilikiza mokwanila nchito yolalikila mwa kutumikila monga apainiya. Mboni ziyakine zingazipeleke kuthandizila pa nchito yomanga malo olambilila, olo kuyotumikila kumpingo kwamene kufunikila thandizo.
2. Kansi tingaseŵenzeshe tyani ndalama zasu na katundu wasu kuti ticilikize mpingo?
‘Tingalemekeze Yehova na vinthu vasu vamtengo wapatali.’ (Miyambo 3:9) Tuona kuti ni mwai kupeleka ndalama na zinthu ziyakine kuti zicilikize mpingo wasu na nchito yolalikila pacalo conse. (Ŵelengani 2 Akorinto 9:7.) Zopeleka zasu zuseŵenzeshewa soti kuthandizila kumadela kwamene kwacitika masoka acilengedwe. Anyinji osankha kuikako “kayakine pambali” kuti akopeleka nthawi zonse. (Ŵelengani 1 Akorinto 16:2.) Tingapange zopeleka poseŵenzesha tumabokosi twa zopeleka twamene tupezeka pamalo ŵasu olambilila olo tingaseŵenzeshe intaneti kupitila pa donate.pr418.com. Yehova otipasa mwai wakuti tioneshe kuti tumukonda mwa kuseŵenzesha zinthu zatili nazo.
PHUNZILANI ZINYINJI
Onani njila ziyakine zamungacilikizile mpingo.
3. Tingaseŵenzeshe ndalama na katundu wasu
Yehova na Yesu okonda munthu wopeleka mokondwela. Mwacisanzo, Yesu eyamikila munakazi wamasiye wamene enze wosauka koma epeleka zinthu zake kwa Yehova. Ŵelengani Luka 21:1-4, nokambilana makonsho aŵa:
-
Kansi tufunika kupeleka ndalama zinyinji kuti Yehova akondwele?
-
Kansi Yehova na Yesu akumvwa tyani ngati tupeleka mokondwela?
Kuti muziŵe mwazuseŵenzeshewela zopeleka zasu, onelelani VIDYO, nokambilana konsho yokonkhapo.
-
Kansi zopeleka zasu zuseŵenzeshewa tyani pocilikiza mipingo pacalo conse?
4. Tingazipeleke kuti tithandize
M’nthawi za m’Baibo, atumiki a Yehova enzozipeleka mwakhama kuti asamalile malo olambilila. Koma enzocita zinyinji kupambana kupeleka tyala ndalama. Ŵelengani 2 Mbiri 34:9-11, nokambilana konsho iyi:
-
Kansi Mwiisiraeli aliyense enzocita cinji kuti asamalile ng’anda ya Yehova, kapena kuti malo olambilila?
Kuti muone mwamene Mboni za Yehova zukonkhela cisanzo ici, onelelani VIDYO, nokambilana makonsho okonkhapo.
-
Ndaŵa yanji tufunika kusamalila Ng’anda ya Ufumu kuti ikooneka bwino?
-
Ni njila zotyani zamungathandizile?
5. Akwasu angakalamile kuti acite zinyinji
Malemba olimbikisha analume acikhristu kukalamila maudindo kuti acilikize mpingo. Kuti muone cisanzo, onelelani VIDYO, nokambilana konsho yokonkhapo.
-
M’vidyo iyi, kansi Ryan ecitanji kuti akalamile maudindo nocilikiza mpingo mokwanila?
Baibo yufotokoza ziyeneleso za akwasu amene otumikila monga atumiki oyavya na akulu. Ŵelengani 1 Timoteyo 3:1-13, nokambilana makonsho aŵa:
ŴANTHU AYAKINE ANGAKONSHE KUTI: “Kansi a Mboni za Yehova opeza kuni ndalama zoyendeshela nchito yao?”
-
Mungayankhe kuti tyani?
MFUNDO ZACIDULE
Yehova oyamikila ngako ngati tuyesayesa kucilikiza mpingo poseŵenzesha nthawi yasu, mphamvu zasu, ndalama zasu na katundu wasu.
Kuwelezhya mfundo zikulu-zikulu
-
Kansi tingaseŵenzeshe tyani nthawi yasu na mphamvu zasu kuti ticilikize mpingo?
-
Kansi tingaseŵenzeshe tyani ndalama zasu na katundu wasu kuti ticilikize mpingo?
-
Ni njila zotyani zamungakonde kucilikizila mpingo?
FUFUZANI
Onani cifukwa cake Mulungu ofuna lini soti kuti olambila ŵake akopeleka cakhumi.
“Kansi Baibo Yulaŵilanji pa Nkhani Yopeleka Cakhumi?” (Nkhani yupezeka tyala pa webusaiti)
Baibo yupeleka maudindo ayakine kuli akwasu obatizika. Koma nanga tyani ngati paliye akwasu obatizika?
“Udindo wa Akulu Mumpingo” (Nsanja ya Mulonda, February 2021)
Onani kuzipeleka kwakucita akwasu kuti apeleke zofalisa ku madela osiyanasiyana.
Onani mwatupezela ndalama zoyendeshela nchito yasu, mosiyana na mwakupezela a vipembezo viyakine.
“Kansi Ndalama Zoyendeshela Nchito ya Mboni za Yehova Zucokela Kuni?” (Nkhani yupezeka tyala pa webusaiti)
