Ngati tili pamozi na okhulupilila ayasu, tikumvwa monga ni mwecimvwila Mfumu Davide, wamene ekamba kuti: “N’zabwino koma soti zosangalasa ngako, akwasu akankhala pamozi mokatizhyana!” (Salimo 133:1) Mgwilizano uyu uwela lini weka. Aliyense wa seo ofunika kucitako mbali yake kuti upitilizhye.

1. N’cinji cocitisha cidwi na ŵanthu a Mulungu?

Ngati mwapezeka pa misonkhano ku calo ciyakine kapena kudela kuyakine, payakine mungamvwe lini cilaŵilo cakuseŵenzesha, koma mungankhale lini omangika. Ndaŵa yanji? Cifukwa kulikonse tuphunzila Baibo poseŵenzesha zofalisa zolingana. Ndipo tuyesayesa kuoneshana cikondi. Kulikonse kwatingankhale, ‘tuita pa zina ya Yehova nomulambila mokatizhyana.’—Zefaniya 3:9.

2. Mungacitenji kuti mulimbikishe mgwilizano?

Baibo yukamba kuti: “Kondanani kucokela mumtima.” (1 Petulo 1:22) Kansi tingaseŵenzeshe tyani malangizo a pa lemba iyi? M’malo moika nzelu pa zolakwa za ŵanthu ayakine, tufunika kulolesha pa minkhalidwe yao yabwino. M’malo mokondana tyala na akwasu na azilongosi amene okonda zinthu zolingana na zatukonda seo, tufunika kuyesayesa kukondana soti na ŵala amene tusiyana nao zokonda. Tufunika soti kuyesayesa kupewa sankho.—Ŵelengani 1 Petulo 2:17. a

3. Kansi mufunika kucitanji ngati mwasemphana maganizo na Mkhristu muyanu?

N’cendi kuti nise ogwilizana, koma tiliye ungwilo. Nthawi ziyakine, tingasemphane maganizo. Pa cifukwa ici, Mau a Mulungu otiuzhya kuti: “Pitilizhyani . . . kukhululukilana. Monga ni mwecikukhululukilani Yehova na mtima wonse, namwe citani cimozimozi.” (Ŵelengani Akolose 3:13.) Tumukhumudwisha nthawi zinyinji Yehova, koma otikhululukila. Tetyo, oyembekezela kuti nase tikokhululukila akwasu. Ngati mwazindikila kuti mwakhumudwisha munthu muyakine, mukocitapo kanthu kuti munkhazikishe mtendele.—Ŵelengani Mateyu 5:23, 24. b

 PHUNZILANI ZINYINJI

4. Pewani sankho

Tufuna kukonda akwasu onse. Koma nthawi ziyakine, tingavutike kukonda akwasu amene tusiyana nao mtundu na cinkhalidwe. Kansi n’cinji cingatiyavye? Ŵelengani Machitidwe 10:34, 35, nokambilana makonsho aŵa:

• Yehova olandila ŵanthu a mitundu yonse kunkhala Mboni zake. Kansi izi zufunika kukupangishani kuŵaona tyani akwasu na azilongosi amene musiyana nao mtundu na cinkhalidwe?

• Ni zinthu zotyani zakucita ŵanthu kudela kwanu zoonesha sankho, zamene mweo mufunika kuzipewa?

Ŵelengani 2 Akorinto 6:11-13, nokambilana konsho iyi:

• Muganiza kuti mungacitenji kuti mukokondana na akwasu na azilongosi onse, olo kuti musiyana nao mtundu na cinkhalidwe?

5. Mukokhululukila na mtima wonse nonkhazikisha mtendele

Yehova otikhululukila na mtima wonse olo kuti seo tufunika lini kumukhululukila. Ŵelengani Salimo 86:5, nokambilana makonsho aŵa:

• Kansi Yehova okhululukila kufwika pamlingo wotyani?

• Ndaŵa yanji mufunika kuyamikila kuti Yehova otikhululukila?

• Ni zinthu zotyani zamene zingacitishe kuti cinkhale covuta kunkhala pa mtendele na ŵanthu ayakine?

Tingatolele tyani cisanzo ca Yehova nopitilizhya kunkhala mogwilizana na akwasu na azilongosi? Ŵelengani Miyambo 19:11, nokambilana konsho iyi:

• Ngati munthu wakukhumudwishani, n’cinji camufunika kucita kuti munkhazikishe mtendele?

 Nthawi ziyakine, nase tukhumudwisha ŵanthu ayakine. Ngati zoteti zacitika, kansi tufunika kucitanji? Onelelani VIDYO, nokambilana konsho yokonkhapo.

• M’vidyo iyi, kansi kalongosi ecitanji kuti ankhazikishe mtendele?

MFUNDO ZACIDULE

Tingayavye kuti mumpingo munkhale mgwilizano ngati tukhululukila nokonda akwasu na azilongosi onse.

Kuwelezhya mfundo zikulu-zikulu

• Mungacite tyani kuti mupewe sankho?

• Mufunika kucitanji ngati mwasemphana maganizo na Mkhristu muyanu?

• Ndaŵa yanji tufunika kutolela cisanzo ca Yehova cokhululukila ayakine?